Liejcuna tapucärishgan

¿Imapitataj Pablo parlaycargan cayno nir: “Ley cashganraycur, chay leypaj wanurgä”? (Gál. 2:19).

Pablo cayno nergan: “Chaymi ley cashganraycur, chay leypaj wanurgä, chayno Diospäna cawacunäpaj” (Gál. 2:19, TNM).

Chayno escribirga Galacia marca laducunacho caycaj congregaciuncunatami Pabluga tantiachiyta munaycargan. Lutanta yachachicoj runacunaga jucnopami waquin cristianucunata tantiachergan, paycunaga nipäcoj ‘salvaciunta tarinchi lapan Moisespa Leyninta casucur-rämi, circuncisión nishganta ruracur-rämi’. Pablo ichanga musyarganmi chayno mana cashganta. Shumaj parlacaramurmi Pabluga tantiachicurgan, unay Leypa trucan, Jesús wanushganman yaracärinanpaj (Gál. 2:4; 5:2).

Bibliaga mayna wilacurgan pipis wanuptenga imatapis mana mayashganta ni ricashganta (Ecl. 9:5). “Leypaj wanurgä” Pablo nerga, parlaycargan Moisespa Leyninta manana ricänanpaj. Pabluga musyarganmi Jesusman yaracurla ‘Diospäna cawacunchi’.

“Ley cashganraycur” nirpis cristiano vidan jucnopana cashganta tantiachicuycargan. ¿Imano? Chaylarämi payga cayno nergan: “Musyämi laycunata cumlir pipis mana salbacushanta, Jesucristuta chasquicuptillä Tayta Dios salbamashanta” (Gál. 2:16). Jorgacämushgan tiempupäga alimi cargan chay Leyga. Caytapis Pablo nergan: “Chay laycunaga Jesucristo chayamushancamallami cumlinanchïpaj caran” (Gál. 3:19). Chauras chay Leyga cargan cuentata gocärinanpaj juchasapa cashganta y libracärinanpaj Jesusraj wanunanpaj cajta. Jina chay Leypis tantiachicurgan pï shamunanpaj Jesús cashganta. Chauras pipis Jesusman yaracurga justo runamanmi ticran (Gál. 3:24). Chayno runa Pablo cargan, Ley cashganraycur Jesusta chasquicurgan y payman yaracurgan. Chaymi ninchi ‘leypaj wanushganta’ y ‘Dioslapäna cawacushganta’. Diospa nawpancho ali ricashga cananpaj calpachacurgan.

Roma cristianucunata cartacurpis caytami Pabluga nergan: “Cuyay ermänucuna, Jesucristo [...] wañushanpita noganchïpis laycunapäga wañushanönami caycanchi [...]. Cananga chay laycunapa munaynincho cawananchïpa ruquin Espíritu Santupa maquinchönami cawaycanchi” (Rom. 7:4, 6). Caychopis y Gálatas 2:19 textuchopis Pabluga manami niycarganchu juchasapa car Leyraycur maldiciunashga wanunanpaj. Payga niycargan librina caycanganchitami. Cristiano vidata apanapaj mana chay Leywanraj cananpaj tantiachicurgan. Pipis librina caycan Jesús wanushganman yaracur-rämi.