Nínive marcachoga admiraypaj wasicuna y monumentucunami cargan.
¿Mayashcanquichu?
¿Imataj pasargan Nínive marcawan Jonás wanucuycuptinna?
670 WATA wichan (Jesús manaraj shamuptin) Asiria naciunga más munayniyoj y jatunman ticracurirgan. Museo Británico nishgan internetcho paginancho nishganno, “Chipre marcapita Irán marcacama cuchun cuchun cargan, jina juc ishcay watacuna Egiptucamami cargan”. Lapan marcancunapita, Nínive marcami más jatun cargan. Admiraypaj monumentuncunaraycur, jardinnincuna, palaciuncuna y bibliotecancunapis jatun cashganraycur ali tucärej. Nínive marcapa waquin tapiancunachoshi taripäcurgan “cay mundupa reynin” nej palabracunata. Chayga parlaycämurgan Asurbanipal jutiyoj reypa, payga waquin asirio reycunanopis chayno reguishga caytashi munargan. Chay wichanga piraj yarpanman cargan, Asiria naciunta y Nínive marcanta juc nación ushacächinanpaj cajta.
Munayniyoj Asiria naciunmi más jatun cargan chay wichancuna.
Chayno alapa poderniyoj nación caycaptinpis Jehovaga, Sofonías profetanwanmi wilachicurgan imata rurananpaj cajta, cayno nergan: “Asiria nacionta ushakätsinqa. Nínive markacho taq runakunatapis ushakätsiptinmi pasaypa chunyaq rikakunqa”. Jina Jehovapa, Nahúm profetanpis nergan: “¡Qellayninta y qorintapis apakäriy! [...] ¡Nínive marka chunyaraykanmi! [...] Lapan rikashuqniki runakunami qeshpiykur kayno nipäkunqa: ‘¡Nínive marka pasaypa ushakashqami kaykan!’” (Sof. 2:13; Nah. 2:9, 10; 3:7). Chay profeciacunata wiyashpanga ichanga runacunaga tapucärirgan: “¿Rasunpachuraj cay mandacoj naciunta maygan naciunlapis ushacächenga?” nir. ‘Mana, mana’ nirganchi waquincunaga.
Nínive marcaga chunyaj pampamanmi ticracurirgan.
‘Mana, mana’ niycaptinpis, 600 wata chayamunanpäna caycaptin, babiloniucuna y meducuna mayna Asiria naciunta ushacächergan. Aumi, Nínive marcaga pipa yarpayninlachopis cargannachu. Nueva York marcacho caycaj Museo de Arte Metropolitano wilacäramurgan pasaj watacunacho Nínive marca gongacashga y pampacashga caycashganta, y chay marcata yarpanapäga Diospa Palabranla wilacushganta. Y 1800 watacuna wichanpäga “manashi pipis shumajga musyarganchu chay marca rasunpa cashganta o mana”, chayta nin Biblical Archaeology Society Online Archive. Pero, 1845 watami Austen Henry Layard jutiyoj arqueólogo, unay Nínive cashgancho ojtir galaycurgan y tariycurgan chay marcata. Lapan tarishgancunachomi ricacämurgan Nínive marca poderniyoj cashganta.
Biblia wilacushganno Nínive marcawan ima pasashgancunaga yaracuypämi caycan. Cayga tantiachimanchi canan wichan alapa puedej naciuncuna ushacänanpäga Biblia wilacushgannola ruracanga (Dan. 2:44; Apoc. 19:15, 19-21).