¿Yarpanquichu?

¿Yarpanquichu guepa quillacunacho Wilacamoj revistacho ima leishgayquita? Mä musyanapaj cay tapucuycuna caycan:

¿Imamantaj Salmo 103:8 texto yarpächimanchi Jehová ‘cuyacoj’ y ‘perdunacoj’ cashganta nerga?

Salmo 103:8 texto wilacun Jehová amatar cuyacoj cashganta. Chayno pasaypa cuyacoj captinmi juchanchicunatapis perdunaycämun. Noganchipis Jehová rurashganno rurarga alimi canga (w21.01, 21 caj página).

¿Imanirtaj Jehová familiacho autoridad cananpaj camacächishga?

Alapa cuyacoj cashpanmi, chaymi lapanchipis shumaj cawacunchi. Pipis carguyoj mana captinga lapanpis munashgantachi ruracunman y manachi ni pipis cushishgalaga cawanmanchu. Juc pushacoj captinrämi imapis ali ruracan (w21.02, 3 caj página).

¿Imanirtaj cristianucunaga shumajraj yarpachacushwan internetpa piwanpis guelganacuypita?

Pipis internetlapa guelganacurga musyanmanmi piwan guelganacuycashganta. Achca runacuna captenga öraga mayganlatapis reguishwanchu (1 Tim. 5:13). Jina imacunatapis chaycho caycajcuna wilapämaptinchega öraga mana rasun cajcunata nimashwan y guellaytapis mañaycämashwan (w21.03, 31 caj página).

¿Imanirtaj Jehová ricaraycashgala churin Jesús wanunanta?

Juc caj, Jesusga wanunman cargan judiucuna maldecishga cashganpita librananpämi (Gál. 3:10, 13). Ishcay caj, Jehová churin Jesús nacananta ricaraycashgala tiempuwan Mayor caj Sacerdote carguta pay chasquinanpämi. Y quimsa caj, Jesús wanushganta ricarmi cuentata gocunchi ima nacaycunapa pasarpis Dioslata adurayta puedishganchita (Job 1:9-11) (w21.04, 16 y 17 caj paginacuna).

¿Imatataj rurashwan runacunata amanula mana tarerga?

Juc horachopis predicanapaj calpachacushwan, jina juc ladu juc ladumanpis aywashwan runacunata ashej. Cartacunata ruraptinchipis alimi canga (w21.05, 15 y 16 caj paginacuna).

¿Imapitataj Pablo parlaycargan cayno nir: “Ley cashganraycur, chay leypaj wanurgä”? (Gál. 2:19).

Chay Leyga cargan cuentata gocärinanpaj juchasapa cashganta y libracärinanpaj Jesusraj wanunanpaj cajta (Gál. 3:19, 24). Chayno runa Pablo cargan, Ley cashganraycur Jesusta chasquicurgan y payman yaracurgan. Chaymi ninchi ‘leypaj wanushganta’ (w21.06, 31 caj página).

¿Imacunatataj quiquin Jehovapis aguantaycanraj?

Jutin mana ali ricash caycashganta, autoridäninta mana respetashganta, camashga carpis contrancho churacajcunata, Diablo lulacuycarla unaypita cacushganta, nacapacuycarla sirvejnincuna caycashganta, cuyashgancuna wanushganta, nacachicojcuna imayca mana alicunata rurashganta, mana pengaypa cajcunata rurapäcushganta y camashgan Pacha juchunaraycaj wasino caycashgantapis (w21.07, 9-12 caj paginacuna).

¿Imatataj yachacunchi José pacienciacoj cashganpita?

Josega hermanuncuna alapa chiquishganraycurmi nacargan, chaymi hasta tiempuwanpis carcilmanraj chayargan (w21.08, 11 caj página).

¿Ima pasananpätaj wilacamun Ageo 2:6-9, 20-22 textucuna?

Diospita yachachicushganchita runacuna chasquicuyta mana munaptinpis, achcajmi Diospa marcanman shacäramuycan. Ichiclachona cuyuchishga canga cay munduta Dios ushacächiptin (w21.09, 15-19 caj paginacuna).

¿Imanirtaj Diospita yachachicuycarla caycashwan?

Jehovaga cushicunmi predicanapaj calpachacushganchita ricar. Mana yamacaypa Paypa cajcunata ruraycarga jatun bendiciuncunatami chasquishun (w21.10, 25 y 26 caj paginacuna).

¿Imanotaj Levítico 19 caj capítulo yanapämanchi cay consejuta cäsucunapaj: “Gamkunapis santu kapäkuy”? (1 Ped. 1:15).

Cay versículo ichanga jorgacämushga Levítico 19:2 textupita. Levítico 19 caj capituluga yanapacunmi 1 Pedro 1:15 textuta imano cäsucunapaj cawayninchicho (w21.12, 3 y 4 caj paginacuna).