Algücunapaj galletasnin
NICK, Oregón (Estados Unidos) naciuncho tiyaj runa cayno wilacun: “2014 watacho ishcay algücunata plazapa pasiachej cä. Chaychomi Testigucunata ricaj cä publicaciunnincunapa carritunwan, ali vistishga y cushishga lapancunata saludapäcoj.
“Testigucunaga algücunawanpis cuyapäcojmi cargan. Juc junajmi Elaine cristiana carritunwan caycargan, y ishcay algücunata galletasta garaycurgan. Chaypitaga algöcunata pasiachej jorguptë Elaine caycashganmanraj corrilapa aywacoj.
“Tiempuwanga algücuna galletasninta micur yachacarganna y nogapis paycunawan parlar galaycurgä. Pero 70 watayojna caycashgäraycurmi Testigucunamanga yäracurgächu. Waquin religiuncunapa mana alicuna rurashganta ricaycurmi ‘quiquilä Bibliataga estudiashaj’ nir yarpachacurgä.
“Chay wichanpäga ricargä Testigucuna más sitiucunacho carritunwan caycashganta. Paycunapis cushishgami capäcoj y ima tapucuynëtapis Bibliawan contestamargan, chaypitana paycunaman yäracur galaycurgä.
“Juc junajmi Elaine tapumargan: ‘¿Uywacunaga Diospa garayninchuraj?’ nir. ‘Aumi’, nergä. Nircur leipämargan Isaías 11:6-9 textuta. Chaypitana ni juc publicaciunlata mana apacurpis, paycunamanga yäracuycargäna.
“Y tiempuwanga Elaine y Brent runanwanpis shumaj parlapacärergä. Paycunaga nipäcamargan Mateupita Hechos libruyaj Bibliacho leinäpaj y chaynopa Cristo rurashganta ali tantiarcunäpaj. Chaytami rurargä. Chaylachona Brent Elainiwan Bibliapita yachacuyta galaycurgä. Chayga cargan 2016 watacho.
“Cada semana cushishga shuyaraj cä Bibliapita yachachimänanpaj y reuniunman aywanapäpis. Alapa cushishga y agradecido taricurgä Bibliacho yachacushgäpita. Juc wata pasarcuptinna bautizacurgä 79 watayojna caycar. Musyämi ali caminucho caycashgäta. Y cay Pachacho Jehovapa marcanpa rurincho taricushgäta”.