Liejcuna tapucärishgan

Jehovaga musyanmi shamoj tiempucho imataj pasananpaj, ¿imataj Biblia wilacun chaypita?

Bibliaga wilacun Jehová musyashganta shamoj tiempucho ima pasananpaj cajta (Is. 45:21). Pero imano ruramunanpaj, imaytaj rurananpaj cajtaga manami lapantachu wilacun. Chaymi lapanta mana musyarga, manami nishwanchu ‘caynomi pasanga’ nir. Pero caycanmi imacunata musyanapaj cajta.

Jehovaga lapanta rurayta puedirpis, öraga quiquinmi decidin lapanta mana rurananpaj. Yachaynin mana ushacaj captinmi, Jehovaga wilacunmanmi imata pasananpaj cajta (Rom. 11:33). Pero öraga quiquinmi camacächin o decidin mana musyananpaj ima pasananpaj cajta (Isaías 42:14 textuwan tincuchiy).

Jehovaga voluntäninta cumplinmi. Chaymi Isaías 46:10 textucho cayno tantiachicun: “Noqami unaypita patsa ima pasananpaq kaqtapis wilakatsï. Pasananpaq atska wata pishiykaptinmi musyatsï. Ruranäpaq yarpashqätaqa lapantami rurä”.

Jehová shamoj tiempupaj ima pasananpaj cajta musyanmi y ruraytapis puedin poderoso cashganraycur. Noganchi ichanga juc película imano ushananpaj cajta musyanapaj, lapan peliculataraj ricananchi. Pero Jehovaga manami necesitanchu noganchino shamoj tiempucho ima pasananpaj cajta musyayta. Chaypa trucan, payga maynami musyan ima y imay pasananpaj cajta; y chay hora chayamuptin chayno pasananpaj camacächinman (Éx. 9:5, 6; Mat. 24:36; Hech. 17:31).

Chaymi shamoj tiempucho imacuna pasananpaj cajpita parlar Jehová nin “kamakätsishqä”, ‘rurargä’ y “yarpashqänölami lapantapis rurashaq” nir (2 Rey. 19:25; Is. 46:11). Hebreo rimaychoga cay versiculucuna tincunmi mituwan aroj runawan (Jer. 18:4). Mituwan aroj yachaj runaga juc cuyaylapaj mancata o imatapis munashganno rurarinman, chaynolami Jehová munashganno lapantapis ruran voluntäninta cumplinanpaj (Efes. 1:11).

Jehovaga ima decidinapäpis quiquinchi acranapämi jaguimanchi. Payga manami pitapis destinashgachu, y ali runacunatapis obliganchu mana alicunata rurananpaj, nircur ushacächinanpaj. Payga jaguimanchi quiquinchicuna acranapaj imano cawacunapaj, ichanga yachachimanchi imano ali cawayta tarinapaj.

Caycunaman yarpäshun: puntataga ninivita runacunapita parlarcushun. Chay marcacho alapa mana ali ruraycuna captin Jehová nergan ushacächishga cananpaj. Pero, “Nínive runakuna jutsa rurashqanta kachariptinmi ushakätsinanpaq wilakatsishqa kaykarpis Tayta Dios manana ushakätsirqannatsu” (Jon. 3:1-10). Jehová yarpashganta rurananpaj mananami rurashganachu. ¿Imanir? Nínive runacunaga Jehová nishgantami wiyar arrepenticärergan.

Cananga Cirupita parlaj profeciapita yachacushun. Paymi judiucunata librargan y Jehovapa templuntapis sharcachinanpaj mandargan (Is. 44:26–45:4). Cay profeciataga rey Cirumi cumplergan, pay cargan Persiapita (Esd. 1:1-4). Ichanga, Ciro manami Diosta adurarganchu. Jehovaga payta utilizargan profecian cumplinanlapämi, pero manami obligarganchu payta sirvinanpaj (Prov. 21:1).

Jehová imanirtaj chaycunata rurashganta, shumajga manami tantianchichu. Jina ima yarpashganta, ima rurashganta y shamoj tiempupaj ima pasananpaj cajtapis runacunaga manami lapanta tantiaytaga puedinchu (Is. 55:8, 9). Chayno captinpis, Jehová imaypis alilata rurashganpitami seguro caycanchi, shamoj tiempupaj ima pasananpaj nishganpitapis.