¿Musyashcanquichu?
¿Imanirtaj Davidpa waquin soldaduncuna jäpa runacuna cargan?
REY Davidpa waquin soldaduncuna manami israelitacunachu cargan. Waquincuna caycan ammonita runa Zélec, heteo runa Urías y moabita runa Itmá (1 Crón. 11:39, 41, 46).a Jina “cereteo soldädukuna”, “peleteo soldädukuna” y ‘Gat runakunapis’ caycargan (2 Sam. 15:18). Ceret runacuna y Pelet runacunaga filisteucunapa castancunachi cargan (Ezeq. 25:16). Gat runacunaga filistea marca Gatpitami cargan (Jos. 13:2, 3; 1 Sam. 6:17, 18).
¿Imanirtaj Davidga jäpa runacunata acrargan soldaduncuna cananpaj? Payga musyarganmi paycuna mana jaguicoj o leal runacuna cashganta. Ceret runacunapita y Pelet runacunapita parlar The New Interpreterˈs Dictionary of the Bible nin: “David mandacushgancho imayca sasacunapa pasaycaptin, paycunaga Davidwan imaypis caycargan, manami cachaycurganchu”. ¿Imanotaj chayta musyanchi? Seba runaga Davidpa contranman sharcushga cargan, chaura “Israel runakuna Davidta kachariykur Bicripa tsurin Sebapa qepanpa aywakärirqan”, pero ‘cereteo soldädukuna’ y ‘peleteo soldädukuna’ Davidta yanapargan Seba runata wanuchinanpaj (2 Sam. 20:1, 2, 7). Juc cutichopis quiquin rey Davidpa wamran Adonías contranman sharcuyta munargan. Pero Ceret runacuna y Pelet runacunaga Davidta cacharirganchu y yanapargan Salomón rey cananpaj, paycunaga musyarganmi Jehová payta acrashganta rey cananpaj (1 Rey. 1:24-27, 38, 39).
Gat naciunpita Ittái runapis Davidta imaypis yanapargan. Absalón taytanpa contranman sharcuyta munar runacunata shimita jatipargan yanapänanpaj, pero Ittái runa 600 soldaduncunawan Davidta yanapargan. Jäpa runa captin David payta nergan munarga mana peliananpaj, pay ichanga cayno nergan: “Mandamaqnï rey kaykaptikiqa maypa aywaptikipis wanuy kawaymi yanapashayki, tayta. Imaypis qamta yanapanäpaqmi Tayta Diospa jutincho qamta promitï” (2 Sam. 15:6, 18-21).
Ittái runaga cachaycurganchu Jehová acrashgan rey Davidta.
Ceret, Pelet y Gat runacuna juc naciuncunapita captinpis, creirganmi Jehová rasunpa Dios cashganta y Davidtapis acrashganta rey cananpaj. Davidga alapachi cushicurgan yäracuypaj o mana jaguicoj runacuna paywan imaypis carcaycaptin.
a Deuteronomio 23:3-6 textucunacho Jehová nishga cargan ammonita y moabita runacuna Israel runacunaman ticrayta mana puedishganta. Paycunaga manami reguishga canmanchu cargan israelitacunano. Chayno captinpis israelitacunawan shuntacayta y tiyaytapis puedinmanmi cargan. Ricay Perspicacia para comprender las Escrituras nej libruta, ashiy “Ammonitas” nishganta y leiriy “se casan con israelitas” nejta.