¿Diosman yäracojchu canqui?

Jehovaman yäracur-raj amigunpis cashun. Ichanga Biblia nin “manami lapan runakunatsu” yäracoj cashganta (2 Tes. 3:2). Apóstol Pablo cayta guelgaycur chiquicojnincunapita parlaycargan, chay “fiyu runakunapita” librashga cananpaj. Pero manami paycunalapitachu nishwan mana yäracoj cashganta. Canan wichanpis waquin runacuna Dios imaycacunata camashganta ricarpis payman yäracärinchu (Rom. 1:20). Waquincunana creipäcun mana ricacajcunaman y yarpapäcun chaycuna poderyoj cashganta. Ichanga chaycunaman yäracushganga yangalapaj caycan.

Diosta cushichinapäga yäracunanchi pay rasunpa caycashganta y sirvejnincunata yanapashgantapis (Heb. 11:6). Yäracoj runamanga ticrashun Jehovapa santo espiritun yanapämaptinchiraj. Chaymi, espiritunpaj cada cadala mañacunanchi (Luc. 11:9, 10, 13). Bibliatapis leinanchi, leishganchiman yarpachacunanchi y calpachacunanchi cäsucoj canapäpis; chaycunata rurarga Diospa espiritunta chasquishun. Chaynopa ali yäracoj runaman ticraycur Jehovata cushichishun.