Liejcuna tapucärishgan
¿Imataj tantiachimanchi Salmo 12:7 textuga?
Salmo 12:7 textuga parlaycämun runacunata Jehová yanapänanpaj, ¿imanirtaj chayta ninchi?
Salmo capítulo 12:1 a 4 cajchoga, nin “ali ruraq runakuna lapannami ushakashqa” cashganta. Cananga yachacurcushun Salmo 12:5 a 7 textucunapita maslata tantianapaj.
“TAYTA DIOS kayno nin: ‘Waktsakunata y humildikunataqa aläpami nakarkaykätsin.
Nakatsiptinmi pasaypa waqarkaykan.
Tsaymi paykunata jukla yanapashaq.
Manakamashqannömi paykunata salvashaq’.
TAYTA DIOS promitishqankunaqa lapanpis yärakuypaqmi kaykan.
Püru kananpaq qanchis kuti tsulutsishqa qellaynömi nishqankunapis kaykan.
TAYTA DIOS, musyämi waktsakunata yanapanaykipaq kashqanta.
Musyämi fiyu runakunapita imaypis tsapänaykipaq kashqanta”.
5 caj versículo nin Tayta Dios wacchacunata jucla yanapänanpaj.
Y 6 caj versículo nin Jehová nishgancuna puro cashganta, ‘qanchis kuti tsulutsishqa qellaynömi kaykan’. Diospa siervuncunaga seguro y convencidumi caycanchi chaypita (Sal. 18:30; 119:140).
Waquin Bibliacunachoga Salmo 12:7 texto nin Jehová paycunata cuidananpaj. Chayno niptenga, ¿niycanchuraj Palabranta cuidananpaj o nacaycaj runacunata cuidananpächuraj parlaycan?
Sojta caj versiculucho parlaycan Jehová nishgancunapita, y waquincuna yarpapäcun quiquin Dios palabranta chapänanpaj cajta. Aumi, Diosga unaypita Palabranta chapashga pipis mana ushacächinanpaj (Is. 40:8; 1 Ped. 1:25).
Pero 5 caj versiculucho nin Jehová nacaycajcunata y wacchacunatapis imaypis yanapashganta, y chayno jinala ruranga (Job 36:15; Sal. 6:4; 31:1, 2; 54:7; 145:20).
Chauraga, ¿pïcunatataj Jehová chapan, runacunatachu o Palabrantachu?
Cay textuta shumaj tantiar, cuentata gocunchi runacunapaj parlaycashganta.
Salmo 12:1, 2 textucunacho parlamun Diospa siervuncunata mana ali runacuna lulapashganta. Y 3 caj versiculucho Jehová nin lula runacunata y mana alita parlaj runacunatapis lapanta ushacächinanpaj. Cay textucunaga tantiachimanchi Jehová sirvejnincunata imaypis yanapänanpaj, pay aunicushganga imaypis yäracuypämi caycan.
Chaura 7 caj versículo nishganno, ¿pïcunatataj Jehová chapanga? Jehovaga nin siervuncunata chapänanpaj fiyu runacuna nacachishganpita.
Y, ¿imanirtaj waquin Bibliacunacho Salmo 12:7 textucho nin gam paycunata chapanquipaj? Chayga ricachicun hebreo rimaycho copiacuna caycashganno ruracashganta. Ichanga griego rimaycho Septuaginta nishgancho nin pay chapämäshun, chaywanga niycan nacachej runacunapita siervuncunata chapänanpaj (Sal. 12:7, 8). Arameo rimaychoga juc traducción 7 caj versículo cayno nin: “Gammi TAYTA DIOS imaypis ali runacunataga chapanquipaj, mana alicunapita imaypis cuidanquipaj”. Caycama yachacushganchino cuentata gocunchi Salmo 12:7 textuga wilacamun Jehová siervuncunata chapänanpaj, salvananpaj y manami parlaycanchu Palabranta chapänanpächu.
Chauraga, cay versiculuga tantiachimanchi mana jaguicoj siervuncunata Jehová aunipan imaypis paycunata chapänanpaj.