Liejcuna tapucärishgan

2 Tesalonicenses 3:14 textucho waquincunawan ama shuntacaychu niptenga, ¿pïcunapätaj parlaycämun?

Tesalónica congregaciuncho caycajcunata consejar Pablo cayno nergan: “Kay cartacho qelqamushqäta mayqanpis mana chaskikuptinqa paywan amana juntakaynatsu” (2 Tes. 3:14). Unaychoga nerganchi cay consejuga ancianucunalapaj cashganta. Maygan cristianulapis achca cutina consejashga captin y mana cäsucuptin, ancianucuna juc discursuwan tantiachicamoj chay cristianuwan alapa mana shuntacänanpaj. Pero predicaciuncho y reuniunchoga shuntacashcanchiraj.

Pablo consejashgantaga canan jucnopana tantianchi. Cada cristianucuna decidipäcunman pïcunawan shuntacänanpaj. Y ancianucunapis juc discursuta manana rurannachu. ¿Imanirtaj chayno canan tantianchi? Mä shumaj tantiarcushun Pablo consejashganta.

Payga nergan cartancho consejashganta waquin cristianucunaga Diosta mana cäsucur mana ali cawarcaycashganta. Pabluga puntacho watucamur caytami nergan: ‘Aruyta mana munaq kaqqa [ama micunmanchu]’. Chayno captinpis, waquincuna aruyta puedirpis, guelanar aruyta munajchu. Jina waquincunapa washanta parlar cacärej. ¿Imanotaj hermanucunaga chayno cristianucunata ricanman cargan? (2 Tes. 3:6, 10-12).

Pablo nergan: “Paywan amana juntakaynatsu”. Chaypäga shumaj tantiapäcunan cargan pïcuna Diosta mana cäsucuycashganta mana juntacänanpaj. Cay consejuga manami ancianucunalapächu cargan, sinoga lapancunapaj (2 Tes. 1:1; 3:6). Chaura pilapis cuentata gocuptin juc hermano Diospa Palabranta manana cäsucuycashganta, quiquinmi decidinan cargan paywan alapa manana juntacänanpaj.

Chauraga, ¿congregaciunpita jorgushga cajcunatanochuraj ricanman cargan? Manami, Pablo cayno nergan: “Sinöqa wawqikitano y panikitano shumaq tantiyatsipäkuy”. Hermanucunaga paycunawan shuntacänan cargan predicaciunchopis y reuniuncunachopis, ichanga shuntacärinmanchu cargan micunapaj hora, ni cushicunapaj horachopis. Chayta rurar Pablo nergan: “Penqakushpan capazmi tantiyakunmanpis”. Paycunawan manana shuntacaptin, capaz cuentata gocunman cargan mana alita ruraycashganta y cambianmanpis (2 Tes. 3:14, 15).

Y noganchega, ¿imanopataj chay consejuta cäsucushwan? Puntataga shumajraj tantiananchi pilapis Diosta manana rasunpa cäsucuycashganpita. Pabluga manami parlaycarganchu pipis conciencianraycu noganchino igual mana decidiptin o gustunpis jucno captin, ni pilapis ofendimaptinchi captin. Chaypa trucan, payga parlaycargan Diospa leynincunata apripöso o adrede cäsucuyta mana munajcunapaj.

Chauraga cuentata gocuptinchi maygan cristianulapis Bibliaa nishganta mana cäsucuycashganta, quiquinchipitami canga paywan alapa manana shuntacänapaj cushicushganchi horacho. Jina familianchipita mana captenga waquincunawan chaypita parlaycashwanchu. Pero reuniuncunacho y predicaciunchoga jinala shuntacashwan. Corrigicuptin ichanga shuntacälanchimi.