Liejcuna tapucärishgan

¿Imaycamataj Diospa ali wilacuyninpita wilacuycäshun?

Jesús wilacurgan: “Lapan naciuncuna musyananpämi Diospa Gobiernunpita ali wilacuycuna entero pachacho predicashga canga, y nircurna ushacay chayamunga” (Mat. 24:14, TNM). Cay 14 versiculucho, 6 y 13 cajchopis ‘ushacay’ niptin parlaycan Satanaspa gobiernun chipyaypa ushacächishga cananpaj cajta, Armagedón guerracho (Apoc. 16:14, 16). Cananga tantiaycushun manaraj Armagedón guerra chayanancama Diospa ali wilacuyninpita wilacuycäshun, pero naupacho manami chaynochu tantiashganchi.

Canancama tantiashganchi mana ali religiuncuna ushacächishga captin y jatun nacay galaycushgancama Diospa ali wilacuyninpita wilacuycänanchipaj (Apoc. 17:3, 5, 15, 16). Tantiashganchipis jatun nacay galaycuptin runacuna manana Jehovapita yachacunanpaj cajta (Is. 61:2). Yarparganchipis Diosman yäracojcunala jatun nacay wichancho salvacärinanpaj cajta, paycuna unay judiucunano caycashganta nejcanchi. Chay judiucuna Jehová munashganno cawashganraycu y Paylata adorashganraycu cawapäcunanpaj señalashga cargan, chaymi Jerusalén marca ushacächishga captin 607 watacho Jesús manaraj shamuptin salvacärergan (Ezeq. 5:11; 9:4). Pero tantiashganchega manami tincunchu Jesús nishganwan Mateo 24:14 textucho. Cay textucho wilamanchi manaraj Armagedón guerra chayanancama Diospa ali wilacuyninpita wilacuycänanchipaj cajta.

Chauraga Mateo 24:14 yachacushganchipita canan Apocalipsis 16:21 textutapis jucnopa tantiashun, chaycho parlamun ‘jatusaj runtu tamyapita’. Cay ishcay textucunapita shumaj yachacurga tantianchi imano runacuna Diospa ali wilacuyninta chasquiycashganta. Apóstol Pablo nergan Diospa ali wilacuyninga mushcoj perfuminomi caycan salvacärinanpaj cajcunapaj. Pero Jehovata chiquejnincunapaj cay wilacuycuna melanaypaj asyajnomi caycan (2 Cor. 2:15, 16). Diospa sirvejnincuna wilacun cay pacha Diablupa maquincho caycashganta, mana ali caycashganta y ichiclachona ushacächishga cananpaj cajta, chayraycu paycuna Diospa ali wilacuyninta wiyayta munapäcunchu (Juan 7:7; 1 Juan 2:17; 5:19).

Apocalipsis 16:21 nimanchipis chay “runtu tamya” jatusaj caycashganta. Chauraga capaz Jatun nacay wichancho pï may runacunata Diospa ali wilacuyninpita masraj yachachishun y Jehovapa jutinpis may chaycho reguishga canga, unaycho manami chaynochu cashga (Ezeq. 39:7). Chaymi luta religiuncuna ushacächishgana captin capazchi waquin runacuna Diospa ali wilacuyninta chasquipäcunga. Capazchi paycuna yarpapäcunga o tantiapäcunga luta religiuncuna ushacächishga cananpaj cajta Jehovapa testiguncuna wilacushganpita.

Chaynolami pasashga Egipto naciuncho. Jehová egipcio runacunata chunca gueshyawan castigargan y luta diosnincunata ushacächishgan. Chayta ricar achca “mana Israel kaq runakunapis” israelitacunawan Egiptupita yargupäcurgan (Éx. 12:12, 37, 38). Jehová Moiseswan wilacushganta y cumplicushganta ricar paycuna Jehovata sirviyta munapäcurgan.

Pilapis Jehovata adurayta munarga manaraj luta religiuncuna ushacächishga captin acrashga cielupa aywajcunata yanapacunga. Chay runacuna uysha japuynomi caycanga (Mat. 25:34-36, 40). Jehovata sirviyta puedipäcunga manaraj Armagedón guerra galaycuptin. Chay guerra galaycuptin cay pachacho caycaj acrashga cajcuna cieluman aywacäringa.

Cay yachacuypita shumaj tantiarga yarpächimanchi Jehová alapa laquipäcoj y cuyapäcoj cashganta. Aumi, Jehová ‘shuyaraycan llapan runacuna arrepenticunantami. Payga manami munanchu pipis wañunanta’ (2 Ped. 3:9).