Ishcay wauguicuna acrashga cargan Jehovapa testiguncunata Pushaj cananpaj

2024 WATACHO 5 de octubre juc ali wilacuy cashga: hermanunchicuna Jody Jedele y Jacob Rumph nombrashga cargan Jehovapa testiguncunata Pushajcuna cananpaj. Paycuna achca watacunapa Jehovata mana jaguiypa sirvircaycan.

Jedele hermanunchi Misuri marcacho, Estados Unidos naciuncho yurishga. Taytancunashi wamralapita Jehovapita yachachergan. Paycuna tiyashgan sitiucho walcala hermanucuna cashga, chaymi chaycho predicananpaj may chay marcapita aywaj hermanucunata reguirgan. Jucnin jucnin cuyanacärishganta y juntula caycashganta ricar Jehovata sirviyta munargan, chaymi 15 de octubre 1983 watacho bautizacurgan. Pay runacunata Bibliapita yachachir cushishga caycargan, y estudiuncunata ushar precursor regularno Jehovata sirvir galaycurgan setiembre quilla 1989 watacho.

Taytancuna payta y panintapis wamralapita Betelman apaj. Chayman aywar paycuna munargan chaycho Jehovata sirvipäcunanpaj, y yarpashganno chaycho Jehovata sirvipäcurgan. Jedele hermanunchi 1990 wata setiembre quillacho Wallkill Betelcho sirvir galaycurgan. Betelcho caycar pichapacuycho arur galaycurgan y nircur hermanucunapa saludninta ricananpaj arurgan.

Chay wichan español rimaycho congregaciuncuna mirar galaycurgan y olgu hermanucunata nestapäcurgan. Jedele hermanunchi español congregaciunman aywargan y español rimayta yachacurgan. Ichic tiempo pasariptin juc hermana Dámaris jutiyoj precursorata reguirgan, tiempuwanga casaracärergan y juntula Betelcho Jehovata sirvir galaycärirgan.

2005 watacho Jedele hermanuga mamanta y warminpa taytancunata cuidananpaj Betelpita yargupäcurgan. Chay watacunacho precursor regularno Jehovata sirvipäcurgan y Jedele hermanuga Precursorcunapa Escuelanchopis yachachicojno yanapacurgan. Comité de Enlace con los Hospitales y Comité Regional de Construcción nishganchopis Jehovata sirvirgan.

2013 watacho yapay Betelcho arunanpaj invitapäcurgan Warwick localcunata sharcachiycho arupäcunanpaj, chaypita Patterson y Wallkill jutiyoj Betelcho arupäcurgan. Payga Departamento Local de Diseño y Construcción y Servicios de Información sobre Hospitales nishgancho Jehovata sirvirgan. 2023 wata marzo quillacho nergan Comité de Servicio nishgancho Jehovapa testiguncuna pushajcunata yanapacunanpaj. Imacunacho Jehovata sirvishganpita cayno nin: “Mushoj aruyta ruranayquipaj nishuptiqui öraga manchacunquimanchi. Chay hora Jehovaman yäracunayqui, payga mana puedishgayquita ruranayquipaj yanapäshunqui”.

Rumph hermanunchi California marcacho, Estados Unidos naciuncho yurishga. Hermanunchi wamrala caycaptin maman congregaciunpita carupacurgan, chayno captinpis calpachacurgan wamranta Jehovapita yachachinanpaj. Cada wata awilanta watucamoj aywaj, awilan Jehovata mana jaguiypa sirvej y Rumph hermanunchita yanapargan Jehovata cuyananpaj. Chaymi 13 watayojla caycar Bibliapita yachacur galaycurgan, y 27 de setiembre 1992 watacho mozularaj caycar bautizacurgan. Mamanpis yapay Jehovata sirvir galaycurgan y familiancunapis Jehovapita yachacur bautizacärirgan.

Mozularaj caycar Rumph hermanunchi precursorcunata cushishga caycashganta ricargan. Chaymi estudiuncunata usharirna, 1995 wata setiembre quillacho precursor regularno Jehovata sirvir galaycurgan. 2000 watacho Ecuador naciunman Jehovata sirvinanpaj aywargan. Chaycho Canadá naciunpita Inga jutiyoj precursorata reguirgan y tiempuwanna casacurgan. Casacurirna Ecuador naciunpita juc marcacho sirvipäcurgan, chaycho walca hermanucuna capäcurgan pero cananga juc congregaciunna caycan.

Tiempuwanna nipäcurgan precursor especialno Jehovata sirvipäcunanpaj y nircur congregaciunta watucamojno Jehovata sirvipäcurgan. 2011 watacho clase 132 Galaad Escuelaman aywananpaj invitargan. Chaypita nipäcurgan may chay naciunmanpis Jehovata sirvir aywananpaj, paycuna betelita, misionero y congregaciunta watucamoj car Jehovata sirvipäcurgan. Y Diospita Yachachicojcunapaj Escuelacho Rumph hermanunchi yachachicoj caycargan.

COVID-19 gueshyaraycu Estados Unidos naciunman cutipäcurgan y Wallkill Betelcho arunanpaj invitargan. Chaycho Rumph hermanunchita yachachergan Departamento de Servicio nishgancho arunanpaj. Nircur Ecuador Betelman aywananpaj nergan y Comité de Sucursal nishgancho sirvirgan. 2023 watacho Warwick Betelcho arunanpaj nergan y 2024 wata enero quillacho nergan Comité de Servicio nishgancho Jehovapa testiguncuna pushajcunata yanapacunanpaj. Jehovata sirvishganpita parlar Rumph hermanunchi nin: “Jehovata may chaycho sirviptinchi alimi caycan, pero más ali caycan hermanunchicunawan Jehovata sirvishganchi”.

Chay hermanunchicuna rurashgancunata alapa valuranchi y paycunata cuyanchi (Filip. 2:29).