Jehovata cäsucuy, Satanastaga mana

Lapanchicunami decidicunanchi Jehová yachachimashganchita cäsucuyta o Satanás lulacushgancunata cäsucuyta. ¡Jehovata cäsucunapaj ali decidirmi yachaj runa cashun!

Jehovaga imaypis alilatami ruran

Yachacushganchino demoniucunaga cushicärin runacunata engañar y fiyupa nacachirmi. Jehová ichanga pitapis nacachinanpaj yarpaylapis yarpanchu. Wamrancunata amatar cuyaj juc ali taytanomi Payga. Biblia nin ‘lapan alikunata chaskipäkushqantsiqa kamaq Taytantsipitami kaykan’ (Santiago 1:17). Payga imaycacunata noganchipaj rurashga, hasta japalan Wamrantapis cay Pachaman mandamush wanunanpaj (Efesios 2:4-7).

¿Imacunatataj Jesús rurargan cay Pachacho caycar? Mana rimajcunata, gapracunata y wishtucunatapis jampish; pï maytapis tucuy gueshyacunapita aliyächish. Taytanpa poderninwan wanojcunatapis cawarachimurgan (Mateo 9:32-35; 15:30, 31; Lucas 7:11-15).

Diosga rasunpa cajta imaypis parlan. Payga manami lulacunchu ni pitapis engañanchu (Números 23:19).

Mana alicunataga ama ruraychu

Imanomi juc chuspi pachcapa licanman ishquin chaynolami achca runacuna Satanaspa luta yachachicuynincunata creipäcun chaymi wanojcunata y demoniucunatapis manchacärin. Mal agüerucunata, brujucunata manchacur imatapis ruran cuidacunanpaj jina suertinpaj imatapis jaticärin. Ichanga Diospa sirvejnincunaga chaycunaman mana creinchichu.

Jehovaga Diablupita y supaycunapitapis más munayniyojmi caycan. Chaymi gam Jehovata sirviptiquega demoniucuna ima rurashgancunapis däñashunquichu (Santiago 4:7). Cayshi Nigeria naciuncho pasargan: Quimsa brujushi juc Jehovapa testigunta wanuchiyta munapäcurgan chay brujucunapa marcanpita aywacuyta mana munaptin. Wanuchiyta mana puedirna, jucnin caj brujo Jehovapa testigunta ruwacurgan “ama imatapis ruramaychu” nir.

Demoniucuna manchachishuptiquega Diosta jutinpa ruwacuy “Jehová” nir y payga chapayculäshunquimi (Proverbios 18:10). Chaypäga wasiquicho supaycunata gustashgancuna imalapis captenga cayaypa ushacächinquiman unay wichan Éfeso marcacho Diospa sirvejnincuna rurapäcushganno, paycunashi brüjucunan libruncunata rupachiypa ushacächergan (Hechos 19:19, 20). Diospa sirvejnincunaga manami charashwanchu supaycunapa imancunatapis; suertipa cajcuna, pulseracuna, walgacuna, fotucuna, brujucunapa libruncuna o imacunapis.

Dios munashganno caway

Diosta cushichiyta munarga, “mana alicunataga ruränachu” nir parlayla parlananchichu sinoga caycunatami ruranquiman:

Diospa sirvejnincunawan juntacuy

Cay Pachacho Satanaswan demoniucunapa gatirajnincuna canmi, paycunaga waquin runacunata yachachin munashganta rurapäcunanpaj. Jehová munashganno cawaj runacunapis caycanmi, paycunaga “Jehovapa testiguncunami” (Isaías 43:10). Cay Pachacho pusaj millonpitapis más testigucuna caycan. Paycunaga calpachacärin ali cajcunata rurapäcunanpaj y runacunata rasunpa cajta yachachipäcunanpaj. Reuniunnincunamanpis aywaptiquega cuyacuywanmi chasquishunqui.

Paycunaga waquin runacunata yanapan Diosta sirvinanpaj. Wasiquiman aywaycur Bibliawan yachachishunqui Dios munashganno cawacunayquipaj. Gratislami yachachishunqui. Jehovapa testiguncunaga Diosta cuyar y runa masincunatapis cuyarmi rasunpa cajta Bibliapita cushishga yachachicärin.