Tiempo chayamungami shumaj cawanapaj

Diabluwan demoniuncunaga runacunata manami engañanganachu. Cielupita cay Pachaman gargamushgana cashga (Apocalipsis 12:9). Pero ichiclachona Diosga Satanasta y demoniucunata ushacächenga. Apóstol Juan juc visiuncho Jehová ima ricachishganpita cayta escribergan: “Tsaynöpis rikarqä jana patsapita juk ángel uraykämuqta. Tsay angilmi wanwanyaykaq patsapa shiminpa llävin aptashqa y jatunkaray cadinan aptashqa urämurqan. Dragonta tsariykur waranqa (1,000) wata wataränanpaqmi watarqan. Tsay dragonmi diablu nishqan Satanás y unay culebra karqan. Wanwanyaykaq patsapa shiminpa qarpurirmi pitapis manana engañananpaq punkuta wichqarkur sëllarkurqan” (Apocalipsis 20:1-3). Nircurna Diabluga supaynincunawan chipyaypa ushacächishga canga (Apocalipsis 20:10).

Fiyu runacunatapis Tayta Dios ushacächinga (Salmo 37:9, 10; Lucas 13:5).

¡Wanushgacuna cawarimunga!

Satanasta demoniuncunata elgarcachirna, Jehovaga imayca bendiciuncunata runacunapaj apamunga. Ama gongaychu wanushgacunaga imatapis rurapäcunnachu. Wanuytaga Jesús tincuchergan punuywanmi (Juan 11:11-14). Chaytaga nergan tiempo chayamuptin punuycajno caycaj wanushgacunata ricchachimunanpaj captinmi. Paymi nergan: ‘Tiempu chayamunqami lapan wanushkuna kawarimunanpaq’ (Juan 5:28, 29; Hechos 24:15 textuwan tincuchiy).

Wanushgacunaga cay Pachachomi yapay cawapäcunga. ‘Juc runa wanush, juc warmi wanush’ pipis ninganachu; chaypa trucanga, ‘cuyashgä castä cawarimush’ nirmi runacuna wilanacärenga. Aumi, cushicuypaj wilacuycunala canga. ¡Mayraj cushicushun chay wichan castanchiwan yapay tincur shuntacaptinchi!