6 CAJ YACHACUY

¿Wanushgakuna sharkayämungachuraj?

1. ¿Wanuylawanku lapan ushakärin?

Kawarimoj Lázaro runa yapay tinkuykan Marta y María paninkunawan

Jesucristo kay Patsacho kaykaptinmi Betania markacho kawaj amigun Lázaro wanukuykurgan. Chay markaman Jesús chäriptinga chusku junajnami Lázaro pamparaykargan. Martawan y Mariawanmi pamparaykaj sitiuman aywayargan y chaychönami más runakuna chärirgan. ¡Mayraj Martawan María kushikuykuyargan turin Lázaro sharkamunganta rikar! Lei Juan 11:21-24, 38-44.

Wanushgakuna sharkayämunganga Bibliapa juk shumaj wilakuyninmi. Martaga yachakurgannami wanushgakunata sharkachimunampaj Jehová awnikushgampita. Lei Job 14:14, 15.

2. ¿Imataj pasan wanushgakunawan?

Adán kamashga kangan y wanungan — Diosmi Adanta nirgan: “Allpapitami rurasha cashcanquipis. Chaymi cashgan allpaman cutinquipaj.” (GÉNESIS 3:19)

Lapanchimi “allpapita” rurashga kanchi (Génesis 2:7; 3:19). Manami mana wanoj espirituyojchu kanchi. Cuerpuyoj y aychayoj karmi wanunchi y wanurishgaga manami imanchipis kawannachu. Tojshunchi ushakaptinga, yarpayninchipis ilakanmi. Wanushgakunaga manami imatapis mayayannachu. Chaymi Lazarupis sharkaramungan junajga wilakurganchu imapa pasangantapis. Lei Eclesiastés 9:5, 6, 10.

Wakinkunaga pensayan juk infiernucho wanushgakunata Diosninchi nakachingantami, pero chayga manami rasunchu. Rikashganchinöpis, wanushgakunaga manami imatapis mayayannachu. Chaymi, infiernupita lutan yachachikuyga Jehovatami ofendin, porque payga manami yarpaylapis yarpanchu pitapis ninacho rupachiyta. Lei Jeremías 7:31.

Cay videuta ricäriy: ¿Imataj pasan pipis wanuptin?

3. ¿Wanushgakunawan parlashwanku?

Wanushgakunaga manami parlanchu ni wiyampisnachu (Salmo 115:17). Chayno kaptimpis, kanmi wanushga runatukur wakinkunata parlapayta puedej demoniukuna (2 Pedro 2:4). Chaymi Jehovaga alapa chikin wanushgakunawan parlayta munashgaga. Lei Deuteronomio 18:10, 11.

4. ¿Pïkunataj sharkarayämunga?

Mushoj Patsacho juk kawarimushga runa Diospita yachakuykan. Y chaynölami paypis wakin sharkaykämojkunata yachaykächin.

Maychikaj runakunami Patsacho kawapäkunampaj sharkayämunga. Jehová Diosta mana reguejkuna y mana alita rurashga kajkunapis kawariyämungami. Lei Lucas 23:43, NM; y Hechos 24:15.

Kawariyämojkunaga Diospitami rasumpa kajta yachakuyanga, Jesusmanmi fe-ninta churayanga y wiyakoj kaytami yachakuyanga (Apocalipsis 20:11-13). Chaynöpami Patsacho imaykamayajpis kawakuyanga. Lei Juan 5:28, 29.

5. ¿Imatataj Jehovapita yachachimanchi wanushgakuna kawarimungan?

Lapanchita yarpamanganchita y kuyamanganchitami yachachimanchi. Kuyashga wamranta noganchiraykur mandamushga kaptinmi chay bendiciunta chaskishun. Y gamga, ¿pitataj chay junaj rikayta munankiman? Lei Juan 3:16 y Romanos 6:23.

Maslata yachakuyta munarga ¿Qué nos enseña la Biblia? nishgan librupa 6, 7 y 10 kaj capitulunkunata leiriy.