8 CAJ YACHACUY

¿Imanirtaj mayjina nakayta Diosninchi permitin?

1. ¿Imanötaj chay mana alikuna yurimurgan?

1. Michashga frutata Adán rikapaykan; 2. Achka mandakoj runakuna; 3. Guerracho wanuchinakaykärin — Runakuna gobernamunganwanga manami ni ima problemalapis ushakashgachu

Satanaspa punta kaj lulakuyninwanmi yurimurgan. Payga ali y juchaynaj angelmi kargan, pero “rasun cajtaga fiyupami chikish[g]a” (Juan 8:44). Kamakojninchi Dioslami adorashgaga kanan, pero Satanasga shongunchömi chay adoraciunta chaskiyta munapargan. Lulapayninwanmi Evata engañargan Diosta mana wiyakunampaj. Chaynölami Adanpis mana wiyakoj kayman tikrargan, y chayraykurmi nakaykunawan wanuy yurimurgan. Lei Génesis 3:1-6, 19.

Evata engañarirmi Satanasga Diospa contrancho churakargan. Jehová Diosla autoridadyoj kangantami mana kajpaj churarirgan. Satanasnölami wakin runakunapis Diospa autoridadninta mana kajpaj churariyashga, chaynöpami Satanasga “cay pachacho mandaj” kaykan. Lei Juan 14:30 y 1 Juan 5:19.

2. ¿Dios kamashgankunaga mana alinöku kargan?

Manami, porque Jehová kamashgankunataga manami imapis pishipanchu. Punta taytanchikuna y angelkunaga Diosta wiyakuytami puediyargan (Deuteronomio 32:4, 5). Diosmi kamamashkanchi ali kajta o mana ali kajta akrakunapaj. Y chay akranganchichömi Diosta kuyanganchita rikächikunchi. Lei Santiago 1:13-15, NM; y 1 Juan 5:3.

3. ¿Imanirtaj mayjina nakaykunata Dios permitishga?

Autoridadninta mana kajpaj churariyangantaga ichik tiempulapajmi Jehová permitishga. ¿Imanir? Juk gobernaj runa, runa masinkunata gobernaylatapis mana puedinganta musyakänampajmi (Eclesiastés 7:29; 8:9). Unay wichampitanami ni maygan gobiernupis ushakächiyta puedishgachu mana alikunata, guerrakunata ni gueshyakunatapis. Lei Jeremías 10:23 y Romanos 9:17.

Diosninchi gobernamänanchita munashgaga tukuy bendiciunkunatami chaskishun (Isaías 48:17, 18). Ichiklachönami Diosga ushakärachinga lapan gobiernukunata, y Patsachöga kawapäkunga gobiernunta defiendejkunalami (Isaías 11:9). Lei Daniel 2:44.

Cay videuta ricäriy: ¿Imanirtaj nacayta Dios ushacächinrächu?

4. ¿Dios pacienciakoj kanganga yanapämanchiku?

Satanasmi nirgan runakunaga Diosta sirviyan Pay bendiciptinla. Dios pacienciakoj kaptinmi kawayninchicho rikächikunchi Diablo lulakoj kanganta, y imapitapis masga Diospa gobiernuntami yanapakunchi. Lei Job 1:8-12 y Proverbios 27:11.

5. ¿Imatataj rurashwan Dios chaskimänanchipaj?

Bibliata runakuna estudiapäkuyka — Kikinchipitami kanga Dios gobernamanata munanganchiga

Paytami munashganno adorananchi, y Bibliata respetaj rasumpa kaj religiunchömi kananchi (Juan 4:23). Jina Satanaspa gobiernuntami mana kajpaj churarishun Jesusnöla politicaman ni guerrakunaman mana jatikashgaga. Lei Juan 17:14.

Satanasga imaykatami ruran runakuna mana aliman jegarpuyänampaj. Chay lapan mana aliku-nata mana rurashgaga, hasta familianchikuna y amigunchikunami asipamäshun y chikipamäshun (1 Pedro 4:3, 4). Chaypa pasarga Diosta kuyaj runakunawan shuntakay y leyninkunata wiyakur siguiy. Chaynöpami nishun Satanás rasumpa lula o kaski kanganta. Lei 1 Corintios 6:9, 10 y 15:33.

Kuyamarninchimi Diosga ushakächinga lapan nakaykunata. Dioswan kaykajkunaga Patsachömi imaykamapis kawapäkunga. Lei Juan 3:16.

Maslata yachakuyta munarga ¿Qué nos enseña la Biblia? nishgan librupa 11 kaj capitulunta leiriy.