17 CAJ YACHACUY
¿Ima nishwantaj Jesuspita?
Cay Pachacho caycar ima rurashganpita y parlashganpita yachacurga mastami payta y Taytan Jehovata cuyashun. ¿Imano runataj payga cargan? ¿Y imatataj rurashwan paynola canapaj?
1. ¿Ima nishwantaj Jesús Taytannola cashganpita?
Cieluchoga maychicaj watacunapami Jesusga cuyacoj Taytan Jehovapita yachacuycarla caycashga; chaymi imatapis rurar o yarpar Taytan rurashgannola caycan (leiriy Juan 5:19). Juc cutichomi Jesús cayno nergan: “Nogata ricamagcäga Taytätapis ricashanam” (Juan 14:9 Ambo-Pasco Biblia). Chauraga Jesusta reguinapaj calpachacuptinchega masraj Jehovata reguishun. Jesusga pï maytapis laquipajmi; cayga tantiachimanchi Jehovapis gamta laquipäshushgayquita.
2. ¿Imatataj Jesús rurargan Taytanta cuyashpan?
Jesús nergan: “Chaynöpami llapanpis musyanga Taytä nimashannölla rurashäta” (Juan 14:31). Taytanta amatar cuyarmi cay Pachacho cashgan wichan imaycacunapa pasarpis cäsucuycarla cawacurgan. Jehovapitaga cushi cushilami parlapacoj y waquincunatapis yanapajmi Diosman guelicärinanpaj (Juan 14:23).
3. ¿Imatataj Jesús rurargan runacunata cuyashganraycur?
Jesusga pï maytapis cuyapajmi; “runacunata ricarmi cushicurgä” nergan pay (Proverbios 8:31). Chayno cuyacoj cashganga ricacämurgan pitapis ali shongulanwan yanaparmi. Milagrucunataga manami poderniyoj cashganraycurlachu ruraj, sinoga laquipäcoj cashganraycurpis (Marcos 1:40-42). Pï maytapis cuyapaylapami tratargan, parlarpis shacyächiylapa parlacaramoj. Noganchiraycur nacar wanunanpaj captinpis listo caycargan. Y payta respetar cäsucojcunataga masraj cuyan (leiriy Juan 15:13, 14).
SHUMAJ YACHACURCUNAPAJ
Jesús imano cashganpita masla yachacurcushun, mä imanotaj cuyacoj cashgannola cashwan.
4. Jesusga Taytantami cuyan
Imacunata rurashganchopis Diosta imano cuyanapämi Jesús yachachimashcanchi. Leipäcuy Lucas 6:12, jina Juan 15:10 y 17:26. Jucnin jucninta leircur caypita parlapacäriy:
Jesús rurashgancunaman yarpar, ¿imacunata rurartaj Diosta cuyashganchi ricacämunman?
Jesusga taytanta alapa cuyajmi, chaymi cutin cutin payta mañacoj.
5. Jesusga ‘yanapayculäshayqui’ ninmi
Quiquilanpaj yarpachacunanpaj trucanga Jesusga waquincunapaj más yarpachacoj. Uticashga caycarpis, jamaräcojchu, jucla pitapis yanapaycoj. Leipäcuy Marcos 6:30-44 y caycunapita parlapacäriy:
Texto wilacushganno, ¿imatataj ali shongulanwan Jesús rurargan? (31, 34, 41 y 42 versiculucunata ricäriy).
¿Imanir-raj chay runacunata Jesús yanapargan? (34 caj versiculuta ricäriy).
Taytannola amatar cuyapäcoj Jesús captenga, ¿ima nishwantaj quiquin Jehovapita?
¿Jesús rurashgannola imanotaj noganchipis waquincunata yanapashwan?
6. Jesusga pï maywanpis ali shongu cargan
Imaycayoj mana carpis, Jesusga waquincunata imalantapis goycojmi. Paynola canapaj calpachacushun. Leipäcuy Hechos 20:35 y caypita parlapacäriy:
Jesús nishganno, ¿imata ruraptinchirätaj cushishgala cawacunchi?
VIDEUTA ricapäcuy y caypita parlapacäriy:
¿Imaycayoj mana carpis imanotaj yanapacoj runa cashwan?
¿Mayashcanquichu?
Bibliaga yachachicun Diosta mañacurga Jesuspa jutincho ruranapaj (leiriy Juan 16:23, 24). Chayno jutincho mañacurga Jesustami agradecicuycanchi, payga imaycata rurash Jehová chasquimänanchipaj.
WAQUINCUNA NIPÄCUN: “Ima nacaycunapa pasaptëga Diosmi pruebaman churaycäman”.
Taytannola Jesús cuyacoj caycaptenga, ¿imanirtaj nishwan Jehovaga pitapis pruebaman mana churashganta?
ICHIC YACHACUY
Taytan Jehovatapis cuyan, runacunatapis cuyanmi Jesusga. Alichi canman Jehovata reguinapäga Jesuspita masraj yachacuptinchi.
Yarpänapaj
Jesusnola canapaj calpachacurga, ¿imacunata rurartaj Jehovata cuyashganchi ricacämunga?
Jesusnola canapaj calpachacurga, ¿imacunata rurartaj runa masinchita cuyashganchi ricacämunga?
¿Jesús imano cashganman yarpartaj ‘nogapis paynola cäman’ ninquiman?
MASLATA YACHACUNAYQUIPAJ
Jesús imano cashganpita yachacuy.
“Jesús cashgannola cashun” (Jesús: el camino, la verdad y la vida, 317 caj página)
Jesuspa jutincho imanir Diosta mañacunapaj yachacuy.
“¿Imanirtaj Jesuspa jutincho mañacunayqui?” (Wilacamoj, 1 febrero quilla, 2008)
¿Bibliaga wilacunchuraj Jesuspa cuerpun imano cashganpita?
“¿Imano cuerpuyojraj Jesús cargan?” (jw.org paginapita yachachicuy)
¿Imatataj yachacunchi warmicunata Jesús imano ricashganpita?
“Diosga warmicunata valuranmi” (Wilacamoj, 1 setiembre quilla, 2012)