28 CAJ YACHACUY
Jehovawan Jesús rurashgancunaga mana gonganapämi
Amiguyqui juc regaluta goycushuptiquega ¿imanotaj ricacunqui? Alapa cushishgachi ¿au? Ima regalutapis manami jucla gongarinchichu. Chaynolami Jehovawan Jesuspis lapan runacunapaj juc regalo japuyta camacächishga. Ima regalupitapis imaraj más valoryoj canman salvamänanchipaj Jesús cawayninta entregashgan. Chaypitaga alapachi agradecicushwan.
1. Jehovawan Jesús rurashgancunataga, ¿imata rurartaj agradecicushwan?
Bibliaga clarumi wilacun Jesusman “pipis yäracoj cäga” imaypis mana wanunanpaj (Juan 3:16). ¿Imata rurar-taj Jesusman yäracunchi? Manami ‘payman criyë’ nirlachu, sinoga Dios munashganno imano cawacushganchiwanmi (Santiago 2:17). Rurashganchichopis parlashganchichopis yäracoj cashganchimi ricacämunman, chaynopami Jehovawan y Jesuswan cuyachicushun (leiriy Juan 14:21).
2. ¿Imataj watan watan ruracan Jehovawan Jesús rurashganta agradecicunapaj?
Wanunanpäna caycarmi gatejnincunata Jesús mandargan wanushgan junajta mana gongapäcunanpaj. Chay chacaycho ima ruracashganpita Biblia nin “Cena del Señor” cashganta; o Jesús wanushganta Yarpänapaj junaj nirpis gayanchimi (1 Corintios 11:20). Jesús camacachishgantaga unaypis cananpis yarpänapämi cargan. ¡Piraj gongaycunman noganchiraycur wanushgantaga! Chay mandatutaga quiquin Jesusmi gorgan cayno nir: “Chayno ruranqui gamcunaraycu wañuchimashanta yarpänayquipaj” (Lucas 22:19). Jesús wanushganta yarpänapaj reuniunman aywaptiquega Jehovawan Jesús cuyashushgayquitami agradecicuycanqui.
SHUMAJ YACHACURCUNAPAJ
Yachacushun imacuna mastaj rurashwan Jehovawan Jesús rurashganta valuranapaj. Jina yachacushun imanirtaj gongashwanchu Jesús wanushganta.
3. Agradecido runa carga, ¿imataraj rurashwan?
Mayu apaycäshuptiqui pilapis salvashuptiquega, upälala cacunayquipa trucanga agradeciduchi ricacunquiman chay runawan ¿au? ¿Y imacuna rurartaj agradecicunquimanpis?
Lapanchipäpis salvacojninchega Jehovami. Leipäcuy 1 Juan 4:8-10 y caycunapita parlapacäriy:
¿Imanirtaj Jesús wanushganga imaypis mana gonganapaj canman?
¿Imanotaj ricacunqui ima aycatapis Jehovawan Jesús gamraycur rurashganpita?
¿Imacunata rurashganchichotaj ricacämunga Jehovawan Jesús rurashganta valurashganchita? Leipäcuy 2 Corintios 5:15; 1 Juan 4:11 y 5:3. Nircur caypita parlapacäriy:
Chauraga ¿imanotaj agradecido runa cashganchi ricacämunman?
4. Jesusno canapaj calpachacushun
Agradecido runapis canchi Jesusnola canapaj calpachacurmi. Leipäcuy 1 Pedro 2:21 y caypita parlapacäriy:
¿Imacunata rurartaj cawayniquicho gampis calpachacunquiman Jesusta gatinayquipaj?
Jesusga taytanpa Palabranta cuyaj chaymi cadala liej, runacunatapis yachachej y nacaycajcunatapis yanapaj.
5. Jesús wanushganta Yarpänapaj reuniunman aywashun
Cena del Señor nishgancho gatejnincunawan Jesús juntacar ima pasashganta musyanapaj, leipäcuy Lucas 22:14, 19, 20. Nircur caypita parlapacäriy:
¿Imataj pasargan gatejnincunawan Jesús juntacashgan chacay?
¿Imanotaj tantiashwan tantapis vinupis ima cashganta? (19 y 20 versiculucunata ricäriy).
Jesusga munarganmi gatejnincuna pay wanushgan junajta yarpapäcunanpaj, chayga cada watacho juc cuti ruracänan cargan. Chaymi Jehovapa testiguncunaga watan watan Jesús camacächishgannola juntacanchi. Juntacashganchi chacay imano cashganta musyanayquipaj juc VIDEUTA ricapäcuy. Nircur caypita parlapacäriy:
Jesuspa wanuyninta Yarpänapaj reuniunga, ¿imanotaj ruracan?
Tantapaj parlarga, Jesuspa juchaynaj cuerpunpämi parlaycanchi. Vinupaj parlarna, jichashgan yawarninpaj parlaycanchi.
WAQUINCUNA NIPÄCUN: “Jesuslaman creishunga, ima mastapis rurashwannachu”.
¿Chauraga creiylachu creinanchi o ima mastataj rurashwan?, ¿imanotaj tantiachicunquiman Juan 3:16 y Santiago 2:17 textucunata?
ICHIC YACHACUY
Agradecido runaga canchi Jesús lapan rurashganman yäracurmi y pay wanushgan junajta Yarpänapaj reuniunman aywarpis.
Yarpänapaj
¿Imacunata rurartaj Jesusman yäracunchi?
¿Imanopataj agradecicunquiman Jehovawan Jesús gamraycur lapan rurashganta?
¿Imanirtaj mana gongaylapa Jesuspa wanuyninta Yarpänapaj reuniunman aywashwan?
MASLATA YACHACUNAYQUIPAJ
Jesús wanushganpitaga maslata yachacurcuy.
Yäracoj runa carga, ¿imatataj rurashwan?
“Jehovapa promesancunaman yäracuycäshun” (Wilacamoj, octubre, 2016)
Yachacuy imano juc warmita, Jesús noganchiraycur wanushganta yachacushgan yanapargan vidanta cambiananpaj.
“Biblia yanapargan cambiananpaj” (Wilacamoj, 1 agosto quilla, 2011)
Yachacuy imanirtaj Conmemoraciuncho walcajcunala tantata micupäcun y vinutapis upupäcun.