36 CAJ YACHACUY
Imatapis pacapaylapaga rurashwanchu
Ali cajlata rurarga y rasun cajlata parlarga alapa alimi, Jehovapis mayraj cushicun chayno runa captinchi. Cay mana ali munducho runacunaga engañanacärirmi pacapaylapa imatapis ruran; chauraga ‘cay munducho honrado runa canapaj sasami’ ¿nirnachuraj calpachacushunnachu ali cajcunata ruranapaj? Mä yachacushun chaypita.
1. ¿Imanirtaj piwanpis engañacoj cashwanchu?
Engañacoj runa mana carga Jehovatami rasunpa cuyaycanchi y waquincunatapis respetaycanchi. Diosninchitaga imatapis pacapashwanchu, ima yarpashganchitapis pay musyanmi (Hebreos 4:13). Alicunalata ruranapaj calpachacurga cuyapämäshunmi. Biblia cayno nin: “Fiyu runacunataga TAYTA DIOS ricaytapis manami munanchu. Ali shongu runacunatami ichanga cuyan” (Proverbios 3:32).
2. ¿Rasun cajlata parlashganchega ratulapächu canman?
Cayta cäsucunanchitami Jehová munan: “Jucniqui-jucniqui rasun cajllata parlay” (Zacarías 8:16, 17). Chaymi pitapis lulapashwanchu. Hermanunchicunawan o waquin runacunawan caycarpis rasun cajlatami parlashwan. Laquicuypächi canman engañacoj o suwacoj runaman ticrarga (leiriy Proverbios 24:28 y Efesios 4:28). Imapis paganapaj captenga pagashwanmi (Romanos 13:5-7). Imata rurarpis, Diosga “shongöcunatapis musyaraycanmi” nishwan (Hebreos 13:18).
3. ¿Imanoraj goyäcushun engañacoj runa mana carga?
Engañacoj runa mana carga, pipis manami nimäshunchu ‘chay runaga manami confiacuypächu’. Congregaciunchopis juc castanola caycar jaucala goyäcushun. Conciencianchipis ali ricacunga. Jina imano runa cashganchipitami waquincunapis Diosta sirviyta munapäcunga y “Jesucristupa willacuynin alli cashanta[pis] runacuna tantiyaconga” (Tito 2:10).
SHUMAJ YACHACURCUNAPAJ
Yachacushun Jehovata rasunpa cuyarga pï maytapis engañashwanchu y imanotaj honrado cashwan caway vidanchicho.
4. ¡Mayraj Jehová cushicun rasun cajlata parlaptinchi!
Leipäcuy Salmo 44:21 y Malaquías 3:16 y caycunapita parlapacäriy:
¿Imalatapis pacapashwanchuraj Diosninchita? ¿Imanirtaj chayta ninqui?
Piwan caycarpis, maycho caycarpis rasun cajlata parlarga, ¿imanoraj Jehová ricacunga?
Wamracuna mana lulacuptenga taytancunatami cushichin. Chaynola noganchipis rasun cajlata parlarga, Jehovatami cushichinchi.
5. Rasun cajlata imaypis parlashwan
Waquincunaga nipäcun ‘öraga alimi caycan imatapis pacapaylapa ruraptinchi’, ¿alichuraj chayga? Manami. Mä yachacushun imanotaj cawayninchicho ali cajlata rurar y rasun cajlata parlar caycashwan. VIDEUTA ricapäcuy.
Leipäcuy Hebreos 13:18 y parlapacäriy imanotaj pitapis engañashwanchu...
... familianchiwan caycar.
... trabajucho o escuelacho caycar.
... maycho caycar y piwan caycarpis.
6. Confiacuypaj runa carga ali goyäcushun
Honrado runa cashganchiraycur öraga ima problemamanpis chayashwan. Pero ali rurashgayquega jaucalami cawachishunqui. Leipäcuy Salmo 34:12-16 y caycunapita parlapacäriy:
¿Imanoraj cawayninchi más shumajraj canman?
Casado vidacho ishcancuna yäracuypaj canman.
Pipis aruynincho honrado captin, patronnincunapis yäracunga paycunaman.
Imacunachopis honrado captinchega autoridäcunapis respetamäshunmi.
WAQUINCUNA NIPÄCUN: “Imalachopis lulacuptëga pipis cuentata gocunchu”.
¿Imataraj Jehová nin imalachopis lulacuycarga? ¿Imanirtaj chayno yarpanqui?
ICHIC YACHACUY
Jehovaga munan amiguncuna ali cajcunata rurapäcunanta y rasun cajlata parlapäcunanta.
Yarpänapaj
¿Cawayninchicho imacunachotaj ali cajlata rurar y rasun cajlata parlar caycashwan?
¿Imanirtaj yarpashwanchu ‘pitapis engañaptë Jehová cuentata gocungachu’ nir?
¿Imanirtaj imaypis rasun cajlata parlanquiman?
MASLATA YACHACUNAYQUIPAJ
¿Imanotaj taytacuna wamrancunata yanapanman rasun cajlata parlapäcunanpaj?
¿Ima bendiciuntaraj tarenga aunishgancunata cumplejcuna?
Impuestucunata paganapaj captenga, ¿paganquimanchuraj?
“Impuestos nishgancunataga, ¿pagashwanchuraj?” (Wilacamoj, 1 setiembre quilla, 2011)
¿Imanotaj juc suwacoj runa, honrado runaman ticrargan?
“Yachacurgä cuyacoj y perdunacoj Jehová cashganta” (Wilacamoj, 1 mayo quilla, 2015)