¿Ima tragutapis cristianucuna upunmanchuraj?

Runacunaga imaycata nipäcun tragupita parlar. Waquincunaga öra örala amiguncunawan ichiclata upupäcun. Waquincunana maliylatapis munapäcunchu y juccunaga upyalacho cacärin. Y cristianucunaga, ¿ima tragulatapis upupäcunmanchuraj?

1. ¿Alichuraj caycan ima tragulatapis upurga?

Bibliaga manami ninchu ima tragulatapis upurga mana ali cashganta. Ichanga “bïnunami runataga cushicachin” ninmi Diospa Palabran (Salmo 104:14, 15). Jina parlamun unaycho Diosta sirvej warmicuna olgucuna vinuta upupäcushganta (1 Timoteo 5:23).

2. Pipis upuptenga ¿Biblia ima nishganmantaj yarpachacunman?

Pipis shincatacashgancama upyaptenga Diosninchipäga mana alimi caycan (Gálatas 5:21). Bibliaga mandacun “upyaj runacunawan ama goturanquichu” nir (Proverbios 23:20). Chauraga, japalanchi o piwanpis caycarga ima tragulatapis upuyta munarga, manachi upushunchu shincashgano puricachashganchicama o mana ali juiciunchiwan imatapis parlacachashganchicama. Öraga cadala upushganchiraycur ima gueshyalatapis tarishwanchi. Controlacuyta mana puederga alichi canman yawaylatapis mana yawanapaj.

3. ¿Pitapis nishwanchuraj upunanpaj o mana upunanpäpis?

Traguta upunapaj o mana upunapäpis quiquinchipitami canga. Maygan cristianutapis niycashwanchu imanir upushganta. Ni pitapis munapächishwanchu ‘ichiclatapis upurcuy’ nir (Romanos 14:10). Y öraga alimi canman waquincunata respetashganchiraycur naupancho mana upunapaj (leiriy Romanos 14:21). Bibliapis shumaj wilacun “waquinpis alli goyänanpaj yarpanquiman” nir (leiriy 1 Corintios 10:23, 24).

SHUMAJ YACHACURCUNAPAJ

4. Upunayquipaj o manapis quiquiquipitami

¿Ima nirganraj Jesús traguta upunapaj o manapis? Mä chayta musyanapaj yachacushun naupa caj milagrunpita. Leipäcuy Juan 2:1-11 y caycunapita parlapacäriy:

• ¿Jesusga chay milagruta ruranmanchuraj cargan traguta ni mana maliycunalapäpis captenga?

• Jesusga pitapis micharganchu traguta upunanpaj, ¿chauraga maygan cristiano masinchi upuptenga jamurpashwanchuraj?

Juc cristiano traguta upunanpaj captenga ali juiciunwanrächi chayta ruranga. Leipäcuy Proverbios 22:3 y yachacäriy imacuna captintaj, pipis traguta upunanpaj shumajraj yarpachacunan:

• Carruta o tracturta pipis manejananpaj caycaptin.

• Maygan warmipis gueshyaj caycaptin.

• Pitapis capaz juc doctor nishga mana upunanpaj.

• Pipis traguta upur controlacuyta mana puediptin.

• Ichanga autoridäcuna mandacunman pipis mana upunanpaj.

• Manachi pitapis ‘¡upushun, upushun!’ nishwanchu unaycho upyaj runa cashganraycur canan upuyta mana munaptenga.

¿Casaracuy fiestacho traguta invitashwanchuraj lapan chaycho caycajcunata? Imacunamanraj yarpachacunapaj VIDEUTA ricapäcuy.

VIDEO: ¿Traguta sirvishwanchuraj? (2:41)

Leipäcuy Romanos 13:13 y 1 Corintios 10:31, 32. Cay textucunata leipäcuy y chaypita parlapacäriy:

• Chauraga Biblia chayno niptenga ¿imano runa canapätaj yanapämanchi?

5. Achcata o ichiclata upunayquipaj yarpachacuyraj

‘Öra öraga upömi’ niptiquega alimi, pero yarpachacuy, pajta upyalaman churacäcunquiman, Jehovapäga pasaypa mana alimi chayga. ¿Imanirtaj chayta ninchi? Leipäcuy Oseas 4:11, 18 y caycunapita parlapacäriy:

• ¿Imaraj pasanman pipis shincatacashgancama upuptenga?

¿Imaraj yanapämäshun upuycashganchi hora ‘chaylapäna’ ninapaj? Ali juiciuyoj runa carga musyashunmi aycata upunapaj. Leipäcuy Proverbios 11:2 y caypita parlapacäriy:

• ¿Imanirtaj ali yarpachacurcur mayna musyashwan ayca traguta upunapaj?

6. Chay viciutaga jaguiriyta puedinquimi

VIDEO: “Cawaynëga pasaypa mana ali cargan” (6:32)

• ¿Imano runamantaj Dimitri ticrargan upyalacho cacur?

• ¿Juclachu chay viciuntaga jaguirergan?

• ¿Imata rurartaj trago viciunman yarpaylapis yarpargannachu?

Leipäcuy 1 Corintios 6:10, 11 y caycunapita parlapacäriy:

• ¿Pasaypa mana alichu upyalacho cacurga? ¿Imanir?

• Pipis upyalacho cacushga captinpis, ¿cambiayta puedinmanchuraj?

Leipäcuy Mateo 5:30 y caypita parlapacäriy:

• Maquinchita rogurinapaj Jesús niptenga, parlaycargan alapa calpachacunanchipaj Diospa aprobaciunninta chasquinapaj. Gampis trago viciuta jaguiyta munarga, ¿imataraj ruranquiman?a

Leipäcuy 1 Corintios 15:33 y caypita parlapacäriy:

• ¿Yanapäshunquimanchuraj upyalaman yarpaj runacunawan juntacarga?

ICHIC YACHACUY

Jehovaga manami michämanchichu trago upuyta. Ichanga mana munanchu upyalacho jatiracunanchita o cada cadala upunanchita.

Yarpänapaj

• ¿Ima nintaj Biblia trago upuypita?

• ¿Shincashganchicama upuptinchega imaraj pasamashwan?

• ¿Pipis ichiclatapis upuyta mana munaptenga ‘¡upuy, upuy!’ nishwanchuraj?

MASLATA YACHACUNAYQUIPAJ

¿Imacunamantaj yarpachacunman jovencuna traguta manaraj upur?

Pengacuypaj cacuychu (2:31)

¿Imataraj ruranquiman upyalacho mana cacunayquipaj?

“Cuidacuy upyalacho mana cacunayquipaj” (Wilacamoj, 1 enero quilla, 2010)

¿Alichuraj cristianucunaga ‘salud’ nir vasunta jogarcuptin?

“Liejcuna tapucärishgan” (Wilacamoj, 15 febrero quilla, 2007)

Yachacuy imanotaj juc runa upyayta jaguirgan “Tragutaga aycatapis upucoj cämi”, nir wilacushgancho.

“Biblia yanapargan cambiananpaj” (Wilacamoj, 1 mayo quilla, 2012)