52 CAJ YACHACUY
¿Imanirtaj ali visticushwan?
Lapanchimi gustamashganchino visticuyta munanchi. Bibliaga parlamunmi imano visticunapaj; cäsucurga Taytalanchi Diosta cushichishun. Mä caypita maslata tantiarcushun.
1. ¿Imano visticunapätaj Biblia nimanchi?
Cristianucunaga “jamurpaypaj röpacunataga” mana jaticärinmanchu. Ima jaticushganchicunaga “Dios munashganno” limpio canman (1 Timoteo 2:9, 10). Chayno Biblia nishganpitaga mastaraj yachacunapaj caycan: 1) ropanchicunaga “camarajla” canman. Chaytaga ricanchi asambleanchicunaman y reuniunninchicunaman aywar; hermanunchicunaga ali visticur, ali najchacur Diosta adurapäcun. 2) Imano visticushganchega “jamurpaypaj” canmanchu; waquincunaga cuerpunta ricächicunalanpaj imayca ropacunata jaticärin. 3) Cada cadalami ima ropacunapis tiendacunacho yargaycämun, chaymi ali ‘yarpachacurcur-raj’ acrananchi. 4) Waran waran visticushganchega “Dios munashganno” canman, chayno captinrämi waquincunapis reguimäshun Diospa sirvejnincuna cashganchita (1 Corintios 10:31).
2. ¿Imano visticushganchega alichuraj hermanunchicunapaj?
Imano visticunapaj quiquinchipita captinpis alichi canman waquincunamanpis yarpachacuptinchi, pajta visticushganchega paycunapaj mana alino caycanman. Chaypita Biblia cayno nin: “Imatapis rurashun chay yäracoj-masinchi Tayta Diosninchïman mas yäracunanpaj” (leiriy Romanos 15:1, 2).
3. ¿Ali visticushgaga waquinpis Jehovata reguiyta munangachuraj?
May chaypa aywarpis alimi visticunchi. ¿Manacu shumajraj visticunchi reuniunninchipaj o predicaciunman yargunapäpis? Imaraj canman predicaycashganchi hora ropanchipita runacuna jamurpämaptinchi. Imano visticushganchega shumajyächinmanmi ‘Diosninchipa yachachicuyninta’ (Tito 2:10, Ambo-Pasco Biblia).
SHUMAJ YACHACURCUNAPAJ
Yachacushun imanotaj cristianucunaga ali visticärinman may chaycho caycarpis.
Imano visticushganchichomi ricacämunga autoridäcunata respetashganchita o mana. Jehovaga shongunchita más ricaptinpis, visticushganchiwanmi ricächishwan respetashganchita.
4. Imano visticushganchiwanga Jehovatami respetaycanchi
¿Imaraycurtaj aliraj yarpachacunanchi imano visticunapaj? Leipäcuy Apocalipsis 4:11 y caycunapita parlapacäriy:
Dioslapaj cawaycarga, ¿imanotaj jatirashganchi ropa caycanman?
Reuniunmanpis o predicaciunmanpis yargunapaj caycarga, ¿alichuraj canman shumajraj yarpachacuptinchi ima ropata jaticunapaj? ¿Imanirtaj chayta ninqui?
5. Ima ropata jaticunapäpis yarpachacunanchirämi
Ropanchicunaga jirashgala captinpis, limpio y camarajla caycanman. Leipäcuy 1 Corintios 10:24 y 1 Timoteo 2:9, 10. Nircur parlapacäriy imanirtaj cayno visticunanchichu:
... ganratacashga y rachishga ropacunawan.
... cuerpunchi más ricacänanpaj juc ishcay ropacunalawan.
Unay Israel marcapaj guelgacämushga Ley, canan wichan cristianucunapaj manana captinpis, yachachimanchimi Jehová ima yarpashganta. Leipäcuy Deuteronomio 22:5 y caypita parlapacäriy:
¿Imanirtaj mana ali canman juc olgu, warmino visticuptin; o juc warmipis, olguno visticuptin?
Leipäcuy 1 Corintios 10:32, 33 y 1 Juan 2:15, 16 y caycunapita parlapacäriy:
Tiyashganchicho o jinan congregaciunchopis imano visticushganchi waquincunapaj mana alino caycaptenga, ¿imataraj rurashwan? ¿Imanirtaj chayta rurashwan?
¿Cawashgayqui marcacho imanotaj runacuna visticärin?
¿Maygan cristianupis munapanmanchuraj mundo runacunano waquin visticuyta? ¿Imanirtaj chayta ninqui?
Gustamashganchino visticurpis, Jehovataga cushichishwanmi.
WAQUINCUNA NIPÄCUN: “Imano visticushgäga quiquïpita caycan”.
¿Ima ninquitaj chayno nejcunapita? ¿Imanir?
ICHIC YACHACUY
Ali yarpachacurcur ima ropatapis acrarga y shumaj visticurga Jehovatami y waquincunatapis respetaycanchi.
Yarpänapaj
¿Imanirtaj Jehovaga munan maycho caycarpis ali visticunapaj?
¿Bibliacho ima mandätucunataj caycan jaticushganchi ropa imano cananpaj?
Imano visticushganchega, ¿yanapanmanchuraj waquincunapis Diosta sirviyta munananpaj? ¿Imanoraj chayga canman?
MASLATA YACHACUNAYQUIPAJ
Cuentata gocuy imano visticushgayquipita.
Yachacuy imanirtaj pilapis aliraj yarpachacunman tatuaje nishganta manaraj ruracur.
“¿Alichuraj caycan tatuaje nishganta ruracuptë?” (jw.org paginapita yachachicuy)
Biblia nishganpita yachacuy, yanapäshunquimi imatapis ali acranayquipaj.
“Diosninchi alabashga cananpämi visticunchi” (Wilacamoj, setiembre 2016)
Yachacuy imanotaj juc warmi imano visticunapaj cajpita alina yarpar galaycurgan.