Cananga waquincunata yanapanäpaj munaycö

UNAY CAWAYNË:

Acul marcacho yurishcä, chayga Guatemala naciunpita más caruchoraj caycan. Familiäga ixiles nishgan casta runacunapita shamun, paycunaga maya nishgan runacuna capäcun. Castäcunapa rimayninta yachacurgä y castellanutapis parlä. Guatemala naciuncho guerracuna cashgan wichan winargä, chay wichanga achca ixiles nishgan runacuna wanupäcurgan.

Chusco watayoj caycaptë, wawguë puclaycargan bombawan, chaurasga pashtarcuptinga pay wanurgan y nogana nawïta ograshcä, payga ganchis watayoj caycargan. Chaypita apamargan juc escuelaman braille yachacunäpaj Guatemala ciudächo, chay escuela cargan lapan nawinta ograshga cajcunapaj. Chaycho michämargan waquin wamracunawan parlarcunäpaj y estudiaj masëcunapis manami parlapämajchu. Manami tantiargächu imanir chayno tratamashganta. Imaypis japalä cacurgä, shuyaraycargä quillacuna rasla pasananpaj mamanëwan tincunäpaj y marcäman aywacunäpaj; payga alapami cuyamargan. Pero chayga ratulapämi cargan, 10 watayoj caycaptë mamanë wanurgan. Chayga pasaypami laquichimargan, japalä quedacurgä.

11 watayoj caycarmi marcäpa cuticamurgä hermanastrüpa familianwan tiyanäpaj. Paycuna ali uywamargan, pero manami cushishga cayta puedirgächu. Öraga Diosta cayno nej cä: “¿Imanirtaj mamanë wanurgan? ¿Imanirtaj nawïta ograshcä?”. Runacuna nipäcamargan Dios munashga chaycuna pasamänanpaj. Chaymi yarpar galaycurgä Dios fiyu canganta, y cawaytapis munargänachu.

Nawïta ograshgäpita laquicuycarla cawaj cä, nitipacashgano sienticoj cä. Nircur wamralaraj caycaptë achca cuticho viulamargan, manami denunciargächu pasamashganta, imapis gocamarganchu. Runacunapis parlapämajchu, imaypis laquishgala cacurgä y waquin runacunawan parlacuytapis manchacurgämi.

BIBLIA YANAPAMARGAN CAMBIANÄPAJ:

13 watayoj caycaptë, juc matrimonio Jehovapa testiguncuna escueläman shapäcamurgan Bibliapita parlapäcamänanpaj recreucho, juc profesora laquipamar paycunata nirgan watucamänanpaj. Paycuna nipäcamargan Biblia awnicun nawinta ograshga cajcuna yapay ricänanpaj y wanushgacunapis cawarimunanpaj (Isaías 35:5; Juan 5:28, 29). Parlapämashganga gustamarganmi, pero piwanpis parlayta manchacurmi upälala cacoj cä. Chayno captinpis paycunaga cuyacuywan y yachaylapa tratamargan y watucamargan Bibliapita yachachipäcamänanpaj. Paycuna marcäman chayananpäga mayjina caruraj cargan (10 kilómetros) chaquilapa shapäcamunanpaj.

Wawguï wilamargan paycuna ricu runacuna mana cashganta, chayno captinpis ali vistishgan shapäcamurgan y regalucunatapis rurapäcamargan. Chaurasga cuentata gocurgä rasunpa cristianucunala chayta rurapäcunganta.

Maquïlawan leircur Bibliata yachacoj cä. Yachachipäcamashganta tantiarcuptïpis, waquin yachachicuycunata creinäpaj facilchu cargan. Tantiarinapaj, manami creirgächu Dios nogapa yarpachacunganta y waquincunapis cuyamanganta. Dios mana culpayoj cashganta nacaycunapita tantiaptïpis, sasami cargan juc taytano ricänäpaj.a

Bibliata yachacur ichic ichiclapa Diosman yaracuyta galaycurgä. Tantiargä Dios laquicunganta ali shonguyoj runacuna nacaptinmi. Sirvejnincunata nacachiptinga payga nin: “Kuyashqä runakuna Egiptucho fiyupa lakikur kawarkaykaqtami rikashqä. [...] musyaykä amatar nakarkaykashqanta” (Éxodo 3:7). Jehová alapa cuyacoj cashganta musyarmi decidirgä payta sirvinäpaj, chaymi bautizacurgä Jehovapa testigunno 1998 watacho.

Juc wata pasarcuptin bautizacushgäpita, Escuintla ciudächo braille leiyta yachacunäpaj estudiaj aywargä. Chaycho juc congregaciunpita juc wawgui musyargan Acul rimaycho reuniuncunaman aywanäpaj sasa cashganta, chaquilapa mayjina caru aywanäpaj cargan. Chaurasga chay wawguiga chay congregaciunpita hermanucunata ashirgan wasincho pachachimänanpaj, chaynopa reuniuncunaman pushamänanpaj. Paycunaga alapa cuidamanmi y canancama familantanomi yanapäman.

Achca cutichomi hermanucuna tucuynopa cuyacuywan yanapäcamargan. Paycunawan caycarga cushicömi, Jehovapa testiguncunaga rasunpa cristianucuna capäcun (Juan 13:34, 35).

IMATA LOGRASHCÄ:

Cananga cushi cushilami cawacö. Manana yarpänachu imatapis rurayta mana puedingäta, chaypa trucanga lapan tiempüwanmi Diospa Gobiernunpita ali wilacuycunata runacunata yachachicuyta gustaman. Congregaciuncho hermanucunata tucuynopa yanapä, nircur cercalacho caycaj congregaciuncunachopis discursamoj aywä. Y alapami agradecicö acramaptin discursamunäpaj chaychicaj goturashga runacuna caycashgancho.

2010 watacho, invitamargan Escuela de Entrenamiento Ministerial nishganman aywanäpaj, chayga ruracargan El Salvador nishgan naciuncho. Chaychomi yachacurgä yaracoj masëcunata yanaparcunäpaj. Cuentata gocurgä Jehová alapa cuyamashganta y payga pitapis utilizan munayninta cumplinanpaj.

Jesús nirgan: “Imatapis chaskir kushikushqantsipitapis mas kushikuypaqmi kaykan pitapis yanapashqantsi” (Hechos 20:35). Cananga amatar cushishga sienticö y waquincunata yanapänäpaj munaycö.