Imanotaj yanapacushwan juc desgracia pasaptin

Canan wichan imayca desgraciacuna pasaycan. Chayno captenga, desgraciapa pasaycaj hermanucunata yanapacojcunaga altanto caycan imano yanapacunanpaj. Chaymi Jehovapa testiguncunata Pushajcuna camacächergan lapan pachacho caycaj sucursalcunacho Desgraciacunapa Pasajcunata Yanapacoj hermanucuna cananpaj.

Paycunaga musyapäcuptin imalapis pasashganta, jucla jinan marcapita ancianucunata tapucärin publicadorcuna ima necesitashgancunata. Desgraciaraycur lapan dañacushgan jinan marcapita publicadorcuna alchayta mana puediptenga, sucursalpita waquin hermanucunata mandapäcamun yanapacunanpaj. Cay hermanucunaga öraga capaz más yanapacojcunata o imalawanpis yanapacunapaj mañacunmanmi. Jina ima necesitashgancunatapis rantir waquincunata macyarcunman.

Paycuna chayno arurga lapan rurashgancuna manami yangalapächu canga; maqui maqui arur lapancunata yanapacun. Jina guellaypis y ima materialcunapis ali utilizacan, ichanga pipis quiquinpa cuentanpa aruptenga manami chaynochu.

Sucursalpita shamoj hermanucunaga musyapäcunmi ayca guellayta y yanapacojcunatapis necesitashganta aruycunapaj. Jinan marcapita autoridäcunawanpis parlapacunmi ima aruypis sasa mana cananpaj. Chauraga yanapacunayquipaj mana mañacushuptiquega, ruwacärëmi quiquiquipa cuentayquipa guellayta mana shuntanayquipaj, ni imatapis mana apachicunayquipaj y desgracia pasashgan sitiumanpis ama aywaychu.

Hermanunchicunataga cuyayculanchimi, chaymi ima desgracialapis pasaptenga jucla imanopapis yanapacuyta munanchi (Heb 13:16). Pero ¿imanotaj chayta rurashwan? Desgracia pasajcunapa y chaycho yanapacojcunapäpis mañacushwanmi. Jina aycalatapis guellayninchita apachicuyta puedinchi obra mundial nishganpaj. Sucursalcho yanapacojcunaga más musyapäcun apachicushganchi guellayta imapaj y imano utilizananpaj. Chay sitiuman aywaycur yanapacuyta munarga, Solicitud de voluntario local de diseño y construcción (DC-50) apachicushwan. Chaynopa musyacanga yanapacuyta munashganchita.

CAY VIDEUTA RICÄRIY: BRASILCHO YACU PASAYPA JUNTACASHGAN. NIRCUR CAY TAPUCUYPITA PARLACAMUY:

¿Ima ninquitaj Jehovapa testiguncuna alapa yanapacamushganpita Brasilcho yacu pasaypa juntacashgancho?