Cushi cushilami cawacurgä Jehovata sirvir

Juc wata pasarcuptenga Betelcho juc wilacuy cargan, chaycho tapucärirgan ‘¿picunataj aywayta munapäcun Sudáfrica sucursalpa, chaycho impriminapaj maquinawan arupäcunanpaj?’ nir. Alichi canman invitamaptenga niycargämi y cushicurgämi ‘aywanquimi’ nipäcamaptenga. Aywananpäpis caycargan quimsa betelitacuna: Dennis Leech, Bill McLellan y Ken Nordin. Mana cuticamuypa chaycho arunapämi nipäcamargan.

Nircurna mamanëta gayacurgä y cayno nergä: “Mamalä wilapayta munä. Sudáfrica naciunpa aywacushaj”. Mamänëga cushi cushilami Jehovata sirvej. Chaymi yarpachacurgä ‘mamänëga aumi nimangapaj’ nir. Papänëpis michäcurganchu aywacunäta, ichanga laquicärirganmi carupaj aywacunäpaj cajpita.

SUDÁFRICA NACIUNPA AYWACÖ

Manaraj aywacurga Brooklyn Betelchomi quimsa quillapa yachachipäcamargan imano arupäcunäpaj. 20 watapa aywaycaptëmi Ciudad del Cabo (Sudáfrica) nishganpa viajar galaycärirgä. Chayaycurga yapayna chacaypa viajar galaycärirgä Johannesburgo nishganpa. Pacha waraycuptinna chayapäcurgä Karroo jutiyoj ichic marcaman, chaycho caycarga achachajmi y alpapis goshtatajmi. Chuscücunami tapucärirgä ‘¿ima marcataj cayga?, ¿maychotaj caycanchi?’ nir. Tiempuwanga cutipäcamurgämi y cuyaylapaj marcami cargan.

Galaycunan watacunachoga linotipia nishgan maquinawanmi arurgä, caychoga imapis camacämojmi La Atalaya y ¡Despertad! revistacuna imprimicämunanpaj, chaycho caycaj sucursalga achca idiomacunapaj y achca naciuncunapämi publicaciuncunata imprimej. Cushicuypämi cargan aruycashganchi maquinacunaga, mana jamaypami aroj.

Tiempuwanga quiquin oficinachona arur galaycurgä, chaychoga publicaciuncuna traducicamoj, imprimicamoj y juc ladupa apachipacoj. Imaycata rurashgäpita cushicurgämi.

CASACÖ Y JUC INVITACIUNTANA CHASQUIRCÖ

1968 watachomi, Laura Bowen paniwan casacurgä. Payga precursorami cargan y Traduccionpäpis arupacojmi. Chay wichanpäga chaylaraj casacushgacunaga Betelpitami yargupäcoj y nogacunataga precursor especial capäcunapämi nipäcamargan. Laquicurmi galaycurgä, chunca watapa Betelcho caycarga micunapaj upunapaj carganmi, pero cananga ¿imanoparaj walcalawan ishcaläcuna cawacöman? Gastöcunapäga walca guellaylatami mandapäcamaj, chaypis publicaciuncunata aypur, horäcunacho y revisitäcunachopis ali arushga car-raj. Chay guellayga cargan wasita alquilacushgäpita paganapaj, micuypita, viajipita y hospitalman aywashgäcunapitapis.

Durban marcacho caycaj gruputa yanapacunapämi mandapäcamargan, chayga caycargan océano Índico ladulanpa. Yanapacunapäga maychicaj runacunami cargan. Chay runacunapa unay castancunaga azucarta ruraj fabricacunachoshi esclavo japuy arupäcoj. Cananga imaycachonami arupäcoj pero gongaripäcurganchu unay castancuna imano cawacushganta y imata micushgantapis. Rimaynincunaga inglesmi cargan, chauras Diospita yachachipäcunäpäga manami sasachu cargan.

Precursor especialcunaga quillacho 150 horascunatami informanan cargan. Chauras Laurawan parlapacärirgä galanan junajcho sojta horascunata rurapäcunapaj. Bibliapita yachachinapäga pilawanpis reguinacurgärächu cargan. Imano carpis y achachaycaptinpis sojta horacunapa wasin wasin aywanapämi caycargan, relojnëta ricaycunäpäga chaylaraj pasargan 40 minutucuna. Chaychomi tapucärirgä ‘¿precursor especialno yanapacuyta puedishunchuraj?’ nir.

Tiempücunaga juclami shumaj camacargan. Micuyta alistapacurmi predicaj aywacärej cä. Predicaycarga montipa chaquinlachomi öraga jamarpärej cä. Chaycho carro rurincho carcaycaptega, achca wamracuna yuricarcamurgan. Tiempuwanga yachacärirgämi y mayapäcurgänachu tiempo pasanantapis.

Cushicuypämi cargan Diospa ali wilacuyninta may chaypa apayga. Chaycho cawaj runacunaga ñanpu shongu y Diosta cuyaj capäcoj. Hindúes nishgan cajcunaga ali shongulanwanmi chasquicärirgan Jehovapita, Jesuspita y Bibliapita yachachishganchita, paycunataga parlaparganchi ali caway cananpaj y wanushgacunapis sharcapäcamunanpaj. Juc wata pasarcuptenga 20 runacunatana Bibliapita yachaycächishcanchi. Almuerzuta ruranapäpis juc familiawanmi waran waran yanupacärej cä. ¡Lapanpis cushicuypaj cargan!

Pero nircurga juc invitaciunna chayamurgan, nipäcamargan congregaciuncunata watucar océano Índico costa caj ladunpa aywapäcunapaj. Hermanucunaga cushi cushilami posadancunata gopäcamaj y lapanwanpis Diospita yachachicärej cä y shacyächinacärej cä. Hermanucunaga familian japuytanomi ricapäcamaj, wamrancunatapis reguishgäcunaga cushicuypämi cargan. Ishcay wata chayno arur carcaycargä, pero nircur ilajpita Betelpita gayapäcamargan chayman yapay cutipäcunäpaj. Chayna noga nergä: “Ama ari, caychoga alimi arucuycanchi”. Pero maychopis arunapämi aunicushga cargunchi.

BETELPA CUTICÄRË

Betelchona caycarga predicaciunta ricajcunawanmi arurgä, chay hermanucunaga alapa tantiaj y yachajmi capäcurgan. Chay wichanga watucoj hermanucunaga wilacamojmi congregaciuncuna imano caycashganta. Chaymi noganchicunapis chay congregaciuncunaman cartacunata apachicoj canchi. Cay cartacunaga ruracaj shacyächinapaj y imalatapis rurapäcunanpaj yarpachinapämi. Secretariucunaga alapami arupäcoj chayamushgan informicunata xhosa y zulú rimaypita inglés rimayman ticrachinapaj. Cay sucursalchopis traducicämojmi cartacuna juc idiomata parlaj congregaciuncunaman apachicunapaj. Ali aruytami rurapäcoj traductorno yanapacoj hermanucunaga, chaynopärami musyarirgä imaycacunapa waquin hermanunchicuna pasashganta.

Chay wichanchoga Sudafricapita runacunaga chiquishgami capäcoj colornincunaraycur. Y castancunapura juntacäcurmi may chaychopis cawapäcoj. Ima idiomata rimashganlachomi parlapäcoj, Diospitapis yachachicärej y congregaciunmanpis aywapäcoj, paycunataga masnami reguiycargä.

Más unaylachoga inglés idiomalata parlaj congregaciuncunatami watucargä; cananga yana color hermanucunawan reguinacunäpaj caycargan. Paycuna cawashgan marcacunachoga jucmi jucmi creenciancuna y costumbrincuna cargan. Pero hermanunchicunaga Biblia yachachicushganlatami casucärirgan, familiancuna y vecinuncuna chiquircaycaptinpis. Más carulancho caycaj marcacunachoga runacunaga wacchami capäcoj, leiylatapis manami yachapäcojchu pero Diospa Palabrantaga respetapäcojmi.

Hermanunchicunaga nacapäcojmi cay munduwan mana talucar Dioslata adurapäcunanpaj, chaycunachopis yanapacurgämi. Testigo wamracunapis escuelancunacho rurapäcojchu cay mundo rurashgancunata, chayraycurlami escuelancunapitapis garguripäcoj. Cay lapanta ricashgämi yaracuynëpis sinchiyäcurishgaraj.

Suazilandia (Esuatini) marcachopis juc jatun pruebami yurircamurgan. Chay marcapa reynin Sobhuza wanurcuptinmi runacunata nipäcurgan imaycata rurapäcunanpaj. Olgu cajcunash galaputu cashgancama ajchanta rutucärinman y warmicunatapis chaynola ajchanta rutucärinanpaj nergan. Runacuna nishgancunataga hermanunchicunaga manami rurapäcurganchu, chaylapita chiquir galaycärirgan. Jehovata cuyashpan ali cajcunata rurapäcushganta ricarga cushicuypämi cargan. Dioslata adurapäcunanpäga alapami calpachacärirgan, caypis yapaymi yaracuynëcunata sinchiyarcächergan.

UNAY ARUYNËMAN CUTIRCÖ

1981 watachomi, publicaciuncuna imano imprimicänanpaj cajcho yanapacurgä. Cushicuypämi cargan imprimimunapaj mushoj maquinacunata ricarga. Chay maquinacunata ranticoj juc runami sucursalman apamurcur ‘ichanga utilizayta munanquiman caycunata’ nergan. Chaypitaga mananami unay maquinacunata utilizashcanchinachu, mushoj cajcunawanmi trucachishcanchi. Mushoj maquinacunata camacächerga publicaciuncunapis más achcana yargaramoj.

Computadorapis yanapacurganmi MEPS (Sistema Electrónico de Edición Plurilingüe) nishganwan arunapaj. Sudáfrica naciunman unay chusculä chayapäcushgäpitaga cananga imayca mushoj maquinacunatami ricaycushcanchi (Is. 60:17). Chay wichanpäga mayna casacärirgä Jehovata cuyaj precursoracunawan. Bill wauguiläwanga Betelchomi yanapacuycashcanchiraj. Ken y Dennis wauguicunana familiancunawan juc laducho cawarcaycargan.

Imayca ruranapaj sucursalchoga caycargan. Publicaciuncunaga más idiomacunaman traducicaycargan y waquin sucursalcunamanpis apachicuycashcanchiraj. Chayraycurmi juc mushoj Betelta sharcachipäcurgan Johannesburgo nishgan marcacho. 1987 watapäga mayna ushapäcurganna y chayraycurpis juc shumaj discurso ruracargan. Cushicuypämi cargan Diosta sirvir imayca ruracashganta ricarga. Sucursalta ricaj wauguicunawanpis arurgämi Sudáfrica naciuncho.

JUC LADUPA AYWANAPANA INVITAPÄCAMAN

2001 watachomi Estados Uniduscho Sucursalta ricajcunawan arunapaj invitapäcamargan. Chaymanga yarpaylapis yarpargächu, Sudáfrica naciunchoga yachacärirgämi, laquicuypämi cargan amigücunawan manana tincunapaj cajman yarparga pero cushicuypaj cargan Estados Unidusman cutirga.

Laurapa mamäninpäpis yarpachacärirgämi ‘carucho caycaptinchega piraj yanaparcunga’ nir; pero Laurapa quimsa hermanancuna nipäcamargan ‘yarpachacäriychu, nogacuna imalachopis yanaparcushäpämi’. Jina nipäcamargan ‘gamcuna lapan tiempuyquiwan Diosta sirvir carcaycay’. Chayno yanapäcamashganchipitaga agradecidumi sienticärishcanchi.

Toronto (Canadá) marcachomi warminwan wauguiläpis tiyaycargan. Paycunaga mamänëpa ladunchomi 20 watapana caycargan. Cushicömi wanushgancama cuidapäcushganpita, familiächoga pilapis listumi caycashga imalachopis yanapacunanpaj. Chay lapanpita agradecicömi, Jehovapa bendiciunninmi cashga.

Cay sucursalchoga achca watacunapami publicaciuncuna jorgacämunanpaj cajcunacho yanapacurgä, tiempuwanga cay lapancuna más shumajraj camacashga. Chaylaräga Departamento de Compras nishganchomi yanapacushcä. 20 watacunana pasashga cay sucursalcho yanapacushgäpita, cananga 5.000 betelitacunami caycan y 2.000 wasilanpita yanapacoj hermanucunapis.

Unaychoga yarpaylapis yarpargächu cayno Diosta sirvir caycänapaj. Warmilä Lauraga alapami yanapaycamashga. Casado cawacuynëcunaga shumajmi cashga. Caycho waccho Diosta sirvir caycashgäman yarparga cushicömi. Y pogushga hermanucunata reguipäcushgäpitapis cayno wauguicunataga achca sucursalcunata watucashgächomi reguirgä. Cananga 80 watapitapis masna aywaycä y walca walcalanami yanapacö, jovincunana ichanga cananga más yanapacuycan.

Salmos libruta escribej runami cayno nergan: “TAYTA DIOSTA rispitaj nasyun runacunaga cushishami cawanga” (Sal. 33:12). Cayno nishganga rasunpami. Cushicuypämi cashga waquincunawan junto Diosta sirvipäcushgäpitaga.