Taytacuna, wamrayquicunata yanapay Jehovata cuyananpaj

1, 2. ¿Ima pasaptinraj Bibliapa tantiachicuynincunata más shumajraj tantiarcunchi?

CASARACUNANPAJ caj junaj chayamuptenga, novio caj y novia cajpis ali vistishga carcaycan y discursamoj waugui Bibliapa consejuncunata paycunata yarpächishgantapis shumaj wiyarcaycan. Paycunaga chay consejucunata musyannami. Pero chay junajcho wiyashganga ishcancunami cäsucärenga casado cawaynincho ali cawapäcunanpaj.

² Chaynolami pasan wamracunata ashmanapäpis. Capazchi wamraynaj casaracushga cajcunaga mayna wiyashga wamracunata imano ashmanapaj consejucunata. Pero quiquinpa wamrancuna yuriptin y ashmananpaj captenga, chayraj shumaj tantiarcun chay consejucunata imano cäsucärinanpaj. ¡Taytacunapäga jatun ruraymi caycan wamrancunata yanapänanpaj! Cawayninchicho cambiucuna captinraj Bibliapa tantiachicuynincunatapis más shumajraj tantiarcunchi imano cäsucunapaj. Chaymi Diospa sirvejnincunaga “waran waran” Bibliata leicunchi y leishganchiman yarpachacunchi; unay Israelpa reynincunata mandashganno (Deut. 17:19).

3. ¿Imatataj canan yachacushun?

³ Cristiano caj tayta mamacunaga juc jatun ruraytami chasquicärergan: wamrancunata yanapänanpaj Jehovata reguinanpaj. Cayga manami ninanchu wamrancunata revistacunata o Biblialata aptapänanpaj, sinoga wamrancunata yanapanman Jehovata lapan shongunwan cuyananpaj. Chaymi cananga ricaycushun Bibliapa chuscu tantiachicuynincunata taytacunata yanapänanpaj (2 Tim. 3:16). Jina ricärishun waquin taytacunata imano yanapashganta Bibliapa consejuncuna cäsucäriptin.

TAYTACUNAPAJ CHUSCU TANTIACHICUYCUNA

4. ¿Maygan tantiachicuytataj taytacunata yanapanga wamrancunata yanapänanpaj Jehovata cuyananpaj? (Santiago 1:5).

⁴ Punta caj: Jehovapa yachayninta ashiy. Jehovapa yanapacuyninwanraj wamrayquicunata yanapanqui payta cuyananpaj. Chaymi Jehovata ruwacuy yachayninta goycushunayquipaj (leiriy Santiago 1:5). Jehovaga lapantami musyan. Payga pipitapis más yachaj Tayta caycan y reguimanchi imano cashganchita (Sal. 36:9). Chaymi consejuncunaga imaypis yanapämanchimi (Is. 48:17).

5. 1) ¿Ima yanapacuycunataj Jehová camacächishga taytacunapaj? 2) ¿Amorim hermanucuna wamrancunata imano ashmashganpita imataj yachacushcanqui?

⁵ Jehovaga Palabranwan y marcanwanpis imayca yanapacuycunata camacächishga taytacunapaj, chaynopa wamrancunata yanapänanpaj Jehovata cuyananpaj (Mat. 24:45). Chay yanapacuycunaga caycan “Ayuda para las familias” nishgan, y chayga achca watacunapami ¡Despertad! revistacho yargamushga y cananga jw.org paginachopis caycan. Jina cay paginacho tarinqui videucunata actuaciuncunatapis. Y caycunaga yanapäshunqui Jehovapa consejuncunata cäsucunayquipaj imano wamrayquicunata ashmanayquipaj (Prov. 2:4-6).b

6. ¿Ima nintaj juc tayta Jehová marcanwan yanapacuycunata camacächishganpita?

⁶ Achca taytacuna ‘gracias’ nipäcun Jehová marcanwan yanapacuycunata camacächishganpita. Joseph jutiyoj juc tayta cayno nin: “Quimsa wamracunata ashmanapäga manami facilchu. Chaymi imaypis warmëwan Jehovata mañacärë yanapämänanpaj, y cada cadalami maygan yachachicuypis o videupis tiempulancho yargamushga yanapämänanpaj. Chay yanapacuycuna mana captenga imaraj canman cargan nogacunapita”. Joseph y warminga cuentata gocärergan chay videucuna y yachachicuycunapis wamrancunata yanapaycashganta Jehovawan ali amigo capäcunanpaj.

7. ¿Imanirtaj taytacunaga calpachacärinman ali ruraynincunawan wamrancunata yachachinanpaj? (Romanos 2:21).

⁷ Ishcay caj: rurayniquicunawan yachachiy. Wamracunaga taytancuna rurashgantami ruran. Juchaynaj taytaga manami canchu (Rom. 3:23). Pero yachaj caj taytacunaga calpachacärinmi ali ruraynincunawan wamrancunata yachachinanpaj (leiriy Romanos 2:21). Wamracunapita parlarmi juc tayta nergan: “Imano juc esponja yacuta shogucurcun, chaynolami wamracunapis lapan ricashgantami ruran. ‘Cayta ruray’ niptinchipis quiquinchi mana ruraptinchega nimäshunmi”. Chauraga wamranchicuna Jehovata cuyananpäga puntata noganchiraj Jehovata cuyananchi, y chayga rurayninchicunachomi claro ricacämunman.

8, 9. ¿Imataj yachacushcanqui Andrew y Emma wilacamushganpita?

⁸ Taytacunaga imayca ruraycunawanmi wamrancunata yachachinman Jehovata cuyananpaj. Ricärishun Andrew jutiyoj wauguinchi wilacamushganta, payga 17 watayojmi, nin: “Taytäwan mamäga imaypis yachachipäcamaj Jehovata mañacunäpaj. Cada chacaymi noga mayna mañacushga captëpis, papanëga nogawan imaypis mañacoj. Paycunaga nipäcamaj: ‘Jehovataga ayca cutipis mañacunquimanmi’. Chaymi imaypis Jehovataga mañacömi, y cuyacoj Taytatanomi paytaga ricä”. Tayta mamacuna cayta ama gongaychu: gamcuna Jehovata alapa cuyashgayquita wamrayquicuna ricaptenga, paycunapis chayta ruranga.

⁹ Emma panilanchi wilacushgantapis ricärishun. Taytan wasinpita aywacuptinshi, mamanta achca jagacunawan jaguirergan. Emma nin: “Achca cutichomi mamanëta guellaynin ayparganchu, pero payga imaypis segura caycargan Jehová sirvejnincunata cuidananpaj cashganta. Y ruraynincunata ricarmi cuentata gocurgä payga Jehovaman alapa yäracushganta. Mamanëga ruraynincunawanmi yachachimargan”. Caypitaga yachacunchi, taytacunaga problemacunapa pasarpis, ima rurashgancunawan Jehovata cuyashganta wamrancunata ricächiyta puedinmi (Gál. 6:9).

10. ¿Imacunata rurartaj israelita taytacunaga wamrancunawan parlapacärinman cargan? (Deuteronomio 6:6, 7).

¹⁰ Quimsa caj: wamrayquicunawan imaypis parlapacäriy. Jehovaga israelita taytacunata mandargan waran waran paypita wamrancunata parlapänanpaj (leiriy Deuteronomio 6:6, 7). Chauraga junajcho imay horapis wamrancunawan parlapacärinman y Jehovata cuyananpaj yachachinman cargan. Olgu caj wamracunaga taytanta yanapaj chacracho murunanpaj o cosechananpäpis. Warmi cajnami mamanta wasincho yanapaj yanucärinanpaj, awananpaj o jirananpäpis. Chaycunata junto rurarmi tayta cajcunaga wamrancunawan imaycapitapis shumaj parlapacärinan cargan. Aumi, paycunaga yarpachacärinan cargan imano Jehová alapa cuyacoj cashganta y familianta cuidashgantapis.

11. Cristiano caj taytacunaga, ¿imata rurartaj wamrancunawan parlapacärinman?

¹¹ Canan wichanga manami unaynochu. Achca naciuncunacho taytacunapaj y wamracunapäga tiempunpis canchu junto caycänanpaj. Taytacunaga aruynincho caycan y wamracunana escuelancho. Chaymi taytacunaga tiempunta shumaj camacächinman wamrancunawan caycänanpaj y parlapacärinanpaj (Efes. 5:15, 16; Filip. 1:10). Familiacho Diosta aduranapaj hora yanapacun chayta rurananpaj. Alexander jutiyoj wamra nin: “Papanëga imaypis lapanta camacächin Jehovata junto aduranapaj, manami imapis michämänanchita permitinchu. Estudio usharcuptin, imalapitapis mastaraj parlapacunchi”.

12. Diosta aduranapaj horacho, ¿imataj taytacunaga mana ruranmanchu?

¹² ¿Imataj tayta cajga ruranman familiacho Diosta adurananpaj hora wamrancuna cushishga yachacärinanpaj? Alimi canman Cushishgala imaypis cawanapaj libruta junto yachacäriptin. Cay libruta yachacurga imaycacunami canga parlapacärinanpaj. Wamrayquicuna shonguncho caycashganta o yarpachacächishganta wilashunayquita munarga, Diosta aduranapaj horachoga piñapaychu ni rabiapaychu. Y öraga paycuna nipäcushgan Bibliawan mana tincuptenga ama manchacäriychu. Sinoga shonguncho caycashganta wilashushgayquita agradecicuy, y chaynola rurananpaj nircuy. Wamrayquicuna shonguncho caycashganta wilapäshuptiquega musyanquimi imano yanapänayquipaj.

13. ¿Ima masta rurartaj taytacunaga wamrancunata yanapanman Jehovaman guelicamunanpaj?

¹³ Tayta mamacuna, junajchoga imay horapis wamrayquicunata yanaparcuy Jehovaman guelicamunanpaj. Chayta ruranayquipäga manami Bibliatarächu quichanayqui cuyacoj Diospita parlapänayquipaj. Lisa jutiyoj juc mama nin: “Jehová imayca camashgancuna yanapämashga wamräcunata yanapänäpaj Jehovata shumaj reguinanpaj. Algö puclacur paycunata asichiptin wamräcunata yarpächë Jehovapis cushicoj Dios cashganta, y cawayta alapa valurashganta noganchino”.

14. ¿Imanirtaj taytacunaga wamrancunata yanapanman ali amigucunata acrananpaj? (Proverbios 13:20).

¹⁴ Chuscu caj: wamrayquicunata yanapay ali amigucunata acrananpaj. Diospa Palabranga claro nimanchi amistäcunaga apamanchi ali cajman y mana ali cajmanpis (leiriy Proverbios 13:20). Taytacuna, ¿musyanquichu wamrayquicunapa amiguncuna pïcunataj cashganta? ¿Paycunata reguinquichu y parlapacärishcanquichu? ¿Imataraj ruranquiman wamrayquicunata yanapänayquipaj Jehovata cuyajcunawan amigo cananpaj? (1 Cor. 15:33). Familiayquiwan imalatapis ruranayquipaj caycaptenga, Jehovata cuyajcunata invitarcuy wamrayquicuna paycunata reguinanpaj (Sal. 119:63).

15. ¿Imataj taytacuna ruranman wamrancunata yanapänanpaj ali amigucunata tarinanpaj?

¹⁵ Ricärishun Tony jutiyoj tayta warminwan imatash rurapäcurgan wamrancunata yanapänanpaj ali amigucunata tarinanpaj. Tony wilacun: “Achca watacunapami tucuy edäyoj y tucuy marcapita hermanucunata invitanchi wasinchiman shapäcamunanpaj imalatapis micupacunapaj, y familiacho Diosta aduranapaj hora junto caycänapaj. Chaynopa Jehovata cuyaj y cushishga sirvej hermanucunata reguishcanchi. Y öraga congregaciunta watucamojcunata, misionerucunata y waquin hermanucunatapis wasinchicho pachächicushcanchi. Wamräcunaga ricashga chay hermanucuna imaycacunapa pasashganta y Jehovata cushishga sirvircaycajta. Cayga yanapashga paycunapis Jehovaman más guelicamunanpaj”. Taytacuna, wamrayquicunata imaycanopapis yanaparcuy ali amigucunata tarinanpaj.

¡PACIENCIAWAN SHUYARCUY!

16. ¿Imataj taytacuna yarpanman maygan wamranpis Jehovata sirviyta manana munaptin?

¹⁶ ¿Imaraj canman imaycacunata rurashga captiquipis juc wamrayqui nishuptiqui ‘Jehovata sirviyta mana munänachu’? Chayno captenga culpayqui cashganta ama yarpaychu. Jehovaga shuyaran jucninchi jucninchi acranapaj payta sirvinapaj o manapis. Wamrayqui Jehovata sirviyta jaguiriptenga, pacienciawan shuyarcuy imaylapis cuticamunanpaj. Jesús wilacushgan aywacoj mozo rurashganta yarparay (Luc. 15:11-19, 22-24). Chay mozuga shongun munashgalanta rurar galaycorgan, nircur arrepenticorgan. Pero capazchi ninquiman: “Chayga wilacuylami, quevä pipis rasunpa chayno pasanman”. Elie jutiyoj mozo imacunapa pasashganga ricächimanchi rasunpa cashganta.

17. ¿Imataj yachacunqui Elie pasashganpita?

¹⁷ Taytanwan mamanpita parlarmi Elie nin: “Paycunaga calpachacärergan yachachipäcamänanpaj Jehovata y Palabrantapis cuyanäpaj. Ichanga mozuyarnaga cäsucuyta mana munargänachu”. Eliega pacaylapa mana alicunata rurar galaycorgan, y taytancunapa yanapacuyninta chasquiyta mana munarganchu. Wasinpita aywacorgan y Jehová chiquishgan ruraycunata rurar galaycorgan. Chayno captinpis öraga amigunta Bibliapita parlapaj. Elie cayno nin: “Amigüta cada cadala Bibliapita parlapaptëmi Jehovaman más yarparaj cä. Y ichic ichiclapa cuentata gocurgä taytäcuna yachachimashgancunaga shongücho caycashganta y chaycunaman yarpachacur Jehovata cuyar galaycorgä”. Tiempuwanga Elie congregaciunman cuticamurgan.c Chauraga taytanwan mamanga mayrajchi cushicärergan wamran lapan yachacushganta mana gongashganpita (2 Tim. 3:14, 15).

18. ¿Ima ninquitaj taytacunapita calpachacuptin wamrancunata yanapänanpaj Jehovata cuyananpaj?

¹⁸ Tayta mamacuna, Jehovaga juc jatun rurayta ruranayquipaj goshushcanqui, wamrayquicunata yanapänayquipaj payta sirvinanpaj (Sal. 78:4-6). Musyanchimi chayta ruranayquipäga manami facilchu cashganta. Chaymi shongupita felicitaycunchi ali aruyniquipita y yanapacuyniquipita. Jinala valurcharcuy wamrayquicunata yanapänayquipaj Jehovata cuyananpaj y consejuncuna cäsucärinanpaj (Efes. 6:4). Chayta rurapäcuptiquega, Taytalanchi Jehovaga cushishgami caycanga gamcunapa rurayniquicunapita.