Joven, bautizacurirga Jehovaman masraj yäracuy

1. ¿Imatataj chaychicaj jovincuna mayna rurapäcushga?

WATA watami chaychicaj joven cristianucuna bautizacärin. Paycunapita mayganpis captiquega hermanucuna cushicärin, Jehovapis alapa cushicun (Prov. 27:11). Canancama rurashgayquiman yarpay, Bibliataga alimi leishgayqui juc watapitapis masrächi y convencido caycanqui Diospa Palabran cashganta. Chaypitapis masraj Jehovata reguinqui y cuyanqui. Chaymi juc mañacuycho paylata sirvinayquipaj aunicushcanqui y bautizacushcanqui. ¡Chayga alapa alimi!

2. ¿Imatataj cay yachachicuycho yachacushun?

² Manaraj bautizacurga imayca sasacunapachi pasashcanqui y rasunpa yäracushgayquita o manapis ricacashgachi. Ichanga tiempuwanga más sasacunaparämi pasanqui. Y Satanasga imaycacunatami ruranga Jehovata mana cuyanayquipäna y paypita raquicäcunayquipäpis (Efes. 4:14). Chayta mana pasashunayquipaj, ¿imatataj yanapäshunqui Jehovalata cuyar y aunicushgayquimanno paylata sirvir caycänayquipaj? Chaypäga Jehovaman yäracushgayquita masraj mirachinayqui y masraj yachacurpis caycänayqui (Heb. 6:1). Cay yachachicuychomi chaypita yachacushun.

¿IMATATAJ RURANQUIMAN POGUSHGA CRISTIANUMAN TICRANAYQUIPAJ?

3. ¿Imatataj cristianucunaga ruranman bautizacurnaga?

³ Pipis bautizacuptinga, Éfeso marcacho unay cristianucunata Pablo consejacushganta cäsucunman. Payga nergan: “Sinchina carmi Jesucristo cawashanno” noganchipis cawapäcushun (Efes. 4:13). ‘Juc ali pogushga runaman ticranayquipaj calpachacäriy’ nishgannomi cargan. Pogushga cristianuman ticrashganchega Pabluga tincuchirgan juc iti winashganman. Taytacunaga itinpita alapami cushicärin, ichanga tiempuwan jatunyanmi y iti cashganpis pasacunmi (1 Cor. 13:11). Cristianucunawanpis chaynomi pasan, bautizacurnaga jinala calpachacushwan Jehovata más reguinapaj, más cuyanapaj y paypaj masta ruranapaj. Chayta logranayquipaj waquin yanapacuycunata ricärishun.

4. ¿Imatataj yanapäshunqui Jehovawan más amigo canayquipaj, y imanir? (Filipenses 1:9).

⁴ Jehovata masraj cuyanayquipaj calpachacuy. Jehovata alimi cuyaycanqui. Ichanga Jehovata masraj cuyanayquipaj apóstol Pablo consejacushgan cäsucuptiquimi yanapäshunqui, chayga caycan Filipenses 1:9 textucho (leiriy). Pabluga Jehovata mañacurgan Filipos marcacho caycaj cristianucuna ‘waran waran más cuyanacunanpaj’. Chauraga Diosta masraj cuyanapäga calpachacushwanmi. Chaypäga Diospa Palabranpita shumajraj yachacushwan y aliraj tantiacushwan. Chauraga niycanchi Jehovata masraj reguirga masmi cuyashun y imano cashganpita cushi cushilami yachacushun. Ganas ganaslami payta cushichiyta munanchi y laquichiytaga yarpaylapis manami munanchichu. Waran waran yarpachacunchi ‘Diosga imano cawacunätaraj munan’ nir, y calpachacunchi Pay munashganno cawacunapaj.

5, 6. ¿Imataraj más ruranquiman Jehovata masraj cuyanayquipaj?

⁵ Jesús imano cashganpita shumaj yachacuptinchi Jehovata más cuyanapaj yanapämäshun, payga Taytan nirajmi cargan (Heb. 1:3). Chuscu Evangeliucunami caycan Jesusta shumaj reguinapaj. ¿Waran waranchu Bibliata leinqui? Chayno mana leiptiquiga cananpita galaycuy. Jesús ima nishganta y imata rurashganta leiptiquiga yarpachacuy imano cashganman. Pï maypis Jesusmanga witejmi, wamracunatapis Jesusga margacuycojmi (Mar. 10:13-16). Discipuluncunata cuyapaylapa parlapaj y shumaj yachachej, chaymi discipuluncunaga mana pengacuylapa imatapis wilaj (Mat. 16:22). Jehovami chayno, chaymi Jesuspis chayno cargan. Jehovapis mañacuptinchi wiyamänanchipaj listo caycan. Chaymi lapan yarpachacuyninchita payta wilanchi imata wilaptinchipis manami pengacächimanchichu. Payga cuyamanchimi y nogacunapaj yarpachacun (1 Ped. 5:7).

⁶ Runacunata ricar Jesusga alapa cuyapargan. Chaymi paypita parlar, Mateo libro cayno nin: “Runacuna shuntacasha carcaycajta ricashpan Jesusga cuyapaj. Uyshëruynaj, ogracasha llaquisha uyshacunano caycajta ricarmi Jesús cuyaparan” (Mat. 9:36). ¿Y ima nishwantaj Jehová Diosninchipita? Taytanpita Jesús cayno nergan: “Mana munanchu wamrano yäracuycajcuna ni jucnayllapis ogracänanta” (Mat. 18:14). ¡Taytanchi Jehová amatar cuyamashganchita musyarir alapa cushicunchi! Aumi, Jesusta más reguirga Taytalanchi Jehovatapis masraj cuyashun.

7. ¿Imanirtaj yanapäshunquiman ali amigucunata acraptiqui?

⁷ Jina caycanrämi ruranayquipaj Jehovata masraj cuyanayquipaj. Chaypäga congregaciuncho Jehovata cuyaj ali amigucunata acray. Paycunaga cada cadala Jehovata cushishgala sirvircaycan. Imano chayta rurashganpita wilashunayquipaj mañacuy, y imatapis manaraj acrar o manaraj decidir paycunawanraj parlay. Bibliaga nin “achcaj tantiyachejcuna” captenga alimi camacan (Prov. 11:14).

8. ¿Imatataj ruranquiman Biblia yachachicushgan shumaj mana tantiarga?

⁸ Mana tantiashgayquipita yachacur. Ishcay caj parrafucho nishganchino Satanasga michäcungami Jehovata masraj reguinayquipaj y paypaj masraj ruranayquipaj. Chaymi Biblia yachachicushgan mana rasun cashganta yarpanayquipaj munan. Chauraga imaylapis wiyanquimi evolución nishgan yachachicuypita, chayga Jehovatami mana cajman churan. Wamralaraj caycarga chaypita manachi wiyashcanquichu. Canan jovinman ticraptiqui ichanga colegiuyquicho profesorcunapis chaypitaga parlapäshunquichi. Yachachicushgan alino captinpis ichanga paycuna juc Camacoj cashganta manachi shumaj yachacushgachu. Proverbios 18:17 nishganta yarpay: “Rasun cajtanöraj dimandacur ‘caynömi, wacnömi casha’ niptin chay dimandashan caj chayamur ‘manami chaynöchu’ niptinrämi pengay-tucusha wiyaycun”. ¿Imataj yachacunchi? Escuelayquicho lapanta yachachicushganta rasunpa cashgantano manami chasquicunquimanchu. Chaypa trucanga Diospa Palabranpita y publicaciuncunapitapis shumaj yachacuy. Cristianuman manaraj ticrar evoluciunman creishgancuna hermanucunawan parlay imataj yanapashga juc cuyacoj Camacoj cashganman creinanpaj.b Chayno parlapacuptiquirämi shumaj tantianqui imapis imano cashganta musyanayquipaj.

9. ¿Imataj yachacunqui Melissa pasashganpita?

⁹ Melissa jutiyoj paninchita yanapashga juc Camacoj cashganpita yachacuptin.c Pay wilacun: “Profesorcunaga imatapis yachachicushgan rasunpa cashgantano yachachicären. Galanancho evoluciunpita yachacuyta mana munargächu. ‘Chaypita yachacuptëga yäracuynë ushacangämi’ nirmi yarpachacurgä. Jina nergä ‘Jehovata sirvinäpäga chay yachachicuyta shumajraj tantiacöman’ nir. Chaymi yachacur galaycurgä cay publicaciuncunawan: ¿Existe un Creador que se interese por nosotros? nishgan libruwan, y ¿Es la vida obra de un Creador? y El origen de la vida. Cinco cuestiones dignas de análisis folletucunawanpis. Chaycunapita yachacushgämi yanapämashga”.

10, 11. ¿Imatataj yanapäshunqui juchaman mana ishquinayquipaj? (1 Tesalonicenses 4:3, 4).

¹⁰ Mana ali munaycunata venciy. Mozo jipashman ticraptiquega chinata o choluta ricar galaycunqui, y waquincuna öraga inquietashunqui mayganlawanpis punucunayquipaj. Satanasga mana ali munashgayquita ruranayquipaj munan. ¿Imatataj yanapäshunqui chayta mana ruranayquipaj? (Leiriy 1 Tesalonicenses 4:3, 4). Jehovata mañacuptiqui lapanta wilapay y calpanta ruwacuy (Mat. 6:13). Yarpay, mana juzgaylapaj Jehovaga yanapäshunayquipaj listumi caycan (Sal. 103:13, 14). Bibliapis yanapäshunquimi. Naga parlashganchi Melissa paniga mana alicunata mana yarpachacunanpämi luchaycargan. Cayno wilacun: “Junaj junaj Bibliata leiptëmi mana yamacargächu. Chauraga Jehovapaj cawaycashgäta y cercalancho cayta munashgätami convencida caycargä” (Sal. 119:9).

¹¹ Problemayquicunawanga manami japalayquichu luchanayqui. Taytayquicunata wilapay imapa pasashgayquita. Rasunmi, manami facilchu yarpachacächishushgayquipita wilacunayquipaj, ichanga wilacuptiquiga alipämi canga. Melissa wilacun: “Jehovatami ruwacurgä valiente canäpaj, nircur imapa pasaycashgäpita taytäwan parlargä. Chaypita ancashyashga ricacurgä. Jehovapis cushishgachi caycan nogapita”.

12. ¿Imatataj yanapäshunqui alicunata decidinayquipaj?

¹² Bibliapa tantiachicuynincunaman yarpachacuy. Tiempuwanga winashgayqui tupu masraj tantiacunquipaj imata ruranayquipäpis. Canancama shumaj musyanquirächu caway vidapita, ichanga ¿imataraj ruranquiman Jehovapita mana carupäcunayquipaj? (Prov. 22:3). Kari jutiyoj pani yarpan: “Ali decidinäpäga yanapämargan cuentata gocushgäpita pogushga y ali tantiaj hermanucunaga manami necesitanchu pipis ninanpaj ‘cayta o wacta ruray’”. Caytapis wilacun: “Pipis imata ruranäpaj nimänanpaj trucan Jehová imano yarpashganta shumaj tantiacunäpaj calpachacö”. Bibliata leiptiqui cayno tapucuy: “¿Cay leishgäga imataj yachachiman Jehová munashganpita? ¿Juc tantiachicuy cancu imatapis acranäpaj yanapämänanpaj? Chayno ruraptëga, ¿imanoraj yanapämanga?” (Sal. 19:7; Is. 48:17, 18). Bibliata leiptiqui y yachacushgayquiman yarpachacuptiqui cada cadalami ali acranquipaj y Jehovatapis cushichinquipaj. Chauraga Jehová imata munashganta masraj tantiacuptiquega musyanquimi imata ruranayquipäpis. Chaynomi pogushga cristianuman ticrashgayquita ricacämunga.

13. ¿Imanotaj ali amigucuna yanapäshunquiman? (Proverbios 13:20).

¹³ Jehovata cuyajcunawan amigo capäcuy. Ganchis parrafucho ricashganchino amiguyquicunaga yanapäshunquimanmi pogunayquipaj (leiriy Proverbios 13:20). Sara jutiyoj pani pasashganta ricashun. Payga Jehovata cushishganachu sirviycargan, ¿y imataj yanapashga? Payga cayno wilacun: “Yanapacuyta necesitaycaptëmi ali amigucunata tarishcä. Semana semana Wilacamoj revistapita yachacunäpaj juc jipash masëwan shuntacaj cä, y juc amigänami shacyächimargan reuniuncunacho comentanäpaj. Amigücunata agradecicö, cananga Bibliata masrämi yachacö y shongupita Jehovata mañacö. Ichiclapa ichiclapa Jehovawan más amigo ticrargä y cananga yapaymi payta cushishga sirviycä”.

14. ¿Imanotaj ali amigucunata waugui Juanga tarergan?

¹⁴ ¿Imatataj ruranquiman ali amigucunata tarinayquipaj? Juan jutiyoj waugui cananga ancianuno yanapacun, payga cayno wilacun: “Mozularaj caycaptë wasin wasin yachachicuptëmi ali amigucunata rurargä. Paycunaga cushishgalami yachachipäcoj y cuentata gocurgä Diospita yachachicuptinchega cushicunchimi. Chaymi lapan tiempüwan Jehovata sirvinäpaj yarpaycargä. Amigücunaga jovincunalami cargan, chaymi más edayoj y pogushga hermanucunawan amigo canäpaj calpachacurgä. Y Betelcho sirvir galaycuptë ali amigucunatami tarishcä, paycunami yanapämargan cushicunäpaj y ali cajcunata acranäpaj chaynopa Jehovawan más amigo canäpaj”.

15. ¿Imataj apóstol Pabluga Timoteuta consejaycurgan? (2 Timoteo 2:20-22).

¹⁵ Congregaciuncho pilapis mana alicunata ruranayquipaj inquietashuptiquega, ¿imataraj ruranquiman? Apóstol Pabluga musyargan cawashgan wichanpis congregaciuncho Jehovata mana cuyaj cristianucuna cashganta. Chaymi Timoteuta nergan paycunawan mana juntacänanpaj (leiriy 2 Timoteo 2:20-22). Jehovawan amigo cashganchega alapa valoryojmi y paywan amigo canapaj imaycataraj rurashcanchi. Chaymi Jehovata mana cuyajcunawanga mana shuntacushwanchu (Sal. 26:4).

JEHOVAPAJ MASRAJ RURAPTIQUEGA YANAPÄSHUNQUIMI POGUNAYQUIPAJ

16. ¿Imataraj ruranquiman Jehovapaj masraj ruranayquipaj?

¹⁶ Jehovapaj masraj ruranayquipaj calpachacuy. Chaypäga yäracuyniqui mirananpaj y ali cristianuman ticranayquipaj calpachacuy (Efes. 3:16). Chaymi publicaciuncunapita shumajraj yachacunayqui y Bibliatapis junaj junaj leinayqui (Sal. 1:2, 3). Jina shongupita cutin cutin Jehovata mañacunayqui. Capazchi cushicunayquipaj cajcuna shumajraj acranayquipaj y tiempuyquitapis shumaj camacächinayquipaj caycan (Efes. 5:15, 16). Jehovaga cushicunmi imaycanopapis calpachacuptiqui pogushga cristianuman ticranayquipaj.

17. ¿Imanirtaj cushicunquiman waquincunata yanapaptiqui?

¹⁷ Waquincunata yanapaptiquega pogushga cristianuman ticraycashgayquita ricacanga. Jesusga nergan: “Chasquir cushicunanchïpitaga pitapis tarichiymi mas cushicuypäga” nir (Hech. 20:35). Waquincunata yanapänayquipaj tiempuyquita raquiptiquega cushicunquimi. ¿Imanopataj yanapacunquiman? Congregaciunniquichoga edayashgacuna o gueshyaycajcuna imalantapis rantipänayquipaj, celularninta shumaj utilizapäcunanpaj yanapänayquipajchi caycan. Bautizashga waugui captiquega siervo ministerialno yanapacunayquipaj calpachacunquiman (Filip. 2:4). Jina Diosta mana reguejcunata yanapanquiman ali wilacuycunata paycunata yachachir (Mat. 9:36, 37). Maquiquicho caycaptinga calpachacunquiman lapan tiempuyquiwan Jehovata sirvinayquipaj.

18. Lapan tiempuyquiwan Jehovata sirviptiquega, ¿imanotaj yanapäshunqui pogushga cristianuman ticranayquipaj?

¹⁸ Jehovata lapan tiempuyquiwan y calpayquiwan sirviptiquega yanapäshunqui pogushpayqui Jehovata masraj cuyanayquipaj. Precursorno yanapacuptiquega Diospita yachachicojcunapaj escuelaman o Betelman aywanquimanmi, o Diosta aduranapaj localcunata sharcachiychopis yanapacunquimanmi. Kaitlyn jutiyoj jipash precursora cayno wilacun: “Pogushga hermanucunawan yachachicushgämi yanapämashga Jehovata masraj cuyanäpaj y paypaj masraj ruranäpäpis. Jina yachacushcä Bibliata leiptë shumaj tantiacunäpaj y waquincunatapis más aliraj yachachinäpaj”.

19. ¿Ima bendiciuncunatataj chasquinquipaj pogushga cristianuman ticranayquipaj calpachacuptiqui?

¹⁹ Pogushga cristianuman ticranayquipaj cada cadala calpachacuptiquega aypala bendiciuncunatami Taytalanchi Jehová goshunquipaj. Alicunata ruranayquipaj calpachacushgayquega alipami canga (1 Juan 2:17). Alicunata acrashgayquipitaga manami laquicunquichu chaypa trucanga alapami cushicunquipaj. Imata ruranayquipaj yarpashgayquitapis alimi yargungapaj (Prov. 16:3). Chayno rurashgayquiga waquin jovincunata y edayashgacunatapis shacyächenga (1 Tim. 4:12). Más aliga jaucala ricacunqui y ali amiguyqui Jehovata cushichishgayquita musyarga gampis cushicunquimi (Prov. 23:15, 16).