Imataj Biblia yachachimanchi pï guelgashganpita

1. ¿Imanirtaj ninqui Diospa Palabran gampaj juc regaluno cashganta?

¡ALAPAMI Jehovata agradecicunchi Palabran Bibliata goycalämashganchipita! Chaychomi ali consejamanchi problemacunapa pasaycarpis imata ruranapaj. Jina shamoj tiempucho ali cawanapäpis aunimanchi. Y más aliga caycan, Palabran Bibliacho Pay imano cashganta musyachimanchi. Jehová imano cashganman yarpachacurga alapami cushichimanchi. Chayga yanapämanchi más ali amigun canapaj y payman guelicunapaj (Sal. 25:14).

2. ¿Imanotaj Jehová sirvejnincunata musyachicurgan pay imano cashganta?

² Jehovaga payta reguinanchitami munan. Unaycho pay imano cashganta sirvejnincunata musyachicurgan sueñucho, visiuncho, y angelcunatapis cachamurgan paypita wilacunanpaj (Núm. 12:6; Hech. 10:3, 4). Cay lapan Diospa wilacuynincuna guelgashga mana captenga manachi canan shumaj yachacushwanchu cargan. Chaymi Jehová waquin runacunata nergan juc rollucho escribipäcunanpaj imata musyanapaj cajcunata (Jer. 30:2). Biblia nin: “Tayta Dios nishanga llapanpis allimi”. Chaymi seguro caycanchi Jehová goycalämashcanchi lapan wilacuynincunaga ali cashganta (Sal. 18:30).

3. ¿Imataj Jehová Palabran Bibliawan rurashga canancama caycänanpaj? (Isaías 40:8).

³ (Leiriy Isaías 40:8). Achca watapami Diospa Palabran sirvejnincunata alapa yanapashga. ¿Imanoraj chayga canman cargan Biblia malogracaj materialcunacho guelgashga captin? Jina punta caj rollucunaga ushacäcushganami y noganchega ni juclaylatapis charanchichu. Chayno captinpis Jehová shumaj camacächergan copiacunata rurapäcunanpaj. Copia rurajcuna juchayoj captinpis alapa cuidadosumi cargan chayta rurapäcunanpaj. Escrituras Hebreaspita parlarmi juc yachaj runa nergan: “Manami unaypita libro ni juclaylapis canchu claro y exacto ruracashga cashganta”. Juchayoj runacuna ushacäcoj papelcunacho guelgaptinpis, segurumi caycanchi Bibliata leiptinchi Jehovapa yarpayninta leiycashganchita.

4. ¿Imataj cay yachachicuycho ricärishun?

⁴ “Tayta Diosninchëga llapantapis alli cajcunallatami gomanchi”, y Bibliami caycan jucnin caj shumaj regalun (Sant. 1:17). Pilapis juc regaluta gomaptinchi musyachimanchi pay imano cashganta, shumaj reguimashganchita y ima necesitashganchicunatapis musyashganta. Chaynomi Bibliata shumaj leirga Jehovatami más reguinchi y cuentata gocunchi paypis shumaj reguimashganchita y ima necesitashganchitapis musyashganta. Cay yachachicuychomi ricärishun Jehovapa yachayninpita, ali rurayninpita y cuyacuyninpitapis. Galaycushun Biblia imataj wilacun Jehovapa yachayninpita.

BIBLIAGA MUSYACHIMANCHI JEHOVAPA YACHAYNINPITA

5. ¿Imanotaj Biblia musyachimanchi Jehová yachaj cashganta?

⁵ Jehovaga musyanmi yachaynin y consejuncunata necesitaycashganchita, chaymi Bibliata garamashcanchi. Jehovapa consejuncuna runacunatami yanapan, chaymi achca runacuna Bibliapita yachacur cawayninta cambiargan. Moisés punta caj librucunata escribiptin israelitacunata nergan: “Kay leykunataqa manami manakaqlapaqtsu yachatsishqä, sinöqa tsaykunata cumplir ali kawayta taripäkunaykipaqmi” (Deut. 32:47). Biblia nishganta cäsucojcunaga ali y cushishga cawapäcunmanmi cargan (Sal. 1:2, 3). Biblia unaypita captinpis runacunataga yanapaycanlami cawayninta cambiananpaj, chaypita jw.org paginanchicho “Biblia yanapargan cambiananpaj” nishgancho achca ejemplucuna caycan imano runacuna unay cawayninta jaguirir ali cawacurna galaycärergan (1 Tes. 2:13).

6. ¿Imanirtaj ninchi Bibliawan waquin librucuna mana tincushganta?

⁶ Bibliaga ni ima libruwanpis tincunchu. ¿Imanir? Jehovaga alapa puedej, imaycamapis cawaj y yachayninga imawanpis tincunchu. Libruta rurajcuna wanucuptinpis libruncunataga leipäcunmi waquincuna, ichanga consejuncuna öraga gongacashga quedacun. Ichanga Bibliacho caycaj Jehovapa consejuncunaga unaypita canancama runacunata yanapaycanlami. Bibliata leiptinchega y consejuncunaman yarpachacuptinchega, Jehovami espíritu santunwan yanapämanchi consejuncunata practicaman churanapaj (Sal. 119:27; Mal. 3:16; Heb. 4:12). Yarpay, Jehovami lapan shongunwan yanapämänanchita munan. ¿Manachu chayga shacyächishunqui mana gongaylapa Bibliata leinayquipaj?

7. ¿Imanotaj unay cristianucunata Biblia yanapashga juc shongunola capäcunanpaj?

⁷ ¿Imano mastaj Biblia musyachimanchi Jehovapa yachayninpita? Sirvejnincuna juc shongula capäcunanpaj yanaparmi. Israelitacuna Aunishgan Pachaman yaycupäcuptin waccho caycho wasincunata sharcachipäcurgan tiyananpaj. Waquincuna pescaduta pescaj, juccuna uywacunata ashmaj y waquincunana chacracho arupäcoj. Chaymi israelitacuna mashtacashga caycarpis Jehová camacächergan maycho y ima tiempo juntacärinanpaj, chaycho juntula Palabranpita yachacärinanpaj y paylata adurapäcunanpaj (Deut. 31:10-13; Neh. 8:2, 8, 18). Yarparcushun, imanoraj juc israelita ricacurgan Jerusalenman chayar, chaychoga tarinacurganchi may chaypita shamoj waquin israelitacunawan, Jehovata adurar cushicärirganchi. Chaynomi Jehová yanapargan juc shongunola capäcunanpaj. Nircur apostulcuna cawashgan wichan congregaciunga formacashga cargan tucuy idiumata parlaj wacchacunawan y ricucunawan, olgucuna y warmicunapis. Lapancuna Diospa Palabranta cuyarmi juntula Jehovata sirvipäcoj. Mushoj cristianucuna Diospa Palabranta shumaj tantiapäcunanpäpis pogushga cristianucuna shumaj yachachicärishganpitami cargan, y mana gongaylapa juntacärishganpitapis (Hech. 2:42; 8:30, 31).

8. ¿Imanotaj Jehová Palabranwan yanapämanchi canan wichan juc shongula sirvinapaj?

⁸ Canan wichanpis Jehová sirvejnincunata yachachinanpaj y juc shongunola capäcunanpaj Palabranwanmi yanapämanchi. Bibliachoga tarinchi Jehovapa yachayninta y paypita musyayta munashganchitapis. Chaymi reuniuncunaman y asambleacunaman aywanchi, chaychomi Bibliapita leinchi y shumaj yachacunchi. Chaynomi claro ricacämun Jehová sirvejnincunata yanapaycashganta “juc shongunölla” sirvipäcunanpaj (Sof. 3:9).

9. ¿Imano runataj cashwan Bibliata shumaj tantianapaj? (Lucas 10:21).

⁹ Juctana yachacurcushun Jehovapa yachayninpita. Jehovaga tantiacaj palabracunalawanmi Palabranta escribichimurgan, chaynopa ñanpu shongu runacuna ali tantiapäcunanpaj (leiriy Lucas 10:21). Bibliataga may chaycho caycaj runacunami leipäcun. Juc estudioso runa Biblia más leishga cashganta nergan y ima librupitapis Bibliataga maychica runacuna shumaj estudiashgantapis. Ichanga ñanpu shongu runacunalami Bibliapa consejuncunata ali tantiar practicaman churapäcun (2 Cor. 3:15, 16).

10. Jehová yachaj caycaptenga, ¿imanotaj Palabran yanapaycalämanchi?

¹⁰ Maspis yachacushun imanotaj Jehová yachaj cashgan Bibliacho ricacämun. Diosninchega manami Palabrantaga guelgachimushgachu waquin waquilanlapaj; jucninchi jucninchipämi caycan, shogamänanchipaj y yanapämänanchipaj. Aumi, jucninchi jucninchipämi yarpachacun (Is. 30:21). Ima problemapapis pasarga, ¿manachu ima textulapis shumaj yanapaycalämashcanchi? Aumi, chaynochi cashga. Unaypita canancama maychica runacunapämi Bibliaga guelgacämushga. Canan wichanga lapancunata wamracunatapis mayorcunatapis caway vidancho shumaj yanapacun. Chaynoga caycan yachaj Diosninchi Palabranta quiquin guelgachimushga captinmi (2 Tim. 3:16, 17).

BIBLIAGA MUSYACHIMANCHI JEHOVÁ ALI CAJCUNATA RURASHGANTA

11. Biblia escribiycashgan wichan, ¿imanotaj Jehová ricächicurgan lapancunata igual ricashganta?

¹¹ Jehovaga ali cajcunalata ruraj Diosmi (Deut. 32:4). Pï maytami ali shongulanwan tratan y ali nawilanwan rican (Hech. 10:34, 35; Rom. 2:11). Achca rimaycho Biblia ruracashganmi ricächimanchi chayno Jehová cashganta. Galananpita casi lapan 39 librucunami hebreo rimaycho escribishga cargan, chay wichanpäga Diospa sirvejnincuna chay rimaytami tantiapäcoj. Ichanga punta caj cristianucuna cawashgan wichan achca runacunami griego rimayta parlapäcoj. Chaymi ushanan 27 librucuna griego rimaycho escribishga cargan. Jehovaga munarganchu Palabran juc rimaylacho escribishga cananpaj. Canan wichanga 8.000 millones runacunanomi tucuy idiumata parlapäcun. ¿Imataj yanapacun lapancuna Jehovata reguinanpaj?

12. ¿Imanotaj Daniel 12:4 texto último tiempucho cumplicushga?

¹² Jehová profetan Danielwan wilacushga ushanan tiempucho ‘wilapashgancuna’ más achcaj cananpaj, chayga ninan más runacuna Bibliapita tantiapäcunanpaj (leiriy Daniel 12:4). Cumplicunanpäga Biblia y publicaciuncunapis achcami traducicashga, imprimicashga y aypucashga. Imapitapis Bibliami más traducishga y aypucashga caycan. Bibliapita achca traducciuncunata ranticojcunaga alapa chaninta ranticärin. Ichanga Jehovapa marcan lapanta o waquilanlata 240 rimaypitapis mascho Bibliata traducipäcush, y lapan runacunami gratisla chasquiyta puedin. ¿Imanotaj yanapacushga? Chaychica runacunami tucuy naciuncunapita Tayta Diospa ali wilacuyninta chasquircaycan (Mat. 24:14). Jehová alicunata ruraj Dios captinmi munan chaychica runacuna Palabranta leir payta reguinanpaj. Chaytaga ruran alapa cuyamashpanchimi.

BIBLIAMI MUSYACHIMANCHI DIOS CUYACOJ CASHGANTA

13. ¿Imanotaj Biblia musyachimanchi Dios cuyacoj cashganta? (Juan 21:25).

¹³ Bibliachopis ricanchi Jehová amatar cuyacoj cashganta (1 Juan 4:8). Yarparcushun imacunataj Diosga Bibliacho escribichergan y imacunataj mana. Quiquinmi nimashcanchi imacunata ruranapaj paypa amigun canapaj, cushi cushila caycänapaj y imaycamapis cawanapaj. Jehová alapa cuyamaptinchimi mana necesitashganchicunataga mana escribichirganchu (leiriy Juan 21:25).

14. ¿Imano mastataj Biblia musyachimanchi Jehová cuyacoj cashganta?

¹⁴ Jehová cuyacuywan y respetuwan parlapämaptinchi ricächicun pay cuyacoj cashganta. Jehovaga manami cayta wacta ruranapaj lapantaraj manami escribichimushgachu. Chaypa trucanga, sirvejnincunata ima pasashganpita wilacur, profeciacunawan y consejuncunawan yanapämanchi ali decisiunta acranapaj. Chaynomi Biblia shacyächimanchi payta cuyanapaj y lapan shongunchiwan cäsucunapaj.

15. 1) ¿Imanotaj Biblia musyachimanchi Jehová alapa cuyamashganchita? 2) ¿Imacunaman yarpachacurtaj caycan fotucho yargamoj wamra, mozo y mayor caj paninchi? (Gén. 39:1, 10-12; 2 Rey. 5:1-3; Luc. 2:25-38).

¹⁵ Bibliaga musyachimanchi Jehová alapa cuyamashganchita. ¿Imanirtaj chayta ninchi? Palabranchoga musyachimanchi runacuna imano sienticushganta. Bibliacho caycaj runacunaga “noganchïno runallami” carcaycan (Sant. 5:17). Cushicuypämi caycan, runacunata imano tratashganpita yachacurga ricächimanchi “Tayta Dios ali shonqu y kuyapäkuq” cashganta (Sant. 5:11).

16. ¿Imataj Jehovapita yachachimanchi Bibliacho caycaj arrepenticoj runacunapita? (Isaías 55:7).

¹⁶ Bibliachoga jucnopapis Jehová ricächimanchi cuyacoj cashganta. Jinapis wilamanchi juchata ruraptinchi Jehová mana jaguimänanchipaj. Israelitacunaga Jehovata mana cäsucur cutin cutinmi juchata rurapäcoj, ichanga shongupita arrepenticojcunataga pay perdunajmi (leiriy Isaías 55:7). Punta caj cristianucunapis musyarganmi Jehová paycunata alapa cuyashganta. Chaypäga apóstol Pabluta utilizargan cristiano masincunata yanapänanpaj; perdunacoj y shacyächicoj capäcunanpaj juchata ruraj arrepenticoj runawan (1 Cor. 5:1-5; 2 Cor. 2:6, 7). Unayga pï juchalicojtapis Jehovaga manami nerganchu ‘gampäga ima perdunlapis cannachu’ nir. Chaypa trucanga cuyapargan, yanapargan, anyapargan y payman cutinanpaj munargan. Canan wichan pipis juchalicuptin y nircur arrepenticuptenga chaynola yanapänanpaj aunicun (Sant. 4:8-10).

BIBLIAGA ALAPA VALEJ REGALUMI

17. ¿Imanirtaj ninchi Biblia alapa valej regalo cashganta?

¹⁷ Canan charashganchi Bibliaga juc regalo japuymi caycan; imawanpis manami tincunchu. Yachacushganchino Bibliaga yachachimanchi Jehová Dios ali ruraj, yachaj y alapa cuyacoj cashganta. Jinamanpis Biblia musyachimanchi Jehová payta reguinapaj y amigun canapaj munashganta.

18. ¿Imata rurartaj agradecicushwan Biblia juc valioso regalo cashganpita?

¹⁸ Ama gongashwanchu, Diospa Palabranga alapa valej garaymi cashganta (Sant. 1:17). Chaymi Jehovata ricächishun alapa agradecido caycashganchita. ¿Imanotaj chayta ruranchi? Chayta ruranchi mañacurir, Bibliata leiptinchi y leishganchiman yarpachacuptinchi. Palabranta leinapaj calpachacuptinchega Jehová bendicimäshunmi y paypitaga mastaraj yachacushunpis (Prov. 2:5).