Sansón rurashganno Jehovaman yäracuy

1, 2. ¿Imanirtaj Sansonpa vidanpita yachacunanchi?

¿IMAMANTAJ yarpachacunqui Sansón runapita wiyarga? ‘Payga alapa calpayoj runa cargan’ ninquichi. Chayga rasunmi, pero calpayoj captinpis pantaycurganmi y chayraycur nacargan. Chayno captinpis, Jehovaga ricargan ali yäracoj runa cashganta. Chaymi vidanpita Palabrancho guelgachimurgan yachacunapaj.

² Marcanta chapänanraycur Jehovaga Sansonta yanapashga imaycacunata rurananpaj. Chaymi achca watacuna wanushgana caycaptinpis, Jehovaga apóstol Pabluta guelgachimurgan Sansonpa jutin yurinanpaj waquin Diosman ali yäracoj runacunapa jutincuna yurimushgancho (Heb. 11:32-34). Sansón cawaynincho tucuy jinanpa pasarpis Jehovaman lapan shongunwan yäracurgan. Chaymi canan ricärishun imata paypita yachacunchi y rurashgancuna imano shacyächimanchi.

SANSONGA JEHOVAMAN YÄRACURGAN

3. ¿Imataj Jehová nergan Sansón rurananpaj?

³ Sansón yurishgan wichanpäga, Israel marcaga filisteo runacunapa munayninchomi caycargan (Juec. 13:1). Paycuna alapa fiyu runacuna cashganraycur, israelitacunata pasaypa nacachipäcoj. Chaymi Sansón manaraj yuriptin Jehovaga nergan “paymi Israel runakunata filisteo runakunapa munayninpita jorquyta qalaykunqa” (Juec. 13:5). Chayta Sansón rurananpäga, ¡alapa sasachi cargan! Chaymi, Jehovaman yäracunanrämi.

4. ¿Imanotaj Jehová Sansonta yanapargan? (Jueces 15:14-16).

⁴ Ricärishun Sansón imano Jehovaman yäracushganta. Juc cuticho Sansonta preso charipäcuyta munar filisteo runacuna Lehí marcaman aywapäcurgan. Chayta musyar Judá runacunaga manchacärergan, chaura quiquin marca masincuna wilanacurcur Sansonta mushoj wascawan watarcur o liyarcur filisteo runacunapa munayninman churargan (Juec. 15:9-13). Pero jinan horami ‘TAYTA DIOSPA espiritun yanapaptin’, Sansonga watarashgan wascatapis rachirirgan. “Nirkurmi bürrupa chakawshan [o cachalwan] manaraq shumaq tsakishqa jitaraykaqta aptarkur waranga (1,000) filisteo runakunata wanutsirqan” (leiriy Jueces 15:14-16).

5. ¿Imanotaj musyanchi Sansón Jehovaman yäracushganta?

⁵ ¿Imanirtaj Sansonga burrupa cachalwan cajlata aptarcur peliargan? Payga musyarganmi chiquejnincunata vencinanpäga Jehovaman yäracushganpita cananpaj, manami ima arma cashganpitachu. Chaymi maquincho aptaraycashgalanwan valurcharcurgan Jehovapa voluntäninta rurananpaj. Chaura Jehovaman yäracushpan chiquejnincunata vencirgan.

6. ¿Imataj yachacunchi Sansonpita?

⁶ Jehovaga noganchitapis calpalanta goycamäshun marcancho caycaj ima ruraycunatapis ruranapaj, Paypäga imapis sasachu caycan. Öraga mana yarpashganchi ruraycunatapis ruranchi paypa yanapacuyninwanga. Chauraga gampis Jehovaman yäracuptiquega, Sansonta yanapashganno calpalanta goycushunqui voluntäninta ruranayquipaj (Prov. 16:3).

7. ¿Imataj yachacunchi Robert Jehovapa yanapacuyninta ashishganpita?

⁷ Achca hermanucuna Diosta aduranapaj Wasicunata y localcunata sharcachiycho yanapacärishgancho ricacämurgan Jehovaman yäracushganta. Unaychoga, Diosta aduranapaj Wasicunata y localcunatapis quiquin hermanunchicuna sharcachipäcoj cargan. Canan ichanga Diospa sirvejnincuna masraj miraycaptin cambiucuna cashga. Pushacoj hermanucunaga Jehovapa yanapacuyninta ashiycur camacächergan chay lapancuna jucnopana rurananpaj. Cananga sharcachishga wasicunatana ashipäcun nircur alchachinanpaj. Robert cristianuga achca watacunapa chay ruraycunacho yanapacurgan, y cayno nin: “Unaycho rurashganchicunapita jucnopana ruranapaj nimaptinchega, puntalachoga sasami cargan cäsucunapaj. Chayno captinpis, hermanulanchicunaga calpachacurgan cushi cushilami cäsucärinanpaj y ricashganchimi Jehová bendiciycashganta”. Caywanga claro ricacan Jehová marcanta pushaycashganta voluntänin ruracänanpaj. Chaymi ali canman cayno tapucunapaj: “¿Jehovapa yanapacuynintachu imaypis ashiycä y calpachacöchu nimashgancunata cäsucunäpaj?” nir.

JEHOVAPA YANAPACUYNINWANMI SANSÓN IMAYCATA RURARGAN

8. ¿Imataj Sansón rurargan pasaypa yacunaycaptin?

⁸ Yarpanquichi Sansón imaycacunata rurashganta. Juc cuticho quiquilanmi juc leonta wanurachergan, y filisteo runacunata Asquelón marcapita 30 runacunata wanurachergan (Juec. 14:5, 6, 19). Sansonga musyarganmi chay lapan rurashgancunaga Jehovapa yanapacuyninwanraj cashganta. Chaymi juc cuticho waranga filisteo runacunata wanuchishganpita pasaypa yacunaycaptin, quiquilan yacuta ashinanpaj trucan Jehovata ruwacurgan camaripänanpaj (Juec. 15:18).

9. ¿Imanotaj Jehová contestargan Sansón mañacushganta? (Jueces 15:19).

⁹ ¿Imanotaj Jehová contestargan Sansón mañacushganta? Jehovaga ucrupita yacuta pashtachimurgan. Sansonna chayta upurcuptin “valornin yapay yurirkurqan” (leiriy Jueces 15:19). Profeta Samuel Jueces libruta escribinanpaj wichanpäga, chay pashtamushgan yacuga jinalami caycargan achca watacuna pasashgana captinpis. Chaura israelitacuna chayta ricaycurga, yarparganchi Jehovaman yäracäriptenga imaypis yanapänanpaj imayca sasacunapa pasaptinpis.

10. ¿Imataj rurashwan Jehová yanapämänanchipaj? (Fotucunatapis ricay).

¹⁰ Noganchipis Sansón rurashganno Jehovapa yanapacuyninta ashishwan. Achca watapana Jehovata sirvir imaycata rurayta mayna musyaycarpis jinala paypa yanapacuynintaraj ashishwan. Chaynopa ima rurashganchicunapis ali yargunga y quiquinchi yachashganchilamanga ama yäracuycäshunchu. Jehová camaripashgan yacuta upuptinrämi Sansonpa calpanga yurirgan. Chaynolami ali yäracoj runa cashun Jehovapa tucuy yanapacuynincunata ashiptinchiraj (Mat. 11:28).

11. ¿Imatataj rurashwan ima problemacunatapis aguantanapaj? Alexéi warminwan rurashganpita wilacamuy.

¹¹ Alexéi hermanunchipita parlarcushun, payga Rusia naciuncho Testigo cashganraycur imayca sasacunapa pasaycan. ¿Imataj payta yanapargan jinala aguantananpaj? Cayno wilacun: “Waran waran warmïwan calpachacärë Bibliata leipäcunäpaj y leishgäcunaman yarpachacärinäpaj. Nircur, tutacunapaj acracämushga textucunatapis leipäcö y ishcäcuna Jehovata mañacärë”. Alexéi warminwan rurashganpitaga yachacunchi imatapis aguantanapäga Jehovapa yanapacuynintaraj ashishwan. Chaypäga Biblianchita leinanchi, mañacunanchi, reuniuncunaman y predicaciunmanpis aywananchi, chaynopa ali yäracoj runacunaman ticrashwan. Chay lapanta ruraptinchega Sansonta yanapashganno noganchitapis Jehová calpalanta gomäshun mana yamacaypa payta sirvir caycänapaj.

SANSÓN PANTAYCURPIS JEHOVATA CACHAYCURGANCHU

12. ¿Imanirtaj ninchi Dalilata Sansón cuyashganga mana ali cashganta?

¹² Sansón noganchino juchasapa runa cashpan pantaycurgan. Jehovapa marcanpa juezninno caycaptin juc cuticho ‘Sorec pampacho taq Dalilata Sansonqa kuyakurkurqan’ (Juec. 16:4). Pero Dalilata manaraj reguirmi, juc filistea jipashwan casaracuyta munargan. Y Bibliaga nin chayga cargan ‘filisteo runakunata achäquita ashipänanpaq TAYTA DIOS tsay yarpayta Sansonman churashganpita’. Juc cutichopis, Gaza marcaman aywaycur Sansonga juc wayrapacoj warmipa wasincho pacaräcurgan, pulan pagaschona chay marcata täparaycaj puncuta jorgurir hombrucurcur apacurgan. Chaytaga rurargan filisteo runacunata vencinanpaj (Juec. 14:1-4; 16:1-3). Ichanga Dalilaga israelita warmichi cargan y chayga manami yanapargannachu Sansón filisteo runacunata vencinanpaj.

13. ¿Imanotaj Dalila Sansonta traicionargan?

¹³ Filisteo runacuna Sansonta preso charipäcuyta munar, Dalilata achca guellayta pagargan traiciunananpaj. ¿Sansonga manachuraj musyargan Dalila imata munaycashganta? Chay warmita alapa cuyar, ¿locutashgachuraj caycargan? Imano captinpis, Dalila cutin cutin tumpala tapupaptin calpan maypita yurishganta, payga mana wilacunanpaj cajta wilacurgan. Chayta rurashganraycur Sansonga calpanta ogrargan, y Jehovapa yanapacuynintapis manami chasquirgannachu (Juec. 16:16-20).

14. ¿Imataj Sansonta pasargan Dalilaman yäracushganpita?

¹⁴ Jehovaman yäracunanpaj trucan Sansonga Dalilaman yäracurgan, chaymi mana alicho ushargan. Filisteo runacunaga Sansonta preso chariycur ishcan nawinta jorgurgan. Nircur Gaza marcaman apaycur, carcelcho cadenawan watapäcurgan rumi molinuta tumachinanpaj. Paycuna yarpapäcurgan diosnin Dagón Sansonta maquinman cachaycushganta, chaymi juc fiestata rurargan y sacrificiucunata rupachipäcurgan. Jina cushicärishpan cayno nipäcurgan “¡Sansónta burlakunantsipaq carcilpita apamuy!” nir (Juec. 16:21-25).

15. ¿Imata rurartaj Sansonga Jehovapa yanapacuyninta yapay ashirgan? (Jueces 16:28-30; garancho caycaj dibujutapis ricay).

¹⁵ Sansón pantaycurpis Jehovata manami cachaycurganchu. Payga valurcharcur Jehovapa voluntäninta jinala rurayta munargan (leiriy Jueces 16:28-30). Chaymi mañacuynincho cayno nergan: “TAYTA DIOS, kalpä yurinanpaq yapay yanapaykalämay. Tsaynöpami […] filisteo runacunata ushakätsishaq”. Jehovaga mañacuyninta wiyargan y calpanta yapay yurichergan. Chaura chay cuticho filisteo runacunata Sansón wanuchishganga más achca cargan unaycho wanuchishganpitapis.

16. ¿Ima alicunataj Sansonpita yachacunchi?

¹⁶ Sansón pantashganraycur o mana alita rurashganraycur alapa nacaycarpis, yapay valurcharcurgan Jehovapa voluntäninta rurananpaj. Noganchipis öraga imalachopis pantashwanmi, chaura pilapis corrigimäshunmi o maygan carguchopis manana yanapacunapaj nimäshun. Chayno captinpis jinala calpachacushun Jehovata sirvinapaj. Payga ali nawilanwan ricamäshun calpachacuptinchi voluntäninta ruranapaj (Sal. 103:8-10). Pantaj runa captinchipis, Sansonno Jehovapäga valuryoj caycanchi.

17, 18. Gampis imalachopis pantarcuptiqui, ¿imataj yachacunqui Michael rurashganpita? (Fotucunatapis ricay).

¹⁷ Michael jutiyoj mozo hermanunchipita parlarcushun. Payshi siervo ministerialno y precursornopis ali yanapacuycargan. Ichanga pantaycushganraycurshi chaycunata rurayta puedirgannachu. Payga nin: “Jehovata sirvir ali yanapacuycargä, ichanga ilajpita lapanta ograshcä. Musyargämi Jehová mana jaguimänanpaj cajta, ichanga cayno tapucoj cä: ‘¿Imaylapis Jehovawan yapay amigo cashächuraj y congregaciunchopis unayno yapay yanapacushächuraj?’” nir.

¹⁸ Michaelga yarpaylapis yarparganchu Jehovata cachaycunanpaj. Payga nin: “Calpachacurgä Jehovata masraj mañacunäpaj, paypita yachacunäpaj y leishgäcunaman yarpachacunäpaj, chayga yanapämargan payman masraj guelicamunäpaj”. Pay rurashganga alipämi cargan, tiempuwanga Michael yapay precursorno y ancianuno yanapacur galaycurgan. Payga wilacun: “Ancianucuna yanapämashganta ricar cuentata gocurgä Jehová jinala cuyaycämashganta. Cananga payta ali concienciäwan sirviycä. Cayga tantiachimargan pipis arrepenticuptenga Jehová listo caycan perdunananpaj”. Noganchipis Michaelno calpachacuptinchi mana ali rurashganchicunata corriginapaj y Jehovapa yanapacuyninta ashiptinchega, payga bendecimäshunmi y ali nawilanwan ricamäshun (Sal. 86:5; Prov. 28:13).

19. ¿Imata ruranayquipätaj Sansón rurashgancuna yanapäshunqui?

¹⁹ Cay yachacuychoga waquilanlata yachacushcanchi Sansonpa cawayninpita. Pay juchasapa cashganraycur Dalilawan cananpaj mana alita acrashga carpis, jinala valurcharcurgan Jehovata sirvinanpaj. Jehovapis paytaga manami cachaycurganchu. Paypa ricayninchoga ali yäracoj runa cargan, chaymi Hebreos 11 caj capitulucho Diosman yäracoj runacunapa jutincuna caycashgancho Sansonpa jutintapis Jehová churargan. Amatar cushicurculanchi Taytalanchi Jehová alapa cuyamaptinchi, calpanta gomaptinchi y sasa problemacunata aguantanapaj yanapämaptinchimi. Chaymi Sansón rurashganno Jehovata nishun: “TAYTA DIOS, kalpä yurinanpaq yapay yanapaykalämay” (Juec. 16:28).