Jehová “sumaj balurta goshunquipaj”

1. ¿Pitaj calpata gorgan Diospa unay sirvejnincunata?

BIBLIAGA wilacun unaycho Diospa waquin sirvejnincuna alapa calpayoj cashganta, chayno captinpis öraga calpaynaj ricacurgan. Rey Davidpis gaga japuyno calpayoj ricacurpis, öraga pasaypa manchacuywan caycargan (Sal. 30:7). Jehovapa espiritunwanmi Sansonpis calpasapa runa cargan, ichanga musyarganmi Jehová mana yanapaptenga “kalpaynaqna rikakur wakin runanölami” cananpaj cashganta (Juec. 14:5, 6; 16:17). ¿Pitaj paycunata calpata gorgan? Jehová.

2. ¿Imanirtaj Apóstol Pablo nergan “kalpaynaq karpis kalpayuqmi rikakü” nir? (2 Corintios 12:9, 10).

² Apóstol Pablo musyargan Jehovapa yanapacuynintaraj necesitashganta (leiriy 2 Corintios 12:9, 10). Apóstol Pablupis noganchinomi gueshyawan nacargan (Gál. 4:13, 14). Ali cajta rurayta munarpis öraga pantaycojmi (Rom. 7:18, 19). Y sasacunapa pasar ‘wañushächari’ nirpis yarpajmi (2 Cor. 1:8, 9). Chayno captinpis payga nergan: “Kalpaynaq karpis kalpayuqmi rikakü”. Aumi, payga Jehovapa yanapacuyninwanmi calpayoj ricacurgan.

3. ¿Imapitataj yachacushun cay yachachicuycho?

³ Noganchitapis Jehová aunimanchi valurta gomänanchipaj (1 Ped. 5:10). Chayno cananpäga calpachacunchirämi. Ali saludyoj caycänapäga ali micuycunami caycan. Ichanga yanapämänanchita munarga calpachacunanchirämi chay micuycunata micunapaj. Chaynolami Jehovapa calpanta chasquinapäga, quiquinchirämi calpachacunanchi ashinapaj. Canan ricärishun, ¿imanopataj Jehová valurta goycämanchi? ¿Y imataj rurashwan chay yanapacuyninta chasquinapaj? Chaypäga ricärishun imanopataj Jehová yanapargan Jonasta, Mariata, apóstol Pabluta y canan wichan cristianucunatapis.

CALPATA TARISHUN MAÑACUPTINCHI Y BIBLIANCHITAPIS ESTUDIAPTINCHI

4. ¿Imatataj rurashwan Jehovapa calpanta chasquinanchipaj?

⁴ Jehová calpanta goycalämänanchipäga paytami mañacunanchi, chayta rurarga Diosninchega poderninwanmi yanapaycalämäshun (2 Cor. 4:7). Jina Bibliata leishganchimanpis yarpachacunanchimi (Sal. 86:11). Jehovapa Palabranga poderyojmi o “munayniyuq kaykan” (Heb. 4:12). Chauraga Jehovata mañacuptiqui y Palabranta leiptiquega, payga calpanwan yanaparcushunqui aguantanayquipaj, cushishgala sirvinayquipaj y ima sasa cargucunatapis cumplinayquipaj. Ricärishun imanomi Jehová Jonasta valurta gorgan.

5. ¿Imanirtaj Jonasga calpata necesitargan?

⁵ Jehová Jonasta juc carguta gorgan. Ichanga chayta rurananpaj manchacurmi, juc ladupaj aywaj buquiman wicharcur gueshpir aywacurgan. Chayraycur, buquicho caycajcuna casi wanupäcurgan locu tamyawan. Yacu pulchajyar galaycuptin Jonasta lamarman jitarergan y juc jatuncaray pescado ultacurcurgan. ¿Imanoraj payga ricacurgan? ¿Canan ‘wañushächari’ nir yarparganchuraj? ¿Jehová gongaycushgantachuraj yarpargan? Imano captinpis, alapa manchacashgachi caycargan.

6. ¿Imataj Jonasta calpata gorgan jatuncaray pescadupa pachancho caycaptin? (Jonás 2:1, 2, 7).

⁶ Jonás jatuncaray pescadupa pachancho caycar Jehovata mañacurgan valurta goycunanpaj (leiriy Jonás 2:1, 2, 7). Payga musyarganmi rurashganpita arrepenticuptin y shongupita mañacushgantaga Jehová wiyananpaj. Jina, payga yarpachacurganmi Diospa Palabrancho leishganman. Jonás librucho ishcay caj capitulucho pay mañacushganga, tincunmi Salmos librucho waquin capitulucuna wilacushganwan (Jonás 2:2, 5 textuta tincuchiy, Salmo 69:1; 86:7 textucunawan). Jonasga Diospa Palabranta ali reguejmi. Y, chayman yarpachacur yäracurgan Jehová yanapänanpaj cajta. Chaymi pescadupa pachanpita yargushgana captin, camaricushga caycargan cargunta shumaj cumplinanpaj (Jon. 2:10–3:4).

7, 8. ¿Imataj juc cristianuta yanapargan sasacunapa pasaptin?

⁷ Jonás rurashganga noganchitapis yanapämanchi ima sasacunapapis pasaptinchi. Taywanpita Zhimingb cristianupita parlarcushun. Payshi fiyu gueshyawan nacaycan y Testigo cashganraycur familiancuna alapa chiquipan. ¿Imataj payga ruran valurta chasquinanpaj? Jehovata mañacun y Biblianta leircun. Payga nin: “Imayca problemacunaraycur yarpachacuycunawan caycarga valornëpis canchu Bibliata leinäpaj”. Pero payga calpayoj ricacunanpäga puntata Jehovatash mañacun y Diosta alabanapaj canciuncunatapis wiyarcun. Jina öraga chay canciuncunata quiquilan cantar galaycun shongun ancash ricacushganyaj. Nircur Bibliantapis yachacun.

⁸ Zhiming cristianutaga publicaciuncunacho quiquilan yachacushganshi yanapargan calpata tarinanpaj. Juc cuticho, operacushganpita aliyarcuycaptinna doctorash nergan débil caycashganraycur yawarta churacunanpaj. Pero operacunanpaj juc junaj pishiycaptin, payga juc revistacho leishga cargan juc cristiana paypita más débil caycaptinpis yawarta mana chasquishganta, y shumaj aliyargan. Chayta leirshi paytaga calpata gorgan Jehovalata cäsucunanpaj.  

9. Ima pruebapapis pasar calpaynaj caycarga, ¿imataj ruranquiman? (Dibujuwan fotutapis ricay).

⁹ Pruebacunapa pasar laquishga caycaptiqui, ¿sasachu caycan mañacunayquipaj o ganasniquipis canchu Bibliayquita leinayquipaj? Chayno captenga ama gongaychu Jehovaga musyanmi imano sienticushgayquita. Chaymi, calpaynaj caycar shumaj oraciunta mana rurarpis, seguro canayqui Jehová wiyashunayquipaj cajta (Efes. 3:20). Chauraga imalayquipis nanäshuptiqui o ganasniqui mana captin leinayquipaj y estudianayquipaj, ali canman Biblianchipita o publicaciunninchicunapita grabraciuncunata wiyanayquipaj. Jina jw.org paginacho caycaj videucunata ricarcuptiqui o canciuncunatapis wiyaptiquega yanapäshunquimi. Chay lapanta ruraptiquega “Jehová calpayquiwan yanapaycalämay” niycashgayquinomi canga.

CALPATA TARISHUN HERMANUNCHICUNA YANAPÄMAPTINCHI

10. ¿Imanotaj hermanunchicunaga calpata gomanchi?

¹⁰ Jehovaga hermanunchicunawan calpata gomanchi. Ima sasacunapapis pasaptinchi o maygan cargutapis cumplinapaj sasa captenga, paycunaga ‘shumaq shakyätsimantsi’ (Col. 4:10, 11). ‘Ima nakaycho kaptintsimi’ hermanunchicunaga familianchicunanomi yanapämanchi (Prov. 17:17). Calpaynaj ricacushganchi hora, paycunaga imalawanpis yanapämanchi, shogamanchi y Bibliawanpis shacyächimanchi. Ricärishun Jesuspa maman María imanomi calpata y valurta tarergan.

11. ¿Imanirtaj María calpata necesitargan?

¹¹ Mariaga valurcharcunanrämi cargan Jehovapa voluntäninta cumplinanpaj. Payga alapachi yarpachacurgan ángel Gabriel wilacuptin Jesuspa maman cananpaj cajta musyar. Manaraj casacur gueshyaj ricacunan cargan, y chaylaraj juc wamratapis uywanan cargan. Payga juc runawanga manami imaypis cacurganchu o punurganchu, y noviun Josetapis wilanan cargan gueshyaj caycashganta (Luc. 1:26-33).

12. Lucas 1:39-45 nishganno, ¿imanotaj Mariaga calpata tarirgan?

¹² María chasquishga carguta ali cumplinanpäga waquincunapa yanapacuynintaraj ashergan. Ángel Gabrielta nergan maslata wilacunanpaj imano Diospa Wamranta ashmananpaj (Luc. 1:34). Nircur, juc viajitapis rurargan aylun Elizabet-ta watucunanpaj. Chayta rurashganga ¡alipämi cargan! Elizabetga felicitaycurganmi Mariata, y Diospa espiritunpa yanapacuyninwan juc profeciatapis wilacurgan Jesuscho cumplicunanpaj (leiriy Lucas 1:39-45). Chayta wiyar, Mariaga cushicur Jehovapita parlar nergan “pipis mana rurashqankunatami payqa ruran” (Luc. 1:46-51). Jehovaga Gabrielwan y Elizabetwan Mariata shacyächergan.

13. ¿Imataj Dasurí rurargan hermanucuna yanapänanpaj?

¹³ Mariata waquincuna yanapashganno gamtapis hermanunchicunaga yanapäshunquimi. Boliviapita Dasurí cristiana imapa pasashganta ricärishun. Taytanshi fiyu gueshyawan nacaycaptin hospitalmanraj apargan, y Dasuriga payta cuyashganraycur shumaj cuidayta munargan (1 Tim. 5:4). Ichanga chayta rurananpäga manami facilchu cargan, waquincunapa yanapacuynintaraj necesitargan. Pero payga nin: “Japalä lapanta rurar utishga caycarpis waquincunapa yanapacuyninta ashirgächu, juccunapa afán cayta mana munar ‘Jehovalami yanapämanga’ nej cä. Ichanga chayno rurar cuentata gocurgä quiquilä problemäcunawan luchaycashgäta” (Prov. 18:1). Chaura Dasuriga waquin amiguncunata wilacurgan imacunapa pasaycashganta. Chayta rurashganpita, cayno nin: “Cuyashgalä hermanucunata cutin cutin ‘päquila päquila’ nëmi alimi yanapämashganpita y shacyächimashganpita. Paycunaga micuytapis hospitalman apapäcamaj y Bibliapita textucunawanpis shacyächipäcamaj. ¡Cushicömi japalä mana caycashgäpita! Jehovapa familianga mayna yanapaycämanchi, wagarpis noganchiwan wagarcunraj, mana jaguimanchichu”.

14. ¿Imanirtaj ancianucunapa yanapacuyninta chasquishwan?

¹⁴ Jehovaga ancianucunawanpis calpata gomanchi. Paycunaga imaypis listo carcaycan shacyächimänanchipaj y shogamänanchipaj (Is. 32:1, 2). Chaymi imalapis yarpachacächishuptiquega ancianucunawan parlacamuy y yanapäshunayquita munarga chasquicuy. Jehovaga paycunawan yanapämanchi calpayoj ricacunapaj.

CALPATA TARISHUN JEHOVÁ AUNIMASHGANCHICUNAMAN YARPAR

15. ¿Imataj lapan sirvejnincunata Jehová aunimanchi?

¹⁵ Bibliapa ali wilacuynincunaga calpata gomanchi (Rom. 4:3, 18-20). Lapan sirvejnincunatami Jehová aunimanchi imaycamapis cawayta tarinapaj cielucho cajpis y cay Pachacho cajcunapis. Jehová aunimashganchiman yarparga calpata tarinchi pruebacunata aguantanapaj, jinala predicanapaj y congregaciuncho cargucunatapis cumplinapaj (1 Tes. 1:3). Ricärishun imanotaj chayga apóstol Pabluta yanapargan.

16. ¿Imanirtaj apóstol Pabluga calpata necesitargan?

¹⁶ Pablo öraga calpaynaj ricacurgan. Corintio cristianucunata cartacamur quiquinpita parlar nergan mitu manca debilno cashganta. Runacuna payta chiquipar ashlipargan, magargan y wanuchiytapis munargan (2 Cor. 4:8-10). Quimsa caj viajincho caycar Pablo cay lapanta escribergan. Payga manachi yarparganchu más sasa problemacunaparaj pasananpaj cajta. Chay viajilacho caycar achca runacuna magar ushargan, lamarcho talpucar cäsi wanurgan y carcilchopis wichgarachergan.

17. 2 Corintios 4:16-18 nishganno, ¿imataj Pabluta yanapargan calpata tarinanpaj?

¹⁷ ¿Imataj Pabluta yanapargan imaycacunatapis aguantananpaj? Payga Dios aunishgancunaman yarpachacoj (leiriy 2 Corintios 4:16-18). Chaymi Corintio cristianucunata nergan cuerpun “awkisyar lasaptinpis”, shongunchoga cushishga caycashganta. Payga yarpachacoj shamoj tiempucho ali cawananpaj cajman. Chaymi Dios aunishgan cawayman yarpar nergan: “Tsay kawaymanqa manami imapis kay patsacho kaqkuna tinkuntsu”. Chay cawayta tarinanpaj munarmi Pabluga decidido caycargan imatapis aguantananpaj. Dios aunishganman yarpar “waran waran mas mözunömi” ricacurgan.

18. ¿Imanotaj ricacärin Tíjomer y familianpis Dios aunicushgancunaman yarpar?

¹⁸ Ricärishun Bulgariapita Tíjomir cristianuta imano yanapashganta Diospa aunicuynincunaman yarpachacuptin. Pasaj watacunachoshi Zdravko jutiyoj shulca caj wauguin juc accidenticho wanurgan. Chayga pasaypa laquicuypämi cargan. ¿Imataj payta y familianta yanapargan laquicuycarla mana caycänanpaj? Paycunaga yarpachacärin wanushgacuna cawarimunanpaj cajman. Tíjomir nin: “Parlapacunchi maycho payta chasquinapaj, ima micuytataj rurapänapaj, pïcunatataj chay junajpa invitanapaj y cay ushanan junajcunapita imacunatataj wilapänapaj”. Chayman yarpachacurshi Tíjomir y familianga calpata taripäcun y decidido carcaycan wanojcunata Jehová cawarichimunanpaj junajta shuyarpänanpaj.

19. ¿Imataj ruranquiman Jehovapa aunicuyninman lapan shonguyquiwan yäracunayquipaj? (Fotucunatapis ricay).

¹⁹ ¿Imataraj ruranquiman Diospa aunicuyninman lapan shonguyquiwan yäracunayquipaj? Pachacho cawanayquipaj captenga, ali canman leinayquipaj paraisupita Biblia wilacushganta y chayman yarpachacunayqui (Is. 25:8; 32:16-18). Yarpachacuy paraisucho cawayninchi imano cananpaj cajman. ¿Chaychochu cashgayquita ricacunqui? ¿Pitataj ricanqui? ¿Imataj wiyanqui? ¿Imanotaj sienticunqui? Chaypäga publicaciunninchicho paraisupita yargamoj dibujucunata shumaj ricay. Jina ali canman videuyoj canciuncunatapis ricanayquipaj, caycunami: Alinami cawacuyculäshun, Chayaycämunna y Mayna chay junajman yarpaycä. Chay lapanta rurarga ima problemacunatapis ushacajtanola ricanquipaj (2 Cor. 4:17). Jehovapa aunicuynincunaman yarparga calpata tarinqui.

20. Calpaynaj ricacushganchi hora, ¿imatataj rurashwan calpata tarinapaj?

²⁰ “Tayta Dios yanapamaptintsiqa” calpaynaj caycarpis calpayojmi ricacushun (Sal. 108:13). Chaypäga achca yanapacuycunatami gomanchi. Chauraga ima cargutapis cumplinapaj sasa captin, pruebacunata aguantanapaj y Jehovata cushishgala sirvinapäga, payta mañacuy y Bibliata leishgayquimanpis yarpachacuy. Jina hermanucunapa yanapacuynintapis ashiy y Diospa aunicuyninmanmi yarpay. Chay lapanta ruraptiquega Jehovaga calpanwan yanaparcushunqui mana ajayaypa aguantanayquipaj (Col. 1:11).