¿Pacienciawan y cushishgalachu Jehová aunishganta shuyaraycanchi?
RICAJ ricajlachi Jehová lapan mana alicunata ushacächinanpaj y lapantapis mushojtana rurananpaj shuyaraycanqui (Apoc. 21:1-5). Chaytami lapanchipis munaycunchi, pero öraga manami facilchu Jehová aunishganta pacienciawan shuyaränapaj, masraj mana alicunapa pasaptinchi. Chaymi Bibliaga cayno wilacun: “Yarpashqanno mana kamakaptinqa pipis pasaypami lakikun” (Prov. 13:12).
Chayno captinpis, Jehovaga munan pacienciawan shuyaränapaj pay aunishgan junaj chayamunancama. ¿Imanirtaj Jehová pacienciawan shuyaränapaj munan? Y ¿imataj yanapämäshun cushi cushila shuyaränapaj?
IMANIRTAJ JEHOVÁ MUNAN SHUYARÄNAPAJ
Bibliami cayno wilacun: “TAYTA DIOSMAN yärakuyta mana munaptikipis kuyapäkuq y ali kaqlata ruraq karmi payman yärakärinaykita shuyaraykäshunki. Payman yärakäriptikiqa kuyapäshushpaykimi yanapashunkipaq. Payman yärakuqkunaqa ali kawaytami taripäkunqapaq” (Is. 30:18). Profeta Isaías cay palabracunatami mana cäsucoj judiucunata nergan (Is. 30:1). Chay wichanga cäsucoj judiucunapis carganmi. Y Isaías nishganga paycunata yanapargan Dios aunishganta shuyarcaycänanpaj, chaymi canan wichan noganchitapis yanapämäshun.
Chauraga, ¿imanirtaj pacienciawan shuyarashwan? Jehovapis pacienciawan shuyaraycan. Payga musyanmi imay junaj imay hora mana ali runacunata ushacächinanpaj, y shuyaraycan chay junaj chayamunanpaj (Mat. 24:36). Chay junaj chayamuptin, Satanás Jehovapita y sirvejnincunapitapis mana ali parlashganga clarumi ricacämunga lula cashganta. Chaymi Satanasta y gatejnincunatapis Jehová lapanta ushacächenga. Pero yäracoj sirvejnincunataga paymi cuyapashganraycur yanapanga.
Chauraga shuyarashganchicama Jehovaga lapan nacachimashganchicunata manami ushacächingarächu. Chayno captinpis cushishga cawanapämi nimanchi. Profeta Isaías nishganno cushi cushila shuyaraycäshun ali cawayta tarinanchicama (Is. 30:18). ¿Imaraj yanapämäshun cushishgala shuyaränapaj? Cay chuscu ruraycunami yanapämäshun.
IMANOTAJ CUSHI CUSHILA SHUYARASHWAN
Ali cajcunalaman yarpänanchi. Rey David cawashgan wichan fiyu runacunalami may chaychopis cargan (Sal. 37:35). Chayno captinpis, caytami David nergan: “TAYTA DIOSMAN yärakur ama lakikuytsu. Yanapashunaykipaq mana ajayaypa shuyaray. Runa rïcuyaptin ama nanaparaytsu. Mana alita rurananpaq yarpachakuptinpis ama cäsupaytsu” (Sal. 37:7). Quiquin Davidmi chayta imaypis yarpargan. ¿Imano? Payga Jehová yanapänanpaj aunishgan cajmanmi imaypis yarparaj. Jina, Dios paypaj alicunata rurashgantami alapa valurargan (Sal. 40:5). Noganchipis cawayninchicho ali pasamashganchicunaman yarparga yanapämäshun Jehovalaman shuyaränapaj.
Cawashganchicama Jehovata imaypis alabashun. Salmo 71 libruta escribej caynomi Jehovata nergan: “Noqaqa imayyaqpis qamlatami shuyaraykäshayki. Waran waranmi qamta alabashayki” (Sal. 71:14). ¿Imacunataj rurargan Jehovata alabananpaj? Jehovapita waquincunata parlapaj y cantacunawanpis alabaj (Sal. 71:16, 23). Noganchipis Davidno amigunchicunata y familianchicunata Diospita parlapaptinchi Jehovatami alabaycanchi, jina cantacunawanpis alabanchi. Chaymi Diospaj cantashgayqui hora canciunpa letrancunaman yarparay ima nishganman. Chay lapanta ruraptinchi cushi cushilami Jehová aunishganta shuyaraycäshun.
Tiempunchita camacächishun hermanunchicunawan goturänapaj. David sasacunapa pasashgan horacho Jehovata cayno nergan: “Qamman yärakamuqkunapa nawpanchömi imaypis alabashayki” (Sal. 52:9). David yäracoj masincunawan goturashganraycur shacyächishga ricacargan, chaynolami noganchipis hermanunchicunawan reuniuncho, predicaciuncho o maycho caycarpis paycunawan juntacarga shacya shacyala ricacushun (Rom. 1:11, 12).
Imata shuyarashganchiman masraj yäracushun. Salmo 62:5 nin: “Tayta Dioslami jawkala kawanäpaq yanapaman. Paylamanmi imaypis yärakü”. Cay mundupa ushacaynin yarpashganchino mana chayamuptinpis, yäracunanchi imata shuyarashganchicuna rasunpa cumplicunanpaj cajta. Ayca watacuna shuyaränapaj captinpis seguro caycashwan Jehová lapan aunishgancunata cumplinanpaj cajta. Chaypäga, ¿imataj yanapämäshun? Bibliapita yachacur yarpachacunanchi lapan profeciacuna imano cumplicushganta y imataj Jehovapita yachacushganchitapis (Sal. 1:2, 3). Cada cadala Jehovata mañacur, espíritu santunpaj mañacushun yanapämänanchipaj paywan más ali amigo canapaj (Jud. 20, 21).
Noganchipis rey Davidno segurumi caycashwan Jehová payman shuyarajcunata o yäracojcunata yanapashganta y cuyashgantapis (Sal. 33:18, 22). Chauraga pacienciawan Jehovalaman shuyaränapaj ali cajcunaman yarpänanchi, imaypis Jehovata alabashun, hermanunchicunawan junto caycäshun y imata shuyarashganchicuna rasunpa cumplicänanpaj yäracushun.