Liejcuna tapucärishgan
Jesuspa 70 caj discipuluncunaga, ¿imanirtaj caycarganchu Último Cenacho? ¿Paycunaga Jesusta jaguirganchuraj?
Manami. Señor Jesuspa cenan rurashgancho 70 discipuluncunawan mana caycaptinpis, paycunaga jinala Jesusta gatirpaycargan. Jesús chay chacaycho apostulnincunalawan juntacayta munargan.
12 caj apostulnincunata y 70 caj discipuluncunatapis Jesusga chasquirgan gatirajnincuna cananpaj. Lapan gatirajnincunapita 12 runacunata acrargan apostulnincuna cananpaj (Luc. 6:12-16). Galileacho caycar “chunka ishkay” apostulnincunata gayaycur “wilakärinanpaq y qeshyaqkunata aliyätsinanpaqpis mandargan” (Luc. 9:1-6). Chaypitaga Judea marcacho caycar, 70 “discïpulunkunata akrarkur Señor Jesús ishkay ishkay kacharqan” (Luc. 9:51; 10:1). Chauraga may chaycho predicashgan marcacunacho gatirajnincuna caycargan.
Judiucuna Jesuspa discipuluncunaman ticrajcuna Pascua fiestata rurapäcojchi familiancunawan (Éx. 12:6-11,17-20). Wanunanpaj ichiclana pishiycaptin, Jesús apostulnincunawan Jerusalenman aywargan. Ichanga Jesús manami nerganchu Judea, Galilea y Perea marcacho caycaj discipuluncunata paywan Pascua fiestata rurananpaj, sinoga apostulnincunalawanchi Pascua rurayta munargan. Chaymi Jesús apostulnincunata cayno nergan: “Pasaypami munashqä manaraq wanur kay Pascua mikuyta qamkunawan mikuyta” (Luc. 22:15).
¿Imanirtaj paycunalawan Pascua fiestata rurargan? Ichiclachona Jesús wanunan cargan ‘Tayta Dios kachamushqa Carnishno runakunata jutsankunapita’ perdunananpaj (Juan 1:29). Unaypitana Jerusalencho, Diospaj sacrificiucunata rurapäcoj. Y chaycho Jesuspis wanunanmi cargan. Israelitacunaga Pascuacho uyshata micupäcoj Egiptupita Dios librashganta yarpapäcunanpaj (1 Cor. 5:7, 8). Pero Jesús wanushganga chaypita más valuryojmi cargan, chaymi Jesús wanushganpita 12 apostulcunana congregaciuncunata pushargan (Efes. 2:20-22). Apocalipsis librucho wilacun sagrado marca Jerusalén cimientashga caycan ‘chunka ishkay rumikunawan’, cada rumichomi ‘Carnishpa chunka ishkay apostolninkunapa jutinkuna’ escribiraycan (Apoc. 21:10-14). Chauraga chay chunca ishcay apostulcuna Jehovapa voluntänin ruracänanpaj autoridäyoj carcaycargan. Chaychi Jesusga paycunalawan Pascua micuyta munargan. Nircur chay chacaylacho Última Cenata rurananpaj
Jesuspa discipuluncunaga achcajmi cargan. Ichanga Jesuswan chay Cenacho mana caycarpis, chay chunca ishcay apostulcunanomi paycunapis Jehovapa voluntäninta rurananpaj autoridäyoj capäcunga. Jesús chunca ishcay apostulnincunawan juc contratuta rurashga, tiempuwanga lapan cielupaj acrashgacunapis chay contratucho carcaycanga (Luc. 22:29, 30).