Imataj rurashwan Diosta sirvir yarpachacur laquicurga

1, 2. 1) ¿Imatataj öraga tapucunchi? 2) ¿Imatataj canan yachacushun?

IMATA decidirpis öraga lapanchimi tapucunchi ‘munashgäga camacangachuraj o manachuraj’ nir. Caycunaman yarpachacushun, juc jovinshi tapucun ‘Jehová cuyamanchuraj o manachuraj’, jina chayraycu manchacunshi bautizacunanpapis. Juc hermanuna guellayta ashinanpaj trucan jovinlapita Jehovata sirvir galaycun, canan ichanga chay hermanuga familiayojna car tapucunshi imano manteninanpaj y payga ‘unay decidishgäga alichuraj cashga’ nirpis yarpachacunshi. Jina juc edayashga cristiana calpaynajna car laquicun jipash cashganman wichan yarpachacur. Chaynola mayganninchipis capaz cayno tapucushcanchi: “¿Jehová nogapaj yarpachacunchuraj? ¿Payta sirvinäpaj lapan decidishgäcunaga alipächuraj cashga? ¿Ricayninpäga valëchuraj o manachuraj?” nir.

² Diosta sirvir chayno tapucuylata ruracuycarga, tiempuwanga feninchipis ushacäcunmanchi y Diosta sirviytapis munashwannachu. Pero canan yachacushun imanotaj Biblia yanapamashwan caycunacho: 1) Jehovaga yarpachacunmi noganchicunapaj, 2) unaycho decidishganchi Jehovata sirvinapaj alipämi caycan y 3) Jehovapa ricayninpäga valuryojmi canchi.

IMARAJ YANAPÄMÄSHUN DIOSTA SIRVIR IMA TAPUCUYCUNATAPIS RURACUYCARGA

3. ¿Imaraj yanapämäshun Diosta sirvir ima tapucuyninchilapis captin?

³ Diospa Palabranmi yanapämäshun Jehovata sirvir ima tapucuylatapis ruracuptinchi. Bibliata ali yachacuptinchirämi Jehovamanpis masraj yäracushun, paypita raquicäcunapäpis mana yarpäshunchu y mana manchacuypa paylata sirviycäshun (1 Cor. 16:13).

4. ¿1 Tesalonicenses 5:21 textuga imata rurananchipätaj consejaycalämanchi?

⁴ (Leiriy 1 Tesalonicenses 5:21). Bibliaga consejamanchi: “Shumaq tantiyakärinki” nir. Y chaytaga ruranchi lapan yarpashganchita Biblia nishganwan tincuchirmi. ¿Imataraj ruranman juc joven ‘Jehová nogapaj yarpachacunchuraj’? niycarga. ¿Chaynola tapucuycarlachuraj cacunman? Manami ¿au?, chaypa trucanga Bibliata leir aliraj tantiacunman imaycacunapapis Jehová ima yarpashganta.

5. ¿Imata rurartaj Jehová wilapämashganchicunata chasquicunchi?

⁵ Diosga Palabran Bibliawanmi parlapämanchi. Pero, lapan wilapämashganchita chasquicunapäga, ¿imataraj rurashwan? Yarpachacuycashganchicunapaj parlaj Bibliacho textucunatami ashinanchi y publicaciunninchicunachopis yachacunanchi ima tapucuylatapis ruracuycarga (Prov. 2:3-6). Y mana gongaylapami Jehovatapis mañacunanchi lapan yachacuycashganchicunata shumaj tantianapaj. Bibliatapis y publicaciunninchicunatapis ali tantiapaylapa leirga yanapämäshunmi caway vidanchicho. Bibliacho Diosta sirvejcunaga imaycacunapa pasapäcush, paycunapitapis yachacuyta puedinchimi.

6. ¿Imanotaj reuniunninchicuna yanapämanchi?

⁶ Reuniuncunachopis quiquin Jehovami parlapämanchi. Chaycho discursucuna ruracämuptin y comentariucunapis captenga ima tapucuycashganchipa respuestantapis tarinchimi (Prov. 27:17). Canan yachacushun Diosta sirviycar ima tapucuylapis captenga imatataj rurashwan.

“¿JEHOVÁ YARPACHACUNCHURAJ NOGAPAJ?”

7. ¿Ima tapucuycunataj öraga ruracunchi?

⁷ Imaylapis tapucushcanquichi ‘¿Jehová nogapaj yarpachacunchuraj?’ nir. Y camacoj y lapanta puedej cashganman yarparpis capaz nishcanqui ‘alpalapita caycaptëga Jehová ricaylapis quevä ricamanga’. Davidga almiracurganmi Jehová runacunata yanapashganta ricar, chaychi caynopis nergan: “TAYTA DIOS, ¿imataq runa kaykan tsayjinanpa paypaq yarpachakunaykipaq? ¿Imataq runa kaykan tsayjinanpa kuyaykunaykipaqqa?” (Sal. 144:3). Chaynola tapucushpanchi imata ruranapaj cajta yachacushun.

8. 1 Samuel 16:6, 7, 10-12 textucuna nishganno, ¿imatataj Jehová masga rican runacunaman yarparga?

⁸ Bibliaga wilacunmi Jehová lapancunapaj yarpachacushganta maypita captinpis y imano captinpis. Juc cuticho Samuelta mandargan Jesé runapa wasinman aywananpaj y paypa wamrancunapita jucnin cajta acrananpaj Israelpa reynin cananpaj. Jesega ganchis wamrancunatami gayachimurgan, ichanga shulca caj David wamrantaga mana.a ¡Pero paytami Jehová acrargan rey cananpaj! (Leiriy 1 Samuel 16:6, 7, 10-12). Jehová ricarganmi chay mozupa ali shongulanta y payta sirvinanpaj lapan rurashgancunatapis.

9. ¿Imanirtaj Jehová gampaj yarpacushganpita seguro caycanquiman? (Fotutapis ricay).

⁹ Jehovaga gamman yarpachacurmi cuyayculäshunqui. ¿Imanirtaj chayta ninchi? Imapa pasaptiquipis consejuncunatami goyculäshunqui (Sal. 32:8). Imapa pasashgayquitaga lapanta musyan (Sal. 139:1). Consejuncunata chasquicuptiqui y alina cawar galaycuptiquega más segururaj caycanqui Jehová amatar cuyashushgayquita (1 Crón. 28:9; Hech. 17:26, 27). Pay manami gongarinchu sirvinayquipaj lapan rurashgayquita y ali shonguyoj cashgayquitapis musyanmi (Jer. 17:10). Y mana chaylachu, Payga invitaycäshunqui amigun canayquipaj (1 Juan 4:19).

“¿DIOSTA SIRVINAPÄGA DECIDISHGÄCUNA ALIPÄCHURAJ CASHGA?”

10. Lapan jaguishganchicunaman yarpar, ¿imataraj öraga tapucunchi?

¹⁰ Öraga pilapis yarpachacunmanchi Diosta sirvishganraycu imayca jaguishgancunaman. Waquincunaga trabajuntapis negociuntapis jaguiripäcush y laquishgano ricapäcun imanomi guellaylata ashinanpaj arucojcuna cushishgala cawapäcun, y chayraycu caynopis tapucunmanchi: “¿Alipächuraj cashga Jehovata sirvinäpaj lapan jaguishgäcuna o guellayta ashir arucuycarlachuraj cacöman cargan?”.

11. ¿Imanirtaj alapa yarpachacoj Salmo 73 cajta escribej runa?

¹¹ Imaylapis gam chaycunata tapucushga carga, Salmo 73 escribej runaman yarparcuy. Chay runaga ricajshi Diosta mana sirvejcuna ali saludniyoj, imaycayoj car y jaucala cawacärishganta (Sal. 73:3-5, 12). Payga waran waranshi yarpachacoj ‘Jehovata mana sirvejcunapis chayno ali cawacäriptenga imapänataj noga calpachacuycäshaj, ima ayca rurashgäcunatapis quevä Jehová valuranga’ nir (Sal. 73:13, 14). Chayno yarparmi, ¿imatataj rurargan?

12. Salmo 73:16-18 textucuna nishganno, ¿imataj rurargan salmuta escribej runa?

¹² (Leiriy Salmo 73:16-18). Chay salmista runaga Jehovapa wasinman aywar más alina ricacur shumaj yarpachacurgan. Chauraga tantiargan Jehovata mana sirvejcuna ali cawacäriptinpis ratulapaj cashganta, jina tantiargan Jehovata puntaman churaptinchi imapitapis más ali ruray cashganta. Chaynoparaj payga valurcharcurgan Jehovata jinala sirvinanpaj (Sal. 73:23-28).

13. Noganchipis tranquilula ricacunapäga, ¿imacunamantaj yarpachacushwan? (Fotucunatapis ricay).

¹³ Salmuta escribej runata yanapashganno, ¿imataraj gampis ruranquiman tranquilula ricacunayquipaj? Yarpachacuy imayca bendiciuncunata chasquishgayquiman y Jehovawan amigo cashgayquimanpis. Pero Jehovata mana sirvejcunaga cay munducho imaycacuna ushacänanpaj cajlamanmi yäracärin, noganchicuna ichanga cushicurcushwanmi Jehovaga yarpashganchipitapis más bendiciuncunatami goycalämäshun (Sal. 145:16). Canan Jehovata mana sirviycarga, ¿maychoraj caycashwan o imataraj ruraycashwan? Chauraga cayta gongashwanchu: Jehovata cushicuywan sirviptinchega imapis pishimäshunchu.

“¿VALEJTANOCHURAJ JEHOVÁ RICAMAN?”

14. ¿Imacunapataj pasapäcun waquin Diosta sirvejcuna y imatataj nipäcunmanpis?

¹⁴ Waquincunaga edäninraycu saludninraycu o ima problemaraycurpis masraj Jehovata sirviyta puedipäcunnachu. Chaypa pasajcuna capaz cayno ninman: “Quevä Jehová ali nawilanwan ricaman, capaz imapäpis valëchu”.

15. ¿Imapitataj seguro caycargan Salmo 71 cajta escribej runa?

¹⁵ Salmo 71 cajta escribej runapis chayno sienticur laquicushpan Jehovata cayno nergan: “Kalpaynaqna kaptïpis ama kachaykalämaytsu” (Sal. 71:9, 18). Ichanga seguro caycargan Diosta sirviycarla caycaptenga, pay imaypis pushayculänanpaj. Yachacurgan imayca problemacunapa pasarpis Jehovaga bendiciunnintaga goyculanmi lapan calpanwan sirvejcunata (Sal. 37:23-25).

16. ¿Imanotaj Jehová yarpachacun edayashga cajcunapaj? (Salmo 92:12-15).

¹⁶ Edäyojna caycarga Jehová ali nawilanwan ricashushgayquiman yarpachacuy. Unayno calpayqui mana captinpis Jehovaga yanapäshunquimanmi cushi cushila payta sirviycänayquipaj (leiriy Salmo 92:12-15). ‘Cayta wacta rurayta puedënachu’ nir cacunayquipaj trucanga puedishgayquilaman yarpachacuy. Puedinquimi pilamanpis yarpar shacyächiyta y Jehovata sirvir imaycapa pasashgayquitapis wilapayta, jina Jehovapa lapan promesancuna cumplicänanpaj cushi cushila shuyaraycashgayquitapis. Jina maquiquichomi caycan waquincunapaj mañacunayquipäpis (1 Ped. 3:12). Edayashgana o mozularaj caycarpis lapanchimi cushi cushila Jehovapaj aruyta puedinchi y waquincunata yanapanapäpis.

17. ¿Imanirtaj ima rurashganchicunatapis waquincunapa cajwan tincuchishwanchu?

¹⁷ Jehovata sirvir munashgayquino rurayta mana puedirpis, ama laquicuychu, payga ali nawilanwanmi rican lapan rurashgayquicunata. Rurayniquicunata waquincunapa cajwan tincuchiychu, ‘paylami puedin nogaga mana’ nir. Taytalanchi Jehovaga piwanpis tincuchimanchichu (Gál. 6:4). Juc cuticho Mariaga chaniyoj perfumiwan Jesuspa chaquinta maylapargan (Juan 12:3-5). Pero, ¿imatataj juc cuticho rurargan juc chacwanla viuda? Templucho caycar payga ishcay monedalanta juc cajaman winargan (Luc. 21:1-4). Jesuspäga ishcancuna ali yäracoj warmi capäcurgan. Chaynolami cuyapäcoj Taytalanchi Jehovaga valuranmi lapan rurashganchicunata.

18. Yarpachacur ima tapucuyniquilapis captenga, ¿imataraj ruranquiman? (“Yarpachacur laquicuptiquega Bibliami yanapäshunqui” nej recuadrutapis ricay).

¹⁸ Lapanchicunami yarpachacur ima tapucuylatapis ruracunchi, pero Diospa Palabranpita yachacurga alina yarpar galaycunchi. Chaymi imalapis yarpachacaycächishuptiquega Bibliapita mana yamacaylapa shumaj yachacuy, chayta ruraptiquega alina ricacur jaucalana goyäcunqui. Jehovaga gampajmi yarpachacun y payraycu lapan rurashgayquicunataga mana gongangachu, ali yäracoj sirvejnincunataga Jehová cuyayculanmi.