¿Imataj yachacunchi tantacunawan Jesús milagruta rurashganpita?

1. ¿Unay runacuna imataj micupäcoj cargan?

BIBLIAGA wilacun unay runacuna waran waran tantata micoj cargan (Gén. 14:18; Luc. 4:4). Bibliacho micuypita parlarga öraga tantapitami parlamun (1 Rey. 17:11, 12). Jesuspis tantacunawan ishcay milagrucunata rurargan (Mat. 16:9, 10). Ricärishun Juan 6 caj capitulucho Jesuspa jucnin caj milagrunpita imacunataj canan tiempucho yachacunchi.

2. ¿Imanirtaj achca runacuna micuyta necesitargan?

² Apostulcuna runacunata wilacärishganpita cutiycamur jamapayta munapäcurgan. Chaura paycunaga Jesuswan juc buquiman wicharcur Betsaida marcapa cercancho chunyajninman aywapäcurgan, chaycho apostulcuna jamapänanpaj (Mar. 6:7, 30-32; Luc. 9:10). Chay horacho achca runacunami chayargan. Jesús ichanga manami nerganchu aywacärinanpaj, sinoga paycunata yachachergan y gueshyajcunata aliyächergan. Tardiyaycuptinna discipulucuna yarpachacurgan runacuna imata micupäcunanpaj cajta. Waquincunaga capazchi walca mircapalata charaycargan y waquincunana micuy rantej aywanmanchi cargan (Mat. 14:15; Juan 6:4, 5). Pero, ¿imataj Jesús rurargan?

MILAGRUTA RURAR TANTATA MICUCHERGAN

3. Runacuna yarganaycashganta ricar, ¿imataj Jesús rurargan? (Garancho caycaj dibujutapis ricay).

³ Jesús apostulnincunata nergan: “Manami mikuy ashiq aywapäkunmantsu. Qamkuna mikuyta qarapäkuy” (Mat. 14:16). ¿Imanoraj maychica runacunata micuchinman cargan? Paycunaga 5.000 (pichga waranga) olgucuna cargan, warmincunawan wamrancunawanpis 15.000 (chunca pichga waranga) runacunanochi cargan (Mat. 14:21). Andrés nergan: “Kaycho juk wamra tsararaykan pitsqa cebäda tantata y ishkay pescädulatami. Tsaylaqa manami aypanqatsu lapan runakunapaq” (Juan 6:9). Cebada tantaga mana chaniyoj captin waccha runacunaga cada junaj micupäcoj, y ichic pescaducuna chaquish y pochgoj carganchi. Imano captinpis achca runacunapaj aypanmanchu cargan.

4. ¿Imataj yachacunchi Juan 6:11-13 wilacushganpita? (Fotucunatapis ricay).

⁴ Jesús pachächicoj car runacunata micuyta garananpaj grupo grupo pashpaman jamacärinanpaj nergan (Mar. 6:39, 40; leiriy Juan 6:11-13). Nircur Papäninta mañacur agradecicurgan tantapita y pescaducunapitapis. Jesús Taytanpa poderninwan chay micuyta mirachergan. Cayga yachachimanchi quiquilanchi o waquincunawanpis caycaptinchi micuypita Jehovata mañacur agradecicunapaj. Chaypitana Jesús micuyta aypuchergan, runacunaga sacsashganyaj micupäcurgan y puchoj cajcunata Jesús nergan shuntananpaj. Chaynopa Jesús yachachimarganchi imatapis mana desperdicianapaj. Familiayoj cajcunaga Jesús rurashganta wamrancunata yachachinman manaraj micur agradecicunapaj Diosta mañacurir, imalawanpis waquincunata yanapänanpaj y pachächicoj cananpaj.

5. 1) Jesuspa milagrunta ricar, ¿runacuna imata rurayta munapäcurgan? 2) ¿Y Jesusga imata rurargan?

⁵ Runacunaga alapa almiracärergan Jesús shumaj ali yachachishganpita y milagro rurashganpitapis. Paycunaga musyargan Moisesno juc profeta shamunanpaj cajta, Jesús rurashgancunata ricaycur ‘paymi chay profeta’ nir yarpapäcurganchi (Deut. 18:15-18). Jina yarpapäcurganpis Jesús rey carga lapan necesitashganta yanapänanpaj cajman. Chaymi “mandaqnin rey kananpaq imaykanöpapis churayta munapäkurqan” (Juan 6:14, 15). Jesús rey cananpaj auniptenga judío politicaman jaticaycanman cargan. Pero payga manami munarganchu, chaymi chunyaj jircaman gueshpicurgan. Chayno obligaptinpis Jesús manami politicaman meticurganchu. ¡Mayraj paypita yachacunchi!

6. ¿Imanotaj Jesús rurashganno noganchipis rurashun? (Dibujutapis ricay).

⁶ Capazchi noganchitaga milagrucunata rurananchipaj mandamäshunchu o mandacoj cananchipaj nimäshunchu. Ichanga nimashwan politicaman jaticänapaj o candidatucunata imalachopis yanaparcunanchipaj. Chauraga, Jesús rurashganman yarpäshun. Payga manami yarpaylapis yarparganchu politicaman jaticänanpaj. Y nerganpis: “Noqa manami kay patsacho mandaqtsu kaykä” (Juan 17:14; 18:36). Cristianucuna Jesús yarpashganno yarpänanchi y pay rurashganno rurananchi. Noganchipis Diospa Gobiernun shamunanta munanchi, chaymi chay Gobiernupita wilacunchi y shamunanpaj mañacunchi (Mat. 6:10). ¿Imataj más yachacushun Jesús tantawan milagruta rurashganpita?

JESÚS TANTAWAN MILAGRUTA RURASHGANTA TANTIARCUSHUN

7. 1) ¿Ima milagrutaj Jesús rurargan? 2) ¿Discipuluncunaga, imata nipäcurgan? (Juan 6:16-20).

⁷ Achca runacunata pachanta garaycashganpita, Jesús apostulnincunata Capernaúm marcaman despachargan y payga chunyajman gueshpicurgan reyman mana ticrananpaj (leiriy Juan 6:16-20). Apostulcuna barcupa viajaycashgancho fiyu wayra yacuta pulchajyar galaycurgan. Chay hora Jesús yacu jananpa puriycashganta yuripargan y Pedrutapis nergan yacu jananpa paypis aywananpaj (Mat. 14:22-31). Jesús barcuman wicharcuptin, yacu chawarganna y discipuluncuna chayta ricaycur almirashga nipäcurgan: “¡Rasunpami Tayta Diospa Tsurin kaykanki, tayta!” nir (Mat. 14:33).a Chayno nirpis paycuna tantiyashgarächu imanir Jesús chay milagruta rurashganta y tantata mirachishgantapis. Marcospis wilacun discipulucuna pasaypa manchacashga yarpachacurgan “tsaytsika runakunata qarananpaq milagruta rurashqanta rikarpis shonqunkuna chukruyashqa kaptinmi mana tantiyakärirqantsu” (Mar. 6:50-52). Aumi, paycuna shumaj tantiacärerganchu Jehovapa poderninwan Jesús milagrucunata rurashganta. Chaypitana Jesús yapaychona tantata mirachishganpita parlargan. Noganchipis chaypita yachacushwan.

8, 9. ¿Imapätaj runacunaga Jesusta ashiycargan? (Juan 6:26, 27).

⁸ Jesús micuyta garashgan runacunaga pachalanpämi más yarpargan. Pacha wararcuptinna Jesús discipuluncunawan chaycho caycashganta mana ricar, Tiberíades marcapita barcucunaman wicharcur Jesuspa guepanta Capernaúm marcaman aywapäcurgan (Juan 6:22-24). ¿Imanirtaj Jesuspa guepanta gatir aywapäcurgan? Paycuna Diospa Gobiernunpita Jesús yachachishganta wiyayta munarganchu sinoga pachalanpämi más yarpargan. ¿Imanotaj chayta musyanchi?

⁹ Jesús paycunawan tincur Capernaúm marcacho clarumi nergan micushganlapitami payta ashiycashganta. Chay micuy ichanga ushacajlami cashga. Nerganpis ‘pachalanpaq arunanpa trukanqa imayyaqpis kawatsikuq mikuypaq arupäkunanpaq’ (leiriy Juan 6:26, 27). Jesusmi nergan chay “imayyaqpis kawatsikuq” micuyta Tayta Dios cachamushganta, chayta wiyaycur runacuna almirashga quedargan. Pero, ¿imaraj chay micuyga y imanoraj tarinman cargan?

10. ¿Imatataj runacuna rurapäcunman cargan mana ushacaj cawayta tarinanpaj?

¹⁰ Cawachicoj micuyta tarinanpäga, judiucuna yarparganchi Moisespa Leyninta cäsucunanpaj cajta. Pero Jesús cayno nergan: “Tayta Diospa aruyninqa kaykan kachamushqanman yärakärishqaykimi” (Juan 6:28, 29). Paycuna imayyajpis cawananpaj Tayta Dios cachamushgan Jesusman yäracärinman. Jesús caypita mayna parlacarishgana cargan (Juan 3:16-18, 36). Y tiempo pasariptinna Jesús mana ushacaj cawayta tarinapaj yapay parlamurgan (Juan 17:3).

11. Pachalanpaj yarpar, ¿imataj nergan judiucuna? (Salmo 78:24, 25).

¹¹ Judiucunaga Jesús yachachishganta manami chasquirganchu y payman yäracurganchu. Chaymi paycuna nergan: “Tayta Dios kachamushushqaykita criyipäkunäpaqqa mä juk milagruta ruray” (Juan 6:30). Chaytaga niycargan Moisés maná tantata garashganta yarparmi (Neh. 9:15; leiriy Salmo 78:24, 25). Paycunaga pachalanpämi yarparäcurgan. Jesús jana pachapita rasunpa cawachicoj tantata parlashganpita manami tantiayta munarganchu (Juan 6:32). Paycunaga Jesús micuyta garananlapämi ashirgan, yachachishgantaga manami wiyayta munarganchu. ¿Cay wilacuypita imata yachacunchi?

IMATATAJ MASGA ASHISHWAN

12. Jesús nishganno, ¿imataj más ashinanchi?

¹² Juan sojta caj capituluchoga yachacunchi Jehovawan más amigo cananchipaj calpachacunanchirämi. Diablo tentaptin Jesuspis nergan micuypita más ali caycan Taytanta cäsucunapämi (Mat. 4:3, 4). Jircachopis Jesús yachachicurgan imapitapis más aliga caycan Jehovawan amigo cananchipaj (Mat. 5:3). ¿Gamga imacunapitapis más Jehovawan amigo canayquipächu yarpanqui?

13. 1) ¿Mana alichu caycan micur upur cushicuptinchi? 2) ¿Imatataj apóstol Pablo consejacurgan? (1 Corintios 10:6, 7, 11).

¹³ Jehovata mañacur necesitashganchita gomaptinchi cushicunchimi (Luc. 11:3). Jina ali arucushganchipitapis cushishga micunchi y upunchi, chay bendiciuncuna Taytanchipitami shamun (Ecl. 2:24; 8:15; Sant. 1:17). Ichanga manami chaylaman yarparäcushwanchu. Chaytami yachacunchi apóstol Pablo punta cristianucunata cartacamushganpita. Payga yarpächergan unay israelitacuna Sinaí jircacho mana alita rurashganta. Pay consejargan mana alicunata mana munapar israelitacunano “jutsata mana ruranantsipaqmi” (leiriy 1 Corintios 10:6, 7, 11). Jehová israelitacunapaj micuyta camaripargan, pero paycunaga pachalanman yarpar chay micuy mana aliman apargan (Núm. 11:4-6, 31-34). Chaynopis cashga becerruta adurapäcuptin, cushish upyar micur juchata rurapäcurgan (Éx. 32:4-6). 70 caj watacho Jerusalén templunwan ushacächishga cananpaj ichiclana pishiycaptin, apóstol Pablo cristianucunata chaytami wilapargan riccha ricchala caycänanpaj. Noganchipis ushanan tiempuchona cawaycanchi, chaymi apóstol Pablo nishganman más yarparaycänanchi.

14. ¿Imataj nin Biblia paraisucho micuy cananpaj cajpita?

¹⁴ Jesús yachachimarganchi cada junaj micuyninchi cananpaj mañacunanchipaj, jina nerganpis cieluchono cay Pachachopis Diospa voluntänin ruracänanpaj cajta (Mat. 6:9-11). Yarpay, ¿imanoraj canga chay tiempo chayamuptin? Bibliaga nimanchi entero Pachacho maychicaj micuy cananpaj cajta. Isaías 25:6-8 nimanchi Diospa Gobiernunchona maypis micucuypa micuycuna alinnin canga. Salmo 72:16 nin entero Pachacho “trïgu shumaq wayuykulätsun. Intëru jirkakunachöpis kichkiyparaq kaykulätsun”. Cayman shumaj yarpäriy, chay triguwan gustashushgayqui tantata ruranquipämi. Y masga uvas plantapita cushishga vinutapis upunayquipaj (Is. 65:21, 22). ¡Mayraj cushicuypaj canga cay bendiciuncuna lapanpaj captin!

15. ¿Pïmantaj yäracunan cawarimojcuna? (Juan 6:35).

¹⁵ (Leiriy Juan 6:35). Jesús tantacunawan y pescaducunawan micuchishgan runacunata capazchi paraisucho cawarimuptin reguishun. Paycuna unaycho Jesusman mana yäracurpis paraisuchoga cawarimungachi (Juan 5:28, 29). Chay wichanga Jesús nishganta yachacunan. Paymi nergan: “Noqami kawatsikuq tanta kaykä. Noqata chaskikamaq kaqqa imaypis manami mikananqanatsu ni yakunanqanatsu”. Paycunaga Jesús wanushganman yäracunanmi. Chay wichan cawarimojcuna y yurej wamrancunapis Diospita yachachishga canga. ¡Mayraj cushicuypaj canga paycunata yachachiptinchi Dioswan amigo cananpaj! Chayga micuypitapis más cushicuypämi canga.

16. ¿Juc caj yachacuycho imataj más yachacushun?

¹⁶ Canancamayaj Juan sojta caj capitulupita ichiclata yachacushcanchi. Mana ushacaj cawaypita Jesús mastaraj yachachicushga. Chayga judiucunapaj captinpis noganchipis yachacuyta munanchi. Juan sojta caj capitulupita juc caj yachacuycho masga yachacushun.