¿Yarpanquichu?

¿Yarpanquichu guepa quillacunacho Wilacamoj revistacho ima leishgayquita? Mä musyanapaj cay tapucuycuna caycan:

¿Imanotaj Jehová warmicunata rican?

Jehová manami yarpanchu olgucuna warmicunapita más valuryoj cashganta. Pay lapancunata igualpa rican. Chaymi warmicunata wiyan, imano sienticushganman problemancunamanpis yarpachacun, jina musyanmi paycuna voluntäninta ali rurananpaj (w24.01, 15 y 16 caj paginacuna).

Efesios 5:7 nin: “Wakin runakuna jutsata ruraptinpis qamkunaqa ama rurapäkunkitsu”. ¿Imanotaj chayta cäsucushwan?

Apóstol Pablo consejargan jucha rurajcunawan juntacaptinchi más sasarämi canga Jehovata cäsucunapaj. Internetchopis shumaj acrananchi piwantaj parlanchi y imacunata ricanchi (w24.03, 22 y 23 caj paginacuna).

¿Ima luta wilacuycunata mana wiyashwanchu?

Luta wilacuycunaga öraga tucuynopa chayamunman. Capaz juc cristiano öraga imalatapis leinapaj nimashwan, pero manami tantiashgachu rasunpa o mana cashgantapis. Correupapis o mensajipapis chayamunman. Jina capaz juc apóstata ali runa tucur Bibliapita yachacuyta munanman (w24.04, 12 caj página).

¿Imatataj musyanchi Jehová imano juzgashganpita rey Salomonta, Sodoma y Gomorra runacunata y diluviucho wanojcunata?

Manami musyanchichu Jehová paycunata imaycamapis ushacächishganta, ichanga musyanchimi Jehová laquipäcoj cashganta. Pay musyan imano cashganchita y lapan pasamashganchitapis (w24.05, 3 y 4 caj paginacuna).

¿Imataj yachacunchi Jehová gagano cashganpita? (Deut. 32:4).

Jehová gagano car chapämanchimi. Paymi lapan aunishgancunata cumplin. Payman yäracunanchi, imano cashganta y munashgantapis imaypis cambianchu (w24.06, 26 a 28 caj paginacuna).

¿Imanotaj mushoj congregaciuncho yachacashwan?

Jehovaman yäracushun unay sirvejnincunata yanapashganno noganchitapis yanapämäshun, manami tincuchishwanchu unay congregaciunninchita mushoj cajwan, hermanucunawan shuntacashwan y ali amigucunata ashishwan (w24.07, 26 a 28 caj paginacuna).

Mateo 25 caj capitulucho Jesús tantiachicushganpita, ¿imatataj yachacunchi?

Uyshacunapita y cabracunapita yachacunchi mana jaguiypa Jehovata sirvinapaj, chunca jipashpita yachacunchi riccha ricchala y camaricushgala caycänanchipaj, y guellayta chasquej quimsa runapita yachacunchi ali aroj cananchipaj (w24.09, 20 a 24 caj paginacuna).

Salomonpa templun yaycunan caj puncupa altun, ¿aycataj midirgan?

Unay waquin Bibliapa copiancuna 2 Crónicas 3:4 textucho nin “120 codos” o 53 metros midishganta, pero waquin yäracuypaj copiacuna nin “20 codos” o 9 metros midishganta. Templupa pergan racu cashganraycu altunga 9 metrucunalami canman cargan (w24.10, 31 caj página).

¿Imanotaj siervo ministerialcunaga “juc warmiyojlami canman”? (1 Tim. 3:12, TNM).

Siervo ministerialga juc warmilawan casaracushga caycanman, warminta mana jananpanmanchu. Jina waquin warmicunata manami ricapar munapanmanchu (w24.11, 19 caj página).

¿Juan 6:53 textucho Jesús nishganga Santa Cenapaj parlaycarganchuraj?

Juan 6:53 textucho Jesús nergan aychanta micunapaj y yawarninta upunapaj. Chayno parlargan Galilea marcacho 32 caj wata, mana yäracoj judiucunata. Juc wata pasariptin Jerusalencho Santa Cenata ruraptin, paywan cielucho gobernananpaj cajcunalata parlaycargan (w24.12, 10 y 11 caj paginacuna).