Caway vidächo yachachicoj Diosninchipita yachacushcä

TAYTÄCUNAPITA YACHACUSHCÄ

1950 wata ushanancho, taytäcuna aywacärergan Italia naciunpita Kindersley ichic marcaman, provincia Saskatchewan, chayga cargan Canadá naciuncho. Chaychona caycar Bibliapitami yachacurgan y lapan familiäpaj Jehovata sirvirga más alimi cashga imapitapis. Wamralä cashgä wichan, yarpä familiäwan achca horapa predicaj yargoj cä, chaymi asicushgächo o bromalächo nëmi “pusaj watalapita precursor auxiliarno cashgäta”.

Taytäcuna ichic guellaylawan cawaptinpis Jehovaman yäracur payta sirvir caycargan. Chaynomi cashga, 1963 watacho juc asamblea internacional Pasadenacho cargan (California, Estados Uniduscho). Taytäcuna chay asambleaman aywayta munar imaycancunatapis ranticärergan chay asambleaman aywapäcunanpaj. 1972 watacho, familiäwan aywapäcurgä Trail ichic marcaman predicaciuncho yanapäcunäpaj italiano rimaycho. Tashgäcunapita, 1.000 kilometrucunano caru caycargan Columbia Británica provinciacho (Canadá). Papänë Jehovata masta sirviyta munar ali pagashga aruytapis manami chasquirganchu, sinoga wasicunata pichapacur arurgan.

Taytäcuna Jehovata fiel sirvishganta, nogata y quimsa wauguëcunatapis yanapäcämargan. Chaymi paycuna yachachimargan nogacunapis Jehovata sirviptinchi y cawaynëcunacho Jehovapa gobiernunta puntaman churaptinchi, Payga imaypis cuidamanga, chaypita taytäcunata alapa agradecicö (Mat. 6:33).

LAPAN TIEMPÖWAN JEHOVATA SIRVIR GALAYCÖ

1980 watacho, cuyaylapa buena moza paniwan Debbie jutiyoj casaracurgä, payga lapan tiempunwan Jehovata sirviyta munargan. Chauraga ishcäcuna lapan tiempöwan Jehovata sirviyta munapäcurgä, casaracushgäpita quimsa quilla pasariptinna Debbie precursorano sirvir galaycurgan. Juc wata pasariptinna ichic congregación yanapacoj aywacärergä, y nogapis precursorno sirvir galaycurgä.

Tiempuwan guelanacärergä y chay congregaciunpita aywacuyta munapäcurgä. Pero manaraj aywacur congregaciunta watucamoj hermanuwan parlapäcurgä, payga ali shimilapa y franquezawan cayno nimargan: “Gamcuna mana alicunalata ricar quiquiquilayquicunapajmi más ajayapäcuycanqui, ichanga pasashgayquipita ali cajcunata ricaptiqui cushishgami yanapäcunqui”. Chay hermano anyapamashganga alapa yanapäcamashga y jucla casucärergä (Sal. 141:5). Cuentata gocärergä congregaciuncho wamracuna y waquin panicunapa runancunapis mana Testigo captinpis, paycunaga alapa calpachacärej Jehovata sirvinanpaj. Caypita yachacuyashcä ima problemacuna captinpis ali cajcunata ricanäpaj, y Jehovaman yäracur shuyaränapaj ima problemacunapis payga tiempulancho aliyächinanpaj cajta (Miq. 7:7). Chaypita yapay cushishga yanapacurgä y ali goyacärej cä.

Precursorcunapa punta caj escuelanchicho chuscu yachachicojcuna cargan, quimsancuna juc naciuncho sirvipäcurgan. Paycuna sirvishganpita parlapäcamargan ima sasacunapa pasashganpita y bendiciuncuna chasquishganpitapis, y fotocunatapis ricachipäcamargan, chayta wiyaycur y ricaycur misioneruno cayta munapäcurgä y chaypaj calpachacärergä.

Misioneruno yanapacunäpaj munar 1984 watacho Quebec marcaman aywapäcurgä, chay marcaga Columbia Británica marcapita alapa carumi caycargan. Chaycho francés rimayta parlapäcun, chaymi parlashgantapis imano cawashgantapis yachacärergä. Guellaynëcunapis ayparganchu cawacunäpaj. Juc cuticho papata muroj runa nipäcamargan chacrancho shicwaj papacuna shuntapäcunäpaj, chaymi papalata micunacunäpaj cashga. Warmëga tucuynopa papalapita mishqui micuycuna yanucunanpaj yachacurgan. Ajacunapa pasarpis cushishgala goyänanchipaj yachacurgäcuna. Jina ricargäcuna imano Jehová cuidamashgancunata (Sal. 64:10).

Juc junajcho mana yarpashgä invitaciunta chasquipäcurgä, Canadá Betelcho sirvinäpaj cashga. Chayga ali carpis laquishga sientipäcurgä Galaad Escuelaman solicitudnëcunata apachicushgäpita, chayno captinpis invitaciunta cushishgami chasquipäcurgä. Betelchona caycar, Kenneth Little hermanunchita, Comité Sucursalpita aroj, tapucärergä: “¿Galaad escuelaman aywanäpaj solicitudnëcunawan imataj pasanga?” nir. Payga cayno nimargan: “Invitaciunniqui chayamuptin chay hora parlashun”.

Juc semanala pasariptinna Galaad escuelaman aywanäpaj invitaciunnëcuna chayamur aywanäpaj o mana aywanäpäpis yarpachacärej cä. Hermano Little cayno nipäcamargan: “Betelcho arunayquipaj quedacäriptiqui o Galaad Escuelaman aywapäcuptiquipis alimi caycan, pero maygantapis acraptiqui öraga cayno nir yarpachacärinquiman: ‘Betelcho quedacöman cargan o Galaadman aywacöman cargan’ nir. Ishcanpis alimi caycan, maygantapis acraptiqui Jehová bendecishunqui”. Galaad Escuelaman aywacärinäpaj decidipäcurgä y achca watacunapa pasashganpita cuentata gocärergä hermano Little nishganga rasunpa cashganta. Chaymi waquin hermanucuna decidinanpaj maycho Jehovata sirvinanpajpis hermano Little nishganno nogacunapis nishgäcuna.

MISIONEROCUNANO CAWAY VIDANCHI

Alapa cushishga caycashgäcuna 22 estudiaj masëcunawan 83 clase Galaad escuelacho, chayga galaycurgan 1987 abril quillacho Brooklyn (Nueva York naciuncho). Yachachicojninchi cargan Ulysses Glass y Jack Redford y waquin hermanucunapis. Pichga quillacuna rasla pasacurgan y 6 de setiembre quilla 1987 watacho graduaciunmi cashga. Y mandapäcamargan Haití naciunman John y Marie Goode hermanucunawan.

1962 watapita Haití naciuncho misionerucuna manami carganchu, paycunata gargupäcurgan, chayrajmi nogacunata chayman mandapäcamargan. Galaad escuela quimsa semanapita yargurna ichic congregaciunman aywacärergä, chayga montañapa chaupincho caycargan y 35 hermanucunalami cargan. Chay wichan noga warmëwan jovenlarajmi caycargä y yachacunäpaj achca caycargan. Ishcäcunalami misionerucunapa wasincho tiyargä. Haití runacunaga waccha cargan y casi lapancuna leiyta yacharganchu. Chay wichan runacunaga autoridäcunata garguyta munar ninata rupachir protestatapis rurapäcoj y shucucuy wayra cargan.

Haití hermanucunaga pasaypa mana alicunapa pasarpis valurta jorgur cushishga caycargan y Jehovatapis cuyapäcoj y predicaciunman yargoj. Paycunapita alapa yachacurgä. Juc edayashga hermana leiyta mana yacharpis 150 Bibliapa textuncunata yachargan. Cada junaj lapan problemacunata ricar wilapayta munapäcurgä, Diospa Gobiernunlami lapan problemacunata ushacächinanpaj cajta. Waquin runacunata Bibliapita yachachishgäcuna tiempuwanna precursor regularno, precursor especialno y ancianucunano sirvir galaycurgan, chaypitaga alapa cushicärë.

Haití naciuncho juc mozuta Trevor jutiyoj reguirgä, payga misionero mormón cargan. Paywanga Bibliapita cutin cutin parlapäcurgä. Chaypita watacunapa pasariptin paypa juc cartata chasquirgä y cayno nimargan: “¡Shamoj asambleacho bautizacushaj! Haití marcaman cutiyta munä y precursor especialno sirviyta munä misionero mormón caycashgä sitiucho”. Y chaynomi cashga, precursor especialno warminwan achca watacunapa chaycho sirvipäcurgan.

EUROPAPITA ÁFRICA NACIUNMAN AYWACÄRERGÄ

Europaman sitiucho sirvinäpaj mandapäcamargan, chaycho autoridäcuna ichic ichicla predicanäpaj jaguipäcamargan. 1992 wata Liubliana marcaman chayapäcurgä (Eslovenia), chaychomi taytäcuna ashmamashga manaraj Italia naciunman aywar. Chay marca unay Yugoslavia reguishga cashga, cananga chaycho guerra cashga. Vienapita Sucursal (Austria) y Zagreb oficinacunapita (Croacia) y Belgrado (Serbia) pushaj hermanucuna chay sitiucho predicaciunta ricapäcoj. Pero cananga cada marcacunapa sucursalnin canan cargan.

Chaycho caycar rimayninta y costumbrincunatapis yachacurgäcuna. Esloveno runacunaga nipäcamaj “Ježik je težik”, chayga ninanmi “rimayga sasami yachacunapaj”. ¡Y chaynomi cashga! Diospa marcanpita ima cambiucuna captinpis hermanucuna cushishgala jucla cäsucärej y cäsucushganpita Jehová bendicerganmi. Jina ricashgäcuna ima mana ali captin Jehová tiempulancho corregishganta. Eslovenia marcacho imaycacunatapis yachacushgäcuna y unaycho yachacushgäcunapis yanapämashga.

2000 watacho, Costa de Marfil, África occidentalman aywanäpaj nipäcamargan. Pero chaycho guerra galaycurgan y 2002 wata noviembre quillacho Sierra Leona marcaman aywanäpaj caycargan, y chayraj guerra ushaycargan 11 wata galaycushganpita. Costa de Marfil naciunpita yargunäpaj manami facilchu cashga. Chayno captinpis lapan yachacushgäcuna yanapamashga laquishgala mana caycänäpaj.

Hermanucunaga achca watapa guerra chaupincho cawarpis cuyapäcoj cargan. Y achca runacuna Bibliapita yachacuyta munapäcurgan. Caycunaman más yarpachacushgäcuna. Hermanucunaga waccha carpis ima charashgancunatapis waquincunata goyta munapäcurgan. Chaymi juc cuticho juc pani warmë Debbieta ropacunata goyta munargan. Warmëga puntata chasquiyta munarganchu, pero cay pani goyta munar cayno nergan: “Guerra wichancho, waquin naciuncunapita hermanunchicuna yanpäcamargan. Cananga nogacunapis waquincunata yanapayta munapäcö”. Chayta ricar noganchipis paycunano rurayta munapäcurgä.

Tiempuwanna Costa de Marfil marcaman cutipäcamurgä, pero politicaraycu problemacuna cashga y pasaypa peligroso caycargan. 2004 wata noviembre quillacho chay marcapita yargunäcunapaj caycargan, y guepëcunapis chunca kilocunano lasanman cargan. Chay chacaycho pampancho soldaducunapa cuartelnincho punupäcurgä y tutalami avionwan Suiza marcaman apapäcamargan. Y sucursalman mitad pagas chayaycur shuyaramashgan Comité de Sucursal y Escuela de Entrenamiento Ministerial yachachicojcuna warmincunawan. Paycuna alapa macalämargan, goñu micuyta garamashgan y achca chocolatitapis garapäcamargan chayta ricar cushicuypita wagashgäcunaraj.

Chaypitana Ghana naciunman ichic tiempulapa mandapäcamargan y problemacuna manana captin Costa de Marfil naciunman cutipäcamushcä. Chaypita cayman wacman purishgäcunacho uticashga sienticurgä, pero hermanucunapa cuyacuynin yanapäcamargan Diosta sirvinäpaj. Y musyanchimi Diospa marcancho jucninchi jucninchi cuyanacunchi chayno captinpis noga Debbie warmëwan yarpachacushcä hermanunchicuna cuyamashganta valuranäpaj. Chay mana alicuna pasamashganpita alapa yanapamashga ali pogushga cristiano canäpaj.

JUC SITIUCHO SIRVINÄPAJ MANDAPÄCAMARGAN

2006 watacho central mundialpita juc cartata chasquipäcurgä, chaycho nipäcamargan Asia occidental cajman (Oriente Medio) aywanäpaj. Yapay yachacunanchiraj mushoj rimayta, problemacuna captin imata ruranäpaj, runacunapa costumbrintapis. Chay marca runacunapa política y religiunpis alapa importantimi cargan. Hermanunchicuna imayca idiumacunatapis parlapäcoj y pushaj hermanucunapa nishganta casucärej chayno juc shongunola caycargan, chayta ricar alapa gustamargan. Jina hermanunchicunapa castancuna, aroj masincuna, estudiaj masincuna y vecinuncunapis Diosta adorananpaj contrancho churacaptinpis aguantapäcurgan, chayga alapa almiraypaj cashga.

2012 watacho Tel Aviv marcacho (Israel) jatun asambleaman aywacärergä, chaycho Jehovapa sirvejnincuna manami shuntacarganchu Pentecostés 33 watapita.

Chay wichancho juc nación hermanucunata watucamunäpaj mandapäcamargan. Chay naciuncho autoridäcuna michäcärej Diospita yachachinapaj, chayno captinpis publicaciuncunata apachishgäcuna, predicaj yargushgäcuna y ichic asambleamanpis aywapäcurgä. Armashga soldacunata may chaycho ricarpis jaucala ricacurgäcuna hermanunchicuna yanagamashganchiraycu, paycuna nimajcuna cuidadulawan purinäpaj.

AFRICAMAN YAPAY CUTICÄRERGÄ

2013 watacho sucursalcho Kinsasa (República Democrática del Congo) sirvinäpaj invitamargan. Cay naciunga jatun y shumajmi cargan. Pero runacunaga alapa waccha capäcurgan y guerracunapis caycargan. Yarpachacushgäcuna: “África nación reguishgäna cargan, chaycho tiyashgänami cargan, musyargäcunami imano chaycho cawanäpaj” nir. Ichanga yachacänäraj juc marcaman aywanäpaj carreteracuna ni puenticuna mana captin. Hermanunchicuna pasaypa waccha carpis cushishga aguantargan problemancunata, predicaciunman yargoj y calpachacärej reuniuncunaman y asambleaman aywananpajpis, chaycunaga alapa alimi cargan. Ricashgäcuna imano predicaciuncho hermanucunata Jehová bendecishga ali shonguyoj runacunata tarinanpaj Diosta sirvinanpaj. Congo-Kinsasa sirvishganchicho imaycacunata yachacushgäcuna y ali amigucunatapis tarishgäcuna, paycunaga familianchino caycan.

2017 wata ushaycaptinna Sudáfrica Betelman mandapäcamargan. Waquin sucursal sirvishganchipita cayga más jatunmi caycan, mushoj aruycunata ruranäpaj mandapäcamargan. Caycho yapaypis imaycacunata yachacushgäcuna, unay yachacushgäcunapis yanapamashga. Waquin hermanunchicuna achca watapa Jehovata sirvipäcurgan, paycunata alapa cuyapäcö. May chay marcapita carpis hermanucuna Betelcho jucnin jucnin cuyanacärin, chayga almiraypämi. Jehovapa sirvejnincuna cäsucur y pay munashganno cawacäriptin jaucala sienticun chayga Jehovapa bendiciunninmi.

Jehovata sirvishganchicho noga warmëwan may chay marcacunacho sirvishcargä, pï may runacunapa costumbrincunatapis yachacärergä y mushoj rimaycunatapis yachacushgäcuna. Sasacunapa pasashgächo Jehová cuyamashpanchimi yanapämashgan pushaj hermanuncunawan y congregaciunpita hermanucunawanpis (Sal. 144:2). Lapan tiempöwan Jehovata sirvishgäpita yanapämashga más ali cristiano canäpaj.

Taytäcuna lapan yachachimashganpita, cuyashga warmilä yanapämashganpita y achca yäracoj hermanucunapa y ali rurashgancunapitapis alapa valoraycö. Munayculanchimi ali yachaj Tayta Diosninchi jinala yachaycächimänanpaj.