1925: guepa pachac watacuna

SHUYARASHGANNO MANA PASARGANCHU

Bibliata Estudiajcunaga 1925 watacho cay pacha paraisuman ticrananpaj cajta shuyarpaycargan. ¿Imanirtaj chayno yarpapäcurgan? Tiempuwanna Jehovapa testiguncunata pushaj Albert Schroeder hermanunchi cayno nergan: “Creipäcurganchi 1925 watacho acrashga cajcuna cielupa aywacärinanpaj cajta, y chay watachopis Abrahán, David y waquin Jehovapa sirvejnincuna cawarimunanpaj cajta cay pachacho caycajcunata pushananpaj”. Pero shuyarashgan mana cumplicaptenga waquin caj hermanucunaga alapa rabiashga sienticärergan (Prov. 13:12).

Waquin hermanucuna ichanga shuyarashgan mana cumplicaptin manami rabiacärirganchu, sinoga mana jaguiypa predicar siguiycargan. Paycunapäga más ali cargan Jehovapita ali wilacuyninta wilacärinanpaj. Mä yachacushun ali wilacuycuna caru marcacunaman chayananpaj imano radiupa predicashganta.

RADIUPA MÁS PREDICAPÄCURGAN

Bibliata Estudiajcunaga 1924 watacho WBBR radiupa Diospita wilacärej, paycunaga munargan wilacushganga más caru marcacunaman chayananpaj. Chaymi Chicago marcacho rurargan WORD jutiyoj radiuta. Ralph Leffler yanapacurgan WORD radio ruracashgancho, pay cayno wilacurgan: “Alaska naciunyaj chay WORD radiuta wiyacargan. Chaycho gasaptinpis runacunaga chay radiuta chacaypa wiyapäcoj”. Pilot Station marcacho caru caycaptinpis juc familia chay radiuta wiyapäcurgan, y wiyashganpita cushish sienticärirmi radiucho arojcunata juc cartata escribergan agradecicärinanpaj.

1925 wata diciembre quillacho inglés rimaycho Wilacamoj revista wilacurgan cay WORD radiuga caruyaj wiyacashganta. Cay revista wilacurgan: “WORD radiuga waquin radiucunapita más caruyajmi wiyacan, lapan Estados Uniduspa marcancunacho, Cubayajpis y hasta Alaskayajpis wiyacan. Chaycho taj runacunaga manami Diospita musyapäcurganchu, pero canan wiyashganpitaga musyayta munapäcuycan”.

Chay wichalancho Bibliata Estudiajcunaga Canadá naciunchopis radiuwan Diospita wilacuyta munapäcuycargan, waquin religiuncunapa radiuncuna manaraj captin. Chaymi 1924 watacho Canadacho taj Bibliata Estudiajcunaga CHUC radiuta rurapäcurgan chay naciuncho Diospita wilacunanpaj. Pero 1925 watachomi cuentata gocärirgan radiun tacshala cashganta, chaymi jucläman witichiyta munapäcurgan. Chayta cuentata gocurmi Estados Uniduscho caycaj pushaj hermanucuna CHUC radiuta rantipäcurgan Canadá hermanunchicunata, chaynopa Regent Building sitiucho juc jatun wasita rantipäcurgan radiuta chayman witichinanpaj.

CHUC radio captinrämi runacuna Diospita ali wilacuycunata wiyapäcurgan Saskatchewan jutiyoj provinciapa tacsha marcancunachopis. Chay radiuta wiyaycurmi caru marcacho taj Graham jutiyoj warmiga cartapa mañacurgan publicaciuncunata Bibliapita. Chay cartata chasquicurmi George Naish hermanuga cuentata gocurgan chay warmi masta yachacuyta munaycashganta, chaymi Estudios de las Escrituras nishgan librucunata mandargan. Chayta chasquicurmi Graham warmiga predicaj aywargan caru marcacunamanraj.

CREISHGANCUNAPITA MÁS TANTIACURGAN

1925 wata marzo quillacho inglés rimaycho Wilacamoj revista wilacurgan juc mushoj nación yurishganta. Bibliata Estudiajcunaga musyapäcurgannami luta religiuncuna, negocianticuna, gobiernucuna y demoniucunapis Satanaspa maquincho caycashganta, pero cay Wilacamoj revistawan “tantiaj y yäracuypaj esclavuga” hermanucunata tantiachergan cielucho y pachachopis lapan Diospa sirvejnincuna juc shongunola payta sirviycashganchita y Satanaspa contrancho caycashganchitapis (Mat. 24:45). Wilacurganpis 1914 watacho Jesús gobernar galaycuptin cielucho guerra cashga, chaymi Satanasta y demoniucunata cielupita Jesús cay pachaman garparamurgan (Apoc. 12:7-9).

Cay mushoj wilacuyga waquincunapäga manami facilchu cashga chasquicunanpaj, chaymi cay revistacho cayno wilacurgan: “Leishgayquiwan mana acuerducho caycarpis, Jehovata mana ajayaypa sirviy y payman imaypis yäracuy”.

Tom Eyre hermanuga Gran Bretaña naciunpita colportorb cargan. Pay wilacun: “Waquin caj Bibliata Estudiajcuna chay revistata leipäcur cushishga sienticärirgä. Apocalipsis 12 caj capitulucho Diospa Gobiernun cielucho caycashganta tantiapäcur alapa cushicärirgä Diospa Gobiernunpita runacunata yachachipäcunäpaj. Cayta tantiapäcushgäcunaga yanapacamargan maycho caycarpis lapan runacunata yachachipäcunäpaj, cuentata gocärishgä Jehová Dios sirvejnincunata yanapaycashganta”.

CUENTATA GOCÄRIRGAN JEHOVAPA JUTINPITA MÁS WILACÄRINANPAJ

Canan wichan Jehovapa testiguncunaga Isaías 43:10 texto nishganta shumaj tantianchi, chaycho nin: “Qamkunaqa testïgükunami karkaykanki. Akrashqä sirvimaqnïkunami karkaykanki”. Cay Isaías textupita wilacuycuna 1925 wata manaraj chayamuptenga publicaciunninchicho alapaga manami yargamurganrajchu, pero 1925 watachoga 11 Wilacamoj revistacunacho Isaías 43:10, 12 textucunapita wilacurgan.

1925 watacho agosto quilla ushaycaptin Bibliata Estudiajcunaga Indianápolis marcacho Asambleata rurapäcurgan. Chay asambleapa programancho Joseph Rutherford hermanuga shamojcunapaj cayta escribergan: “Cay asambleaman shamushganchega Jehovami yanapämäshun valurta jorgunanchipaj, chaynopa más cushi cushila wilacuycänanchipaj”. Cay asamblea pusaj junajmi ruracargan y chaycho caycajcunatami animargan Jehovapita may chaychopis wilacärinanpaj.

Chay asamblea sábado junajcho hermano Rutherford chaycho caycajcunata animargan más predicapäcunanpaj. Pay leirgan Isaías 43:12, cay textucho Jehová sirvejnincunata nin: “Japalä Dios kashqätami testïgu karkaykanki”. Nircur Isaías 62:10 textuta leirgan: “¡Lapan nación runakuna yaykamunanpaq señalta churapäkuy!”. Chaypitana hermano Rutherford nergan: “Diospa siervuncunalami Jehovapa santo espiritun yanapaptinrämi paypita runacunata wilacun. Chaymi paycuna Jehovapa testigunmi capäcun”.

Discursunta usharcur hermano Rutherford “Ali cawayta shuyaräshun” nishgan trataduta leirgan. Chay trataduga wilacurgan Diospa Gobiernun imata rurananpaj cushish ali saludyoj imaycamapis cawananchipaj, y chaycho caycajcunaga chayta wiyar alapa cushicärergan. Tiempuwanga chay trataduta achca idiumacho traducirgan y 40 millón trataducunata predicaciuncho runacunata cachapargan.

Chay tiempuchoga Bibliata Estudiajcunataga manarajmi Jehovapa testiguncunanochu reguipäcurgan. Pero paycunaga cuentata gocuycargan Jehovapa jutinpita wilacunanpäga más ali caycashganta.

BIBLIAPITA YACHACUYTA MUNAJCUNATA WATUCUR GALAYCARIRGAN

Bibliata Estudiajcuna más miraptenga encargado hermanucuna paycunata animargan yachacuyta munajcunaman yapay watucoj cutinanpaj. “Ali cawayta shuyaräshun” nishgan tratadupa campañan pasarcuptinna Bulletinc nergan: “Chay trataduta chasquej runacunaman yapay watucoj cutipäcuy”.

1925 wata enero quilla Bulletin nishgancho juc Bibliata Estudiaj Texas ciudäpita cayno nergan: “Predicapäcushgä territoriuman yapay cutipäcuptëga, wilapashgäta runacunaga más wiyapäcamaj. Juc caj marcaman manami cadala aywapäcoj cächu predicapäcunäpaj. Chayrämi mamanë pani Hendrixwan predicaj yapay aywashga cargan, y chaychoga achca librucunata aypupäcurgan”.

Jina Panamá naciunpita juc colportor wilacun: “Punta caj predicashgächo runacuna manami wiyapäcamajchu, pero yapay predicaj cutiptëga runacuna wiyapäcamaj. Chaymi cay wata calpachacuycä Bibliapita yachacuyta munaj runacunata yapay watucunäpaj, y runacuna Bibliapita munashganga alapa cushichiman”.

MASTA RURANAPAJ CARGAN

1925 wata ushariptin hermano Rutherford colportorcunata juc cartawan shacyächergan chay wata rurashganpita, y shamoj watacuna imata rurapäcunanpaj parlargan. Cayno nergan: “Cay pasaj wata gamcuna achca laquishga caycaj runacunata Bibliawan yanapacushgayqui, y chay rurashgayquicunapita cushishga carcaycanqui. Cay shamoj watacunachoga cangami imaycata Diospaj rurapäcunayquipaj, chaycunaga cushichishunquipämi. Chayta rurar musyachicärinqui Diospa testigun capäcushgayquita, y waquin runacuna Diosta alabapäcunga. Chaynopa lapanchimi Taytalanchi Jehová Diosninchita alabashun”.

1925 wata ushananchona hermanucunaga Nueva York marcacho caycaj Brooklyn Betelta jatunyachiyta munapäcurgan, y 1926 watachona chay Betelta rurar galaycärirgan.