Gapra warmipa mañacuynintami Dios wiyan

Asia naciunpita Yanmei jutiyoj testigush, juc warmita yanapashga callita chimpananpaj, jutin cargan Kailan.a Payga nirgan: “¡Päquila yanapämashgayquipita, Dios bendicishunquipaj! Chaurasga Yanmei nirgan yapay tincunanpaj Bibliapita parlapacärinanpaj. Tiempuwanga Kailanshi nirgan “nogaga Diostami mañacuycargä rasunpa caj religiunta tarinäpaj” nir. ¿Imanirtaj payga Diosta chaytami mañacurgan?

2008 watachoshi, gapra yanasan Kailanta invitargan iglesianman aywananpaj, chaychoshi gapra runacunata yanapaj. Yachachicojta wiyarshi Kailanga tapupargan chay texto maypita leimushganta. Sacerdotinash nirgan Bibliapitami leimushganta. Chauras paypis Bibliata leiyta munargan. Chaymi chino rimaycho braille nishgan Bibliatami tariycurga, sojta quillacunalacho lapanta leir ushargan. Chaychoshi yachacurgan Diospa jutin Jehová canganta, y trinidad yachachicuyga luta yachachicuymi.

Payga ricargan iglesiacho waquincuna Biblia nishganno mana cawapäcuycajta, chayshi paytaga laquichirganmi. Micuyta garaptinshi, gapracunataga micuy puchushgalanta garaycoj. Chayshi payga alapa laquicoj, y wasinpita cercalancho juc iglesiatana ashirgan. Chaymi rasunpa caj religiunta tarinanpaj Diospa yanapacuynintami mañacurgan.

Yanmei cuyacuywan yanapashganpitami, Kailanga Bibliapita yachacuyta galaycurgan. Tiempuwanga Jehovapa testiguncunapa reuniunninmanpis aywargan. Kailan cayno wilacun: “Chaylaraj reuniunman aywashgätaga manami imaypis gongashächu. Hermanucunaga cuyacuywanmi chasquipäcamargan. Gapra carpis, cuentata gocurgä paycuna cuyacoj capäcushganta”.

Chaypitanash Kailanga lapan reuniuncunamanna aywaj. Reuniuncho canciuncunapis cantananpaj sellama cushicoj. Ichanga braillicho leinanpaj canciuneruga mana carganchu. Chaymi hermanucunapa yapacuyninwan Kailanga quiquinpa canciuneruntami rurargan. Y chay lapantash rurargan 22 horacunalachomi, 151 canciuncuna braillicho escribirgan. 2018 wata, abril quillachoga Diospita yachachicur galaycurgan y chaypitaga cada quilla 30 horacunano predicargan.

Kailan bautizacunanpäga, Organizados para hacer la voluntad de Jehová nishgan librupita tapucuycunata y textucunatapis Yanmei grabashga Kailanta goycunanpaj. 2018 watacho, julio quillachoshi Kailan bautizacurgan. Payga nin: “Chay asambleacho hermanucunaga cuyacuywanmi tratapäcamargan, chayga shongütapis cuyurganrämi. Chay junajga wagashgarämi cushicuypita, ‘cananga rasunpa caj religiunchomi caycä’ nirgä” (Juan 13:34, 35). Cananga Kailan waquin runacunatapis yanapacuytami munan, chaymi lapan tiempunwan Diospita yachachicun.