MOZO-JIPASHCUNA TAPUCÄRIN
¿Imanotaj yanapäman Bibliata leiptëga? Juc caj: Shumaj yachachicuyta Bibliacho ashiy
Briana jutiyoj jipash 15 watayojpita nin: “Bibliata leiyga camargämi, pero alapa achca letrayojmi”.
¿Gampis chaynocu sienticunqui? Chaurasga cay tema yanapäshunquimi.
¿Imanirtaj Bibliata leinayqui?
Öraga capazchi guelanacurinquiman Bibliata leinayquipaj. ¿Imanir? Canan wichan telivisiuncho y videucunacho yargamojcunawan tincuchishgaga, Bibliaga capaz paresipashunquiman dibujuynaj y fotuynaj achca letracunala.
Pero imaraj canman cuyaylapa macwayashga tesoruyoj cajata tariycurga, ¿manachuraj rasla quichayta munanquiman?
Chaynomi Bibliapis. Chaychoga shumaj yachachicuycunatami tarinqui y caycunacho yanapäshunqui:
Mana pantaypa decidinayquipaj.
Taytayquicunawan ali cawacunayquipaj.
Ali amigucunata tarinayquipaj.
Nitipacashga mana sienticunayquipaj.
¿Imanotaj unay libro caycarpis yanapämashwan ali cawacunapaj? Quiquin Bibliami nin “Diosninchëga palabranta quiquinmi esquirbichiran” (2 Timoteo 3:16). Chayga ninanmi Bibliacho caycaj consejucunaga quiquin Diospitami shamun.
Cuyaylapa tesorucunayoj cajanomi Bibliapis shumaj yanapacoj yachachicuycunatami chararan.
¿Imanopataj Bibliata leinquiman?
1. Galaycunanpita ushashgancamami leinquiman. Caymi yanapäshunqui Biblia imapita parlashganta musyanayquipaj. Chaytaga tucuynopami rurayta puedinqui; ishcay ejemplucunata ricärishun:
66 libruncunatami gatinalanpa leiyta puedinqui Genesispita Apocalipsiscama.
Lapan pasashgan wilacuycunata gatinalanpa leiramuy.
Cayta ruray: Ricäriy la sección 4-A del folleto Guía para el estudio de la Palabra de Dios nishganta, chaycho tarinqui Jesús Pachacho caycar más importante ruraynincunata.
2. Problemayquiwan yanapäshunayquipaj wilacuycunata ashiy. Tantiarinapaj:
¿Yaracuypaj amigucunatachu tariyta munanqui? Chaurasga, Davidwan Jonatanpa wilacuyninta leiy (1 Samuel 18 al 20 capitulucuna). Nircur shumaj yarpachacuy imataj paycunata yanapashga ali amigo capäcunanpaj.
¿Tentaciunpa pasar mana ishquinayquipächu yachacuyta munanqui? José pasashganta leiy y imano mana ishquishganta yachacuy (Génesis 39 caj capítulo). Nircur maslata yachacuy imata Joseta yanapashga Jehovalata casucunanpaj mana alicunapa pasananpaj cajta musyarpis.
¿Musyayta munanquimanchuraj oraciuncuna imano yanapäshunayquipaj? Nehemiasta pasashganta leiy (Nehemías 1 y 2 capitulucuna). Nircur más yachachicuycunata ashiy imano Dios yanapämanchi payta mañacuptinchi.
Ruranayquipaj: Bibliata leinayquipaj munarga, bulla mana cashgan sitiuta ashiy shumaj yarpachacunayquipaj.
3. Salmo librupa juc capitulunta o maygan wilacuyta acray, leiy y nircur yarpachacuy imano yanapäshunayquipaj. Leiyta usharirga, cayno tapucuy:
¿Imanirtaj Jehová caycunata escribichishga?
¿Imatataj yachachiman Jehovapita y munaynin ima cashganta?
¿Imanotaj yanapäman cawaynïcho?
Ruranayquipaj: Juc tareatano churacuy. Bibliata leinayquipaj imaytaj galaycunayquipaj escribiy.