Domingo 23 noviembripita
TAYTA DIOSTA mantsakuq humildi runaqa rïcuyanqami, pïmaypitapis ali rikashqami kanqa y ali kawaytami tarinqa (Prov. 22:4).
Mozularaj cristiano captiqui, yarpachacuy pogushga cristianuman ticranayquipäga manami jinaylapitachu canga. Chaymi ali cristianucunapita yachacunquiman, ali yarpachacoj y confiacuypäpis canquiman. Jina imalatapis rurayta yachacunquiman y shamoj watacunapäpis camaricushgala caycanquiman. Mozo cashpayqui imaycata ruranayquipaj cashganta yarpar capazchi ninquiman ‘nogapäga sasami chay lapanta ruranäpaj’ nir. Pero ama manchacuychu, ¡gamga puedinquimi! Jehovapis listo caycan yanapäshunayquipaj (Is. 41:10, 13). Congregaciuncho caycaj hermanucunapis yanapäshunayquita munan. Jehová munashganno runaman ticraptiquega alapa cushishgami cawacunqui. Mozucuna, gamcunataga amatar cuyayculanchi y Jehovapis bendiciyculäshunqui lapan calpachacushgayquita pogushga cristianuman ticranayquipaj. w23.12 29 parr. 19, 20
Lunes 24 noviembripita
Achäquita ashipajcunatapis perdunanmi (Prov. 19:11).
Cayman yarpäshun, gamshi hermanucunawan cushi cushila carcaycar fotucunata tomacunqui. Pero juc foto mana ali yarguptenga, ¿imataj chay fotuwanga ruranqui? Borrarinqui ¿au?, y ali caj fotucunalawanchi quedacunqui. Chararashganchi fotucunata ricaycurga yarpanchimi unaycho hermanunchicunawan ali pasashganchita. Pero imaylapis paycuna pantarcuptenga, ¿imataraj rurashwan? ¿Chaylaman yarparaycäshunchuraj? Manami. Imanomi juc mana ali fotuta borrarinchi, chaynolami hermanunchi pantashgantapis umanchipita borrarishwan (Efes. 4:32). Aumi, imaycacuna caycan hermanunchiwan ali pasashganchita yarparänapaj. Chayta rurarga paycunapita ali cajcunalatami yarpäshun. w23.11 12, 13 parr. 16, 17
Martes 25 noviembripita
Warmikunapis kamaraqlata jatikäritsun. Tayta Dios munashqanno kawaq warmikunano alikunata rurar kawapäkutsun (1 Tim. 2:9, 10).
Hermanacunaga mana jamurpaypaj ropacunata jaticunmanchu y ali juiciuwan visticunman. Pabluga nergan cristianacunaga shumaj yarpachacur-raj visticunanpaj y waquincunamanpis yarpachacunman. ¡Alapami cushicunchi pogushga cristianacuna ali tantiaycur visticuptin! Ali tantiacoj warmiga tantiacunmi ima ali cashganta y mana ali cashgantapis. Abigaíl rurashganta ricashun. Runan mana ali decidishganta musyar, payga tantiacurgan wasincho caycajcunapa vidancuna peligrucho caycashganta. Chaymi jucla imaycata rurargan paycunata salvananpaj (1 Sam. 25:14-23, 32-35). Tantiacoj cashganchega yanapämanchi imay parlanapaj y imay upälacunapaj, jina waquincunawanpis cuyacoj canapaj (1 Tes. 4:11). w23.12 20 parr. 8, 9