Mateo

5 Maychica runacunata ricaycurmi, Jesús jircapa patanman wichaycur jamacurgan. Y discipuluncunapis pay cashganman shamurgan. 2 Chaycho yachachicuyta galaycurmi cayno nirgan:

3 “Cushishgalami caycanga imanopapis Diospita yachacuyta munajcuna,* paycunapämi canga cielucho Diospa Gobiernun.

4 Cushishgalami caycanga juchancunapita laquicojcuna, paycunami consolashga canga.

5 Cushishgalami caycanga manshu runacuna, paycunapämi cay pacha herencian cangapaj.

6 Cushishgalami caycanga yacunaypanoraj micanaypanoraj justiciata ashejcuna, paycunaga ashishgantami tarenga.

7 Cushishgalami caycanga cuyapayparaj yanapacojcuna, paycunapis cuyapashgami canga.

8 Cushishgalami caycanga shonguncho y yarpaynincho limpio cajcuna, paycunami Diosta ricanga.*

9 Cushishgalami caycanga piwanpis jauca cawayta ashejcuna, paycunatami nipäcunga Diospa churin cashganta.

10 Cushishgalami caycanga ali cajcunata rurashganraycu chiquishga cajcuna, paycunapämi canga cielucho Diospa Gobiernun.

11 Cushishgalami gamcuna carcaycanqui gatirajnë cashgayquiraycu runacuna ashlishuptiqui, gaticachar nacachishuptiqui y lulacurcur* gamcunapita ima mana alicunatapis parlaptin. 12 Unaycho profetacunatapis chaynolami nacachipäcurgan, chaymi gamcunapis alapa cushicäriy, cieluchomi jatun premiuyqui caycan.

13 Gamcunami cay munducho cachi jina carcaycanqui, cachi gamyacäcuptenga mananami yapay pochgunnachu y imapäpis valinnachu, wajtaman jitarinalapaj y runacuna jarucunalanpaj caycan.

14 Gamcunami cay munducho achquino carcaycanqui. Jatun jircapa janancho caycaj marcaga manami pacaranchu. 15 Pipis mecherunta ratarcacherga* manami juc canastawan chapaycunchu, sinoga wasicho caycajcunata achicyapänanpämi más altunninman churaycun. 16 Chaynolami gamcunapa ali rurayniquicunapis achqui jina runacunapa naupancho achquiranman, chayta ricarmi paycunapis cielucho caycaj Taytayquita alabapäcunga.

17 Yarpapäcuychu Ley mandacushganta y Profetacuna wilacushganta elgächinäpaj* shamushgäta, sinoga lapanta cumplinäpämi shamushcä. 18 Rasunpami niycä, lapan Ley cumplicänancama manami ni juc ichic letralapis elgangachu, ¡chayno mana captenga cielupis y cay pachapis elganmanchi! 19 Chauraga pilapis ichic mandamientulatapis mana casucuptin y waquincunata chayta rurananpaj niptin, mana ali ricashgami canga* y cielucho Diospa Gobiernunman yaycungachu. Ichanga casucojcuna y waquincuna chayta rurananpaj yachachejcuna ali ricashga canga* y cielucho Diospa Gobiernunmanmi yaycunga. 20 Chaymi gamcunata në, fariseucunapita y escribacunapita más casucoj mana captiquega manami imaypis cielucho Diospa Gobiernunman yaycunquichu.

21 Mayapäcushcanquimi unay castayquicunapaj cay mandato cashganta: ‘Wanuchicoj caychu, wanuchicojga juezcuna juzgananpämi apashga canga’. 22 Ichanga noga në, imaypis runa masinwan rabiashgala cacojcunaga juezcunamanmi aywanga juzgashga cananpaj. Jina pipis waquincunata ashliyparaj imatapis niptenga, más carguyoj juezcunamanmi aywanga juzgashga cananpaj. Y ‘¡mana valej upa canqui!’ nejcunapis Gehenacho ushacaytami munaycan.

23 Chaymi ofrendayquita altarman apaycar pilapis* gamwan rabiashga caycajta yarparga, 24 chaylacho ofrendayquita cachaycur ayway chay runa masi­quita ashircur amistanayquipaj, cutircamurraj ofrendayquita goycunqui.

25 Demandashojniqui juezman apaycäshuptiqui caminulacho payta ruwacuy problemayqui alchacänanpaj, chayta mana rurarga pajta juezman entregashunquiman, juezna guardiata gayamunga y chay guardiana carcelcho wichgashunqui. 26 Rasunpami niycä, chaypitaga manami yargunquichu jagayquita pagar lapan guellayniqui* ushacashgancama.

27 Gamcuna mayapäcushcanquimi cayno nishganta: ‘Majayquita ama engañaychu’. 28 Ichanga noga në, pipis juc warmita pasaypa munapashgancama ricapaptenga, yarpaylancho maynami chay warmiwan oglanacur juchata rurashga. 29 Chaymi derecha caj nawiqui juchata rurachishuptiquega jorgurir caruman wicapariy, Gehenacho lapan cuerpuyqui ushacashganpitaga alichi canman juc nawilayqui ogracaptin. 30 Chaynolami derecha caj maquiqui juchata rurachishuptiquega rogurir* caruman wicapariy, Gehenacho lapan cuerpuyqui ushacashganpitaga alichi canman juc maquilayqui ogracaptin.

31 Caytapis nipäcojmi: ‘Pï runapis warminpita raquicayta munar juc papelta firmapanman’. 32 Ichanga noga në, pï runapis warmin mana engañashga captinpis* divorciacur juc warmiwan cacurga, adulterio juchamanmi warminta apaycan, y chay warminwan pipis casaracuptenga adulterio juchatami ruraycan.

33 Wiyapäcushcanqui unay castayquicunapaj cay mandato cashganta: ‘Mana cumplinayquipaj captenga pitapis aunicuychu, Jehovata aunishgayquitaga cumpliy’. 34 Ichanga noga në, yangalaga cielupa jutincho aunicäriychu, cieluga Diospa tronunmi caycan. 35 Ni cay pachapa jutincho, cay pachaga Diospa chaquincuna jarucunanpämi caycan. Ni Jerusalenpa jutinchopis, chayga caycan poderyoj Reypa marcanmi. 36 Jinamanpis umayquipa jutincho imalatapis aunicuychu, manami ni juc ajchalayquitapis yurajyächiyta o yanayächiyta puedinquichu. 37 Más aliga canga ‘aumi’ nishgayquita cumpliptiqui, y ‘mana’ nishgayquitapis cumpliptiqui, chaypita mascunatana parlapäcuptiquega Diablupitami shamun.

38 Gamcunapis caytami mayapäcushcanqui: ‘Pipis jucpa nawinta pashtapaptin, nawin pashtashga cachun, y quirunta paquipaptenga, quirun paquishga cachun’. 39 Ichanga noga cayno në, mana ali runataga ama ichipaychu. Pipis derecha caj carayquicho laguiashuptiqui, izquierda cajta camaripay laguiashunayquipaj. 40 Pipis juezcunaman apashuptiqui rurin caj ropayquita quitayta munar, janan caj ropayquitapis goycuy. 41 Maygan autoridäyoj runa juc hora arupänayquipaj obligashuptiqui, ishcay hora arupaycuy. 42 Imalatapis mañacushojniquitaga jucla goycuy, y pipis prestadula* mañashuptiqui ama upa tucuychu.

43 Cayno nejtapis mayapäcushcanqui: ‘Runa masiquita cuyay y chiquishojniquita chi­quiy’. 44 Pero noga në, chiquishojniquicunata cuyay* y ­nacachishojniquicunapaj Diosta mañacäriy.* 45 Chayta rurarmi musyacanga cielucho caycaj Taytayquipa wamrancuna cashgayquita, payga ali y mana ali runacunapaj intita yargachimun, alita y mana alita rurajcunapäpis tamyachimun. 46 Cuyashojniquilata cuyarga, ¿ima alitataj chasquipäcunqui? ¿Manachu chaytaga ruran ­impuestuta ­cobrajcunapis? 47 Y hermanulayquicunalata ­saludarga, ¿ima alitataj rurarcaycanqui? ¿Manachu chaytaga ruran waquin runacunapis? 48 Chauraga cielucho caycaj Taytayqui pï maywanpis cuyacoj cashganno, gamcunapis chaynola cuyacoj capäcuy”.