Filemón

1 Cuyashga yaracoj masë Filemón, Jesusraycu carcelcho caycar, Timoteuwan junto quiquë Pablo cay cartata gampaj escribiycämö. 2 Jina Apfia paninchipaj, ali soldaduno aroj Arquipo hermanunchipaj y wasiquicho shuntacaj hermanucunapäpis* cay cartata apaycächimö.

3 Munayculämi Taytanchi Dios y Señor Jesús cuyapäshushpayqui tranquilula* cawacärinayquipaj.

4 Cada cadala Diosta mañacur gampaj ruwacamö, 5 musyaycämi ali yaracoj cashgayquita, Señor Jesusta y santo* hermanunchicunatapis cuyashgayquita. 6 Mañacamö waquincunano ali yaracoj cashgayquiraycu musyanayquipaj lapan charashganchi ali cajcuna Jesuspita shamushganta. 7 Cuyacoj cashgayquita wiyashgämi cushichimashga y consolamashga.* Yaracoj masinchicunapa* cuyacuyninpis gamraycu masraj mirashga.

8 Cristupa apostulnin caycar mandarpis mandämanmi ali cajcunata ruranayquipaj, 9 pero ruwacö cuyacoj cashpayqui Onesimuta chasquinayquipaj. Noga Pabluga auquinnami caycä y Cristo Jesusraycu carcelchopis caycä. 10 Ruwaculämi wamrä Onesimuta chasquinayquipaj, carcelcho* caycarmi paypa taytanman ticrashcä. 11 Unaycho shumaj mana sirvishushgayqui captinpis, canan ichanga cristianuna caycar gamta y nogatapis sirvimäshun. 12 Chaymi yapay gamman mandaycämö, paytaga alapami cuyayculä.

13 Ali wilacuycunaraycu carcelcho caycashpä munämanmi nogawan quedacunanta y gam yanapamayta munashgayquino yanapamänanpaj. 14 Pero gam mana permitiptiquega manami imatapis rurayta munächu, quiquiquipita imatapis rurar ali shongulayquiwan ruranayquitami munä. 15 Capaz chayraycu juc tiempo gueshpir aywacushga, cutircamur maquiquipita imaypis manana aywacunanpaj 16 y ashmayniquitano* mana ricanayquipaj, sinoga cuyashga yaracoj cristiano masiquitano. Paytaga alapami cuyä, pero gamwan yapay caycaptin Señorraycu nogapitapis masrämi cuyanqui. 17 Amiguyquitano ricamarga, nogata imano chasquimashgayquinola paytapis ali chasquiyculay. 18 Y contrayquicho imalatapis rurar jagayqui captenga, nogami lapanta cutichishayqui. 19 Quiquë Pablo cay cartata maquëwan escribiycämö, nogami pagashayquipaj (pero ama gongaychu gampis jagä cashgayquita). 20 Señorpa gatejnincuna cashganchiraycu nishgäta rurayculay wauguilä y Cristupa gatejnin cashpayqui shonguläta cushircachiy.

21 Musyämi nishgäcunata casucunayquipaj y cay cartacho lapan escribishgäpitapis mastaraj ruranayquipaj. 22 Gamcuna mañacushgayquiraycu capaz carcelpita yargushaj, chauraga watucoj aywaptë juc cuartuta alistayculay posadachimänayquipaj.*

23 Epafras hermanunchipis nogano Cristuraycu preso caycar saludunta gampaj apachicamun. 24 Jina Marcos, Aristarco, Demas y Lucas yanapamaj wauguinchicunapis saluduncunata apachicamun.

25 Ali shonguyoj cashgayquiraycu Señor Jesuspa favornin gamcunawan cayculächun.