Diosman creirgächu

UNAY CAWAYNË

Juc tacsha marcalachomi yurishcä, jutinga Sajonia, chay wichan cargan la República Democrática Alemana (RDA). Taytäcunaga alapami cuyapäcamargan y yachachipäcamargan ali runa canäpaj. Tashgä marcächoga runacunata imatapis gocarganchu maygan religiunpita cananpaj. Nogapis Diosman creirgächu. Chay wichanga waquin waquilanla Diosman creipäcurgan, juccunaga ateo cashpanmi Dios cashganta mana creipäcojchu.

Nogataga gustamargan lapan runacunata igualpa ricänäpaj, chaymi yarpargä alichi canman lapan guellayta wacchacunata y ricucunatapis igualpa raquipänanpaj, chaynopa ricu y wacchacuna mana cananpaj. Nircur juc organizaciunman yaycurgä runacunata yanaparcunäpaj, chaychoga achca mozucunami carcaycargan. 14 watayoj cashpämi lapan tiempüwanmi arurgä papelcunata shuntanäpaj, y Aue marcapita autoridäcuna alapa agradecido cashpanmi chayno arushgäpita premiuta gomargan. Mozularaj caycaptïpis reguishga autoridäcunata reguirgä y paycunawan aruptïga ali canäpaj yarpargä.

Pero mana yarpashgänochu cargan. 1989 watacho Berlinpa murunmi ishquirgan y comunismo nishganpis ushacargan Europa del Este naciuncho. Imayca injusticiacuna pasaycashganta yarpargä. Tantiarinapaj, comunismo nishganta mana yanapajcunataga manacajman churapäcoj y jucnin jucnincunapis mana igualpa ricanacojchu, manami tantiargächu imanir chayta rurapäcushganta. Chaycuna pasaycashganta ricarga gustamarganchu y paycunano cayta mana munargänachu.

Chaypita juc ruraycunata rurayta galaycurgä, música y pinturapis gustamar galaycurgan. Universidäman yaycunäpaj música yachacuyta galaycurgä juc escuelacho; tucapacoj cayta y cuadrucunata rurayta munaj cä. Taytäcuna yachachipäcamashganga ichic ichiclapa gongaycurgä, fiestacunalacho cacuyta yachacurgä y achca warmicunawan cacurgä. Chayno captinpis, cushishga cayta puedirgächu, y pintashgä cuadrucunachopis ricacargan laquishga caycashgä. Chauras tapucur galaycurgä, “¿nacarlachuraj cawanäpaj Dios camamashcanchi? ¿Imanoraj canga shamoj tiempucho?”

Juc cuti escuelacho achca jovincuna shamoj tiempucho ima pasananpaj cajpita parlaycajcunawan jamacurgä. Chaycho caycargan Mandy,a payga Jehovapa testigunmi cargan y cayno nimargan: “Andreas, shamoj tiempucho ima pasananpaj cajta musyayta munarga, Biblia ima nishganta ashiy”. Tapucushgäcunapita respuestanta musyarga cushicurgämi.

Más yachacuyta munaptï Mandy yachachimargan Daniel capitulo 2 texto ima ninantaj y gustamarganmi chaycho tantiashgäpita. Chaychoga wilacun achca mandaj marcacunapita imano achca watacunapa gobernamushga. Chaypita Mandy yachachimargan maygan profeciacuna shamoj tiempucho cumplicanga. Caycunata musyarga alimi cargan. Chaurasga tapucurgä: ¿Pitaj chay profeciacunata escribirgan? ¿Pitaj wilacushga chaycuna pasananpaj? ¿Diosga canchuraj?

BIBLIA YANAPAMARGAN CAMBIANÄPAJ

Chaypita Mandy nimargan Horst y Angelika matrimoniuwan Bibliapita yachacurcunäpaj. Paycunaga alimi yanapamargan Bibliata tantianäpaj, cuentata gocurgä Jehovapa testiguncunala Diospa jutinta utilizashganta y runacunatapis yachachipäcun (Salmo 83:18; Mateo 6:9). Juc Shumaj Pachacho imaycamapis cawanapaj Dios awnimashganchita yachacurgä.  Salmo 37:9 nin: “TAYTA DIOSMAN yaracojcunallami alli pachacho cawanga”. Cayta musyarga alapami shacyächimargan, Diosga munan lapan runacuna paypita yachacärinanpaj, mandamientuncunata casucärinanpaj y imaycamapis cawapäcunanpaj.

Manami facilchu cargan cambianäpaj y Biblia wilacushganno cawanäpaj. Tucapacoj y pintor carga, orgulloso runaman ticracurgä, chaurasga yachacunäpaj caycargan humilde canäpaj. Sasa cargan ganra ruraynïcunata jaguirinäpaj. Jehovata alapami agradecicö yanapamashganpita, payga cuyacuywan y pacienciawan yachachimashga payta sirvinäpaj y mandamientuncunata casucunäpaj.

Wamra cashgäpita 18 watayojcama Diosman manami creirpis lapan runacunata igualpa ricaj cä. Pero Bibliapa yachachicuynincunaga alapami cushichimargan, imayca cambiucunata ruranäpaj yanapamashga y manami manchacurgänachu shamoj tiempucho ima pasananpaj. 1993 watacho bautizacurgä Jehovapa testigunno, y 2000 watachoga Tabitha jutiyoj hermanawan casaracurgä. Chaypita lapan tiempücunawan ishcanï Diospita yachachicur galaycärirgä. Alapami cushichiman runacunata yanaparcuptë Jehovapita yachacärinanpaj.

IMATA LOGRASHCÄ

Jehovapa testiguncunawan Bibliapita yachacur galaycuptïga, taytäcuna manchacurganmi. Ali runaman ichic ichiclapa ticraycuptë ricaycurga, paycunapis Bibliapita yachacuyta y reuniuncunamanpis aywar galaycärirgan. Cananga alapami cushicö cambiucunata rurashgäpita.

Warmëwanmi calpachacärë Bibliacho matrimoniucunapaj caycaj consejucunata casucärinapaj y cayga cushichipäcamanmi. Tantiarinapaj, Hebreos 13:4 nin: “Lapayki majayuq kaqkuna majaykiwan kuyanakur ali kawapäkuy. Majaykita ama jarukäriytsu”. Cay consejuta casucärirga yanapäman ishcanï cuyanacur cawapäcunäpaj.

Mananami alapa yarpachacönachu imata pasanga shamoj tiempucho. Cananga cushicömi Jehovapa testiguncunapa castan caycarmi, juc yarpaylawan y cushi cushila cawacö. Caychoga pipis chiquinacärinchu, jucnin jucninpis yanapanacärin. Wamra cashgäpita chayta munargä.