¿Imanirtaj Diosta aduranapaj wasiman aywayga ali caycan?

Jehovapa testiguncunaga semanacho ishcay cuti Diosta aduranapaj wasiman aywapäcun. ¿Imataj chaycho rurapäcun? ¿Imanirtaj gampis aywanquiman?

• ¿Imataj rurapäcun Diosta aduranapaj wasicho?

• ¿Imanirtaj ali caycan gampis aywanayquipaj?

• Waquin mozo-jipashcuna ima nipäcushgan

¿Imataj rurapäcun Diosta aduranapaj wasicho?

Diosta aduranapaj wasiga Bibliapita yachacunanpämi caycan, chaycho yachacushgayquiga yanapäshunqui caycunachomi:

• Diospita rasun cajta yachacunayquipaj.

• Canan ima pasaycanganta tantianayquipaj.

• Más ali runa canayquipaj.

• Ali amigucunata tarinayquipaj.

¿Musyargayquicu? Jehovapa testiguncuna gotucashganchi sitiuta ninchi Diosta aduranapaj wasi, porque chaychoga más Diospa Gobiernunpita yachacunchi (Mateo 6:9, 10; 24:14; Lucas 4:43).

¿Imanirtaj ali caycan gampis aywanayquipaj?

Chaycho yachacushgayquiga yanapäshunqui. Chay reuniuncunacho Bibliapa tantiachicuynincunapita yachacunqui, chayga yanapäshunqui más yachaj canayquipaj (Proverbios 4:5). Bibliaga cawayniquicho ali acranayquipaj yanapäshunqui. Jina cayno importante tapucuycunata contestamun:

• ¿Imapätaj cawanchi?

• ¿Dios nacachimanchicu?

• ¿Imataj pasamanchi wanuptinchi?

Semana ushaypäga cayno tapucuycunapita yachacunchi discursucunawanmi:

• ¿Imanirtaj Biblia yachachicushganno cawacushwan?

• ¿Pitataj ashishwan nacashganchi hora?

• ¿Imataj canan wichan Diospa Gobiernun noganchipaj ruraycämun?

Brenda jutiyoj jipash nin: “Juc estudiaj masëga reuniunman shamushga y familiäwan jamacush junto yachacärinapaj. Nircur chaycho parlacaramojcunata wiyarmi alapa gustashganta nimargan. Jina iglesiancho chayno mana yachacunganta nimargan”.

¿Musyargayquicu? Diosta aduranapaj wasimanga pï maypis aywayta puedinmi, y manami mañacunchichu guellayta, diezmuta ni ofrendatapis.

Chaycho caycajcuna shacyächishunqui. Bibliaga nin yaracoj masinchicunawan juntacaptinchi shacyächinacunanchipaj cashganta (Hebreos 10:24, 25). Casi lapan runacunaga quiquilanman yarpapäcun, pero Diospa y juccunapaj yarpachacoj runacunawan caycarga alapa alimi.

Elisa jutiyoj jipash nin: “Alapa laquishga o uticashga caycaptë, Diosta aduranapaj wasicho caycajcuna shacyächiman. Reunión ushariptin wasëman cutimurga más cushish y jaucala sienticö”.

¿Musyargayquicu? Jehovapa testiguncunaga entero pachacho 120.000 congregaciuncuna y maspis can, jina 60.000 sitiucuna maspis can juntacärinanpaj. Cada wata 1.500 o más sitiucunata sharcachinmi juntacärinanpaj, porque runacuna reuniuncunaman aywapäcushgan miraycämun.a