May chaychopis pistoläwan purej cä

UNAY CAWAYNË:

Roma marca wacläducho yurishcä y juc waccha barriucho tiyashcä. Cawaynë sasami cargan. Mamanëta reguishcächu y taytäwan ali goyashcächu. Callejeruno winashcä.

Chunca watayoj caycar suwacoj galaycurgä, y chunca ishcay watayojna caycar wasëpita aywacurgä. Achca cutipa taytäga comisariaman aywargan carcelpita jorgamänanpaj. Runacunawan imaypis rimanacurla caycargä y fiyu geniuyoj cargä. Chunca chusco watayojna caycar mana cutiypa wasëpita aywacurgä. Callicho tiyaj cä y drogata shogoj cä. Chacay chayamuptin juc carruta ashej cä chaycho pununäpaj y waraptinna maycho maylacunäpaj ashej cä.

Yachaj suwacojman ticrargä. Imatapis ruraj cä: callicho carteracunata suwacoj cä y chacaypana jatun wasicunaman yaycoj cä suwacunäpaj. Suwacuyta yachaptë juc reguishga pandillaman yaycunäpaj invitapäcamargan. Chayga permitimashga más “ali suwaj” canäpaj, bancucunata suwacoj galaycurgä. Pasaypa fiyu captë pandillacho cajcuna respetapäcamargan. May chaychopis pistoläwan purej cä, cabecerä rurincho chayta churar punoj cä. Peliayta, droga shoguyta, suwacuyta, ganrra rurayta y ashlicuypa parlayta imaypis cacurgä. Policiaga imaypis ashipäcamargan, chaymi achca cutipa carcelamargan. Achca watapa callicho y carcelcho caycargä.

BIBLIA YANAPAMARGAN CAMBIANÄPAJ:

Juc cuticho carcelpita yargurir juc tiäta watucaj aywargä. Tiä y primöcunapis Jehovapa testigunman ticrapäcushganta musyargächu. Paycuna invitapäcamargan reuniuncunaman, y ricanälapaj aywargä. Diosta aduranapaj wasiman chayaycur, puncupa ladulancho jamacunäpaj nirgä. Pï yaycushganta y yargushganta ricanäpaj. Chaychopis pistoläta charargä.

Chay reunión alapa yanapamargan. Caynomi yarpargä: “¡Cayno sitiucho imaypis cargächu!”. Chaycho caycajcuna cushishgala y asicurla capäcoj. Canancama testigucuna cuyacoj y cushishgala capäcushganta yarpä. ¡Shumaj goyapäcushganta ricar almiracurgä!

Jehovapa testiguncunawan Bibliapita yachacunäpaj decidirgä. Masraj yachacurga, cuentata gocurgä imano cawashgäta cambianäpaj. Proverbios 13:20 nishganta cuentaman churargä, chaycho nin: “Yachaj runacunawan goturarga yachaj caytami yachacunqui. Mana tantiyaj upacunawan goturarmi ichanga pirdicar mana allimanna chayanqui”. Chaymi decidirgä pandillacho manana canäpaj. Facilchu cashga, pero Jehovami yanapamargan chayta ruranäpaj.

Cuerpöpis limpio cananpaj cambiargä. Calpachacurgä cigarruta y drogata jaguinäpaj. Jatun ajchätapis rutucurgä, aretitapis jorgurgä y ashlicuypa parlaytapis jaguirgä. Fiyu geniüta contrulayta galaycurgä.

Yachacuyta, leiytapis gustamajchu, chaymi facilchu cargan Bibliapita yachacunäpaj y chayman yarpachacunäpaj. Pero ichiclapa ichiclapa Jehovata cuyar galaycurgä. Nircur jucnopa yarpar galaycurgä. Mana ali sienticurgä rurashgäcunapita y Jehová mana perdunamänanpäpis yarpargä. Pero Jehová Davidta perdunargan jatun juchacunata rurarpis. Chayta leirga, alapami yanapamashga laquicushga hora y jaucala caycänapaj yanapamashga (2 Samuel 11:1–12:13).

Runacunata yachachiytapis facilchu cargan (Mateo 28:19, 20). ¡Manchacoj cä waquin runacunawan tincuyta, masraj unay mana alita rurashgä runacunawan! Chayno captinpis ichiclapa ichiclapa manchacurgänachu, y waquin runacunata cushishgala yachachicuyta galaycurgä Taytalanchipita, payga imaycanopa perdunamanchi.

IMATA LOGRASHCÄ:

Jehovata reguiyga cawaynëtami salvashga. Unay amigücuna wanucushga o carcelarashga carcaycan. Noga ichanga, cushishgala cawacö, y shamoj tiempupaj imaycamapis cawanäpaj shuyaycö. Ñanpu shongu y casucoj runa canäpaj yachacurgä, fiyu geniütapis contrulayta yachacurgä, chaymi alimi goyä runacunawan. Casacushcä juc ali warmiwan, Carmen jutiyojmi. Ishcanë runacunata yanapacurcaycä Bibliapita yachacunanpaj.

Cananga suwacönachu, chaypa trucanga aruycä. Bancucunapapis aywä, pero mana suwacunäpaj, sinoga chaycho pichapacunäpaj.