¿Jehovapa testiguncunaga familiacunata raquicächinchuraj?

Jehovapa testiguncunaga alapami calpachacärë familiäcunawan y vecinücunawanpis ali apanacärinäpaj. Quiquin Diosmi familiacunata camacächishga, chaymi Payta respetanchi (Génesis 2:21-24; Efesios 3:14, 15). Bibliaga shumaj yachachimanchi entero munducho lapan casaducuna cushishga y unido goyänanpaj.

¿Imatataj Jehovapa testiguncuna ruran familiacuna más cuyanacärinanpaj?

Lapäcuna calpachacärë Biblia yachachicushganta casucunapaj, chayga yanapacun ali maja y ali tayta canapaj (Proverbios 31:10-31; Efesios 5:22–6:4; 1 Timoteo 5:8). Bibliaga lapan familiacunata yanapayta puedinmi, creenciancuna jucno captinpis yanapacun ali cawapäcunanpaj (1 Pedro 3:1, 2). Waquin casaducunapa majan Jehovapa testigunman ticrariptin ima nipäcushganta ricärishun:

• Brasilpita Clauir runami nin: “Puntata sojta watacuna casado cawaynëchoga mishiwan algu goyajno cawapäcoj cä y hasta raquicaytami yarpargä. Pero Ivete Jehovapa testigunman ticrariptinga más cuyacoj y pacienciacojmi ticrargan. Chayno captinmi raquicärirgänachu”.

• Zambiapita Agness warmimi nin: “Jehovapa testiguncunawan runä Bibliapita yachacunantaga manami munargächu, paycuna casaducunata raquicächishgantami yarpargä. Pero tiempuwanga cuentatami gocurgä casado vidächo Biblia alapa yanapämashganta”.

Jina lapan runacunata Bibliapita parlapanchi familiacunata imano Diospa Palabran yanapacushganta cay asuntucunacho:

• Buscar un cónyuge adecuado

• Superar las dificultades del primer año de casados

• Llevarse bien con los suegros

• Administrar bien el dinero

• Dejar de discutir

• Aprender a perdonar

• Corregir a los hijos

¿Maygan majapis juc religiunman yaycuptinga peliacunatachu apamun?

Waquin familiacunachoga awmi. 1998 watacho Sofres nishgan empresa wilacurgan, 20 familiacuna majachacashganpita juc matrimoniucho maygan majapis Jehovapa testigunman ticrariptinga, achca problemacunapa pasan religiunninraycur.

Jesusga wilacurgan gatirajnincuna familiancunawan problemacunapa pasananpaj cajta (Mateo 10:32-36). Will Durant jutiyoj runami wilacun Imperio Romano mandacushgan tiempunchoshi “achca familiacuna cristianismo culpanraycur raquicärej”.a Canan wichanpis testigucunata chaynolami tumpamanchi. Pero, ¿chayga rasunpachuraj?

Tribunal Europeo de Derechos Humanos nirgan “mana testigo caj familiacunaga, testigo cajtami problemacunata ashipan, mana respetapäcunchu creenciancunata y mana munanchu juc religiuncho caycänanpaj”. Jina tribunal constitucional nishgan caynomi nirgan: “Manami Jehovapa testiguncunalachu cay problemacunapa pasapäcun, sinoga juc familiacho lapancuna juc religiunyojla mana cajcunatapis pasanmi”.b Familianchicho creencianchiraycur familianchicuna mana ali tratamaptinchipis Jehovapa testiguncunaga, cay consejutami Bibliapita wiyacunchi: “Chikipäkushuptikipis ama chikipäkuytsu. [...] Imaykanöpapis lapan runakunawan ali kawapäcuy” (Romanos 12:17, 18).

¿Imanirtaj Jehovapa testiguncunaga testigo masincunalawan casaracun?

“Jesucristuta mana chasquicoj runawanga ama majachacächunchu” Biblia mandacushgantami Jehovapa testiguncuna casucärë, chaymi nogacunano criejcunalawanmi casaracärë (1 Corintios 7:39). Dios mandacushganta casucuptinchiga, yanapämanchimi. Ricäriy Journal of Marriage and Family nishgan revista wilacushganta, 2010 watacho cayno wilacurgan: “Majachacashga caj olgu y warmipis chay religiunlapita captinga, creenciancunaga juclaylami canga, y ishcanmi yanapanacäringa cushish y ali pasapäcunanpaj”.c

Chayno captinpis Jehovapa testiguncunaga manami pitapis nipäcöchu mana testigo majanpita raquicäcurinanpaj. Bibliami cayno nin: “Mayqan wawqipa warminpis rakikayta mana munaptinqa Jesucristuman mana yärakuptinpis warminpita ama rakikätsuntsu. Tsaypita Señor Jesucristo mana yachatsishqa kaptinpis mana rakikänanpaqmi tsayno nï. Tsaynöla maqan panipa runanpis rakikayta mana munaptinqa Jesucristuman mana yärakuptinpis runanpita ama rakikätsuntsu” (1 Corintios 7:12, 13). Noganchipis chay mandatuta casucunchi.