Nacaycuna ushacanganami

“Shumaq tantiyakuy ultimu tiempucho runakuna aläpa nakananpaq kashqanta” (2 TIMOTEO 3:1).

¿RICASHCANQUICHU mana alicuna pasaycashganta?

● Achca runacuna gueshyacunaraycur wanurcaycan.

● Chaychicaj runacuna micuynin mana captin wanurcaycan.

● Aypala runacuna fiyupa temblurcunaraycur wasiynaj quedacärin.

Ricärishun Biblia wilacushganta canan wichan cumplicaycangantami. Quiquiquimi cuentata gocunqui Biblia mayna wilacushgana caycuna pasananpaj y ushanan junajcunachonami cawaycanchi.a

Cay yachachicuycunaga mana ruracämushgachu “pasaypa mana ali Pachacho cawaycanchi” nir creinayquipaj, sinoga Tayta Diosman yaracur shuyanapaj. Gatejnin sojta yachacuycunaga wilacamun imataj ushanan junajcunacho pasananpaj cajta, caycunaga musyachimanchi ushanan junajcunachona cawaycanchi. Jinamanpis ricärishun runacuna nipäcushganta y imanirmi seguro caycanchi shamoj tiempucho ali cawayta chasquinapaj.

[Ichic wilacuy]

1. Fiyupa temblurcuna

“Timblurpis fiyupami juc-lächo juc-lächo canga” (LUCAS 21:11, Tayta Diosninchi Isquirbichishan).

● Haití naciuncho periodistacuna noticiata wilacuycargan juc fiyu temblor pasashganpita, y perga tunicushga rurinchoshi juc lulu wamra wagaycajta wiyapäcurgan, jutinga cargan Winnie. Japalanshi salvacurgan chay temblor cashganpita, taytancunaga wanupäcurgan.

¿IMATAJ MAYASHCANCHI? 2010 wata, enero quilla Haití naciuncho temblurga pasaypa fiyupami cargan, 300.000 runacuna wanupäcurgan y jinan horacho 1.300.000 runacunapis wasiynaj quedacärirgan. Y may chay sitiucunachopis achca temblurcuna cashga. 2009 abril quillapita 2010 abril quillacama entero munducho 18 jatun temblurcuna pasashga.

RUNACUNA NIPÄCUSHGAN. Unaypitanami cay Pachaga fiyupa cuyuycan, manami cananlachu. Imayca yargamushgan cajcuna canan musyachimanchi más fiyupa temblurcuna pasashganta.

¿RASUNPACHURAJ RUNACUNA NIPÄCUSHGANGA? Bibliaga manami ninchu ayca temblurcuna ushanan tiempucho pasananpaj, sinoga niycan may chaychopis fiyupa temblurcuna cangapaj. Caycunata ricarga cuentata gocunchi ushanan tiempucho cawaycanganchita (Marcos 13:8; Lucas 21:11).

¿IMA NINQUITAJ? Biblia wilacushganno, ¿canan tiempo fiyupa temblurcuna pasaycanchuraj?

Ushanan junajcunachoga manami temblurcunalachu pasananpaj cargan, sinoga mascunapis cangapaj. Jucta ricärishun.

[Ichic wilacuy]

“Pachata estudiajcuna nipäcun jatun terremotucuna, pero waquin runacuna espantacuypajnomi ricapäcun” (KEN HUDNUT, SERVICIO GEOLÓGICO DE ESTADOS UNIDOS).

[Agradecicunchi]

© William Daniels/Panos Pictures

2. Muchuy

“Muchuypis intëruchömi cangapaj” (MARCOS 13:8, Tayta Diosninchi Isquirbichishan).

● Níger naciunchomi juc runa Quaratadji nishgan tacshala marcaman chayashga micuyta ashir. Jina primuncuna, wawguin panincunapis micuyraycur chayman shapäcamurgan. Alapa laquishga cashpanmi familiantapis ricayta pengacunmi. ¿Imanir? “Familianta manteninanpaj y micuyta goycunanpaj sasa captinshi chayno caycan”, chay marcapa mandajnin chaynomi wilacun.

¿IMATAJ MAYASHCANCHI? Entero Pachacho ganchis runacunapita juc runapäga imapis canchu micunanpaj y masraj Africa naciuncho, chaychoga quimsa runacunapita jucshi yarganaylapita wanun. Tantiarinapaj, juc familiacho quimsa captenga, micuyga ishcaylapami aypan, chaurasga jucmi mana micunnachu. Chaynomi achca familiacuna goyay goyay alapa laquicuypämi cawapäcun.

RUNACUNA NIPÄCUSHGAN. Pachachoga achca micuycuna wayun, runacunachä mana yachanchu lapancunapaj aypachinanpaj.

¿RASUNPACHURAJ RUNACUNA NIPÄCUSHGANGA? Entero munducho achca micuycuna wayuptinpis, autoridäcunaga mana puedipäcurganchu muchuyta ushacächinanpaj, unaypita cananyaj alapa calpachacäriptinpis may chaychomi runacuna micuyraycur nacarcaycan.

¿IMA NINQUITAJ? Marcos 13:8 texto wilacushganga, ¿canan wichan cumplicaycanchuraj? Imayca yargamushgan cajcuna captinpis, ¿runacunaga micuyraycur nacaycanchiraj?

Fiyupa temblurcuna y muchuypis ricacan ushanan junajcunacho cawaycanganchita.

[Ichic wilacuy]

“Achca micuycuna captenga, manami chaychicaj wamracuna wanunmanchu bronquiupita, guechapita y waquin gueshyapitapis” (ANN M. VENEMAN, EX DIRECTORA EJECUTIVA DE UNICEF).

[Agradecicunchi]

© Paul Lowe/Panos Pictures

3. Gueshyacuna

“Pesti qeshyapis maytsaychömi kanqa” (LUCAS 21:11).

● África naciunchomi, juc doctor Bonzali jutiyoj imanopapis calpachacurgan Marburgo virus nishgan gueshyawan nacaycajcunata jampinanpaj; paycunaga minachoshi arupäcuycargan.a Achca runacuna wanurcaycajta ricarshi, payga autoridäcunata mañacurgan yanapacuycunata apachicamunanpaj, pero chusco quillacunaräshi pasargan yanapacuycuna chayananpaj. Chay wichanpäga Bonzali runapis chay gueshyawan contagiacurgan y wanurganshi.

¿IMATAJ MAYASHCANCHI? Runacunaga alapami nacarcaycan bronquiupita, guechapita, tuberculosispita, sidapita y paludismo nishgan gueshyacunawanmi. Y 2004 watachoga, cay gueshyacunaraycur aypala runacunami (11 millones) wanurgan.

RUNACUNA NIPÄCUSHGAN. Runacuna alapami mirarcaycan, chaychi gueshyacunapis miraycan.

¿RASUNPACHURAJ RUNACUNA NIPÄCUSHGANGA? Runacuna alapa mirarcaycaptinpis, rasun cajchoga imayca jampicunapis yurimushga y docturcunapis unaypitaga masnami yachan. Chayno captinpis, gueshyacunata ilacächinanpaj trucanga más runacunami wanurcaycan.

¿IMA NINQUITAJ? Biblia wilacushganno, ¿rasunpachuraj may chaychomi runacuna gueshyawan nacarcaycan?

Canan wichan runacunaga temblurcunaraycur, muchuyraycur y gueshyacunaraycur nacarcaycan. Y más laquicuypäga, quiquin castancuna chaychicaj runacunata nacachipäcun. Ricäriy imataj más Biblia wilacun.

[Ichic wilacuy]

[Ichic wilacuy]

“Alapa manchacuypami juc león pitapis micucurcuptenga, chaynolami gueshyacunapis charimaptinchi pasaypa manchachimanchi” (MICHAEL OSTERHOLM, EPIDEMIÓLOGO).

[Agradecicunchi]

© William Daniels/Panos Pictures

4. Familiacho cuyacuyga cannachu

“Manami kuyakuynin ni kuyapäkuyninpis kanqatsu” (2 TIMOTEO 3:1-3).

● Chrisga, Gales marcacho warmicunata yanapäcunanpaj cajcho arun. Payga wilacun juc cutishi juc warmi alapa magashga carmi pay cajman aywargan y cäran cashgantapis manami reguinaypächu cargan. “Waquin warmicunatapis chaynolami rurapäcun, waquincunaga pasaypa nitipacashgano carcaycan” nin.

¿IMATAJ MAYASHCANCHI? África naciunpa juc marcacho achca warmicuna wamralaraj cashpanmi viulashga cargan. Chay naciuncho waquin olgu runacuna manami pengacärinchu warminta magashganpita. Pero manami warmicunalami chayno nacapäcun. Canadá naciunchoga waquin warmicuna runancunata magar ushan.

RUNACUNA NIPÄCUSHGAN. Unaypitanami runacuna y warmicunapis peliapäcun, canan noticiacunachä wilacamuptin mastaraj musyanchi.

¿RASUNPACHURAJ RUNACUNA NIPÄCUSHGANGA? Noticiacuna chaypita wilacamuptinpis, runacunaga unaypitapis masraj majancunata magar ushan. Familiachoga manami cuyacuynin ni cuyapäcuyninpis cannachu.

¿IMA NINQUITAJ? ¿Cumplicaycanchuraj 2 Timoteo 3:1-3 textucuna nishganta? ¿Rasunpachuraj runacunaga jucnin jucninpis cuyanacärinnachu?

Jina Bibliami wilacurgan cay Pachawan imataj pasananpaj cajtapis. Ricärishun.

[Ichic wilacuy]

“Waquin runacuna y warmicunapis magashga cashganta manami wilacärinchu. Magashga warmicunaga achca cuti magashganpitaraj policiaman quejacun. Y chayga laquicuypami” (PORTAVOZ DEL SERVICIO DE AYUDA CONTRA EL MALTRATO DOMÉSTICO DE GALES).

5. Pacha ushacänanpaj

“Cay pacha[ta] mana allita rurajcuna castigasha can[ga]” (APOCALIPSIS 11:18, Tayta Diosninchi Isquirbichishan).

● Julioa jutityoj runa, palmeracunapita vinuta ranticurmi Nigeria naciuncho arun, pero chacrancunaman petróleo chayaptinshi lapan palmeracunata chaquichishga y aruyninta ogrargan. Payga cayno nin: “Lapan yacu ganratacashga, pescaducuna wanurgan y gueshyapis charimashcanchi. Cananga imapis canchu arunäpaj”.

¿IMATAJ MAYASHCANCHI? Musyaj runacuna nipäcun cada wata chaychicaj camiuncuna junta basurata lamarman jitapan, y masga caycan bolsacuna y ulepita rurashga cajcuna. Caycuna ilacänanpäga achca watacunaraj pasanman. Y manami chaylachu, runacunaga Pachata manami cuidapäcunchu, chaymi estudiaj runacuna nipäcun runacuna chacranta murupäcushganta alchacänanpäga juc watapitapis masraj pasanman. Juc periódico Sydney Morning Herald nishgan Australia naciunpita wilacamun: “Runacuna alapa mirapäcuptenga, 2035 watapäga imapis canganachu micunapaj ni maycho tiyanapäpis”.

RUNACUNA NIPÄCUSHGAN. Runacuna yachanmi cay Pachata imano cuidananpaj y alchananpäpis.

¿RASUNPACHURAJ RUNACUNA NIPÄCUSHGANGA? Pachata imano cuidananpaj estudiajcuna y waquin runacunapis walcala yanapacurgan tashganchi sitiuta cuidanapaj. Chayno captinpis wata wata runacuna Pachata más malograpäcuycan.

¿IMA NINQUITAJ? Cay Pacha alchacänanpäga, ¿Diospa yanapacuynintarächu necesitanchi?

Bibliaga manami caylatachu wilamanchi, sinoga ushanan junajcunacho ali cajcuna pasananpäpis. Jucta ricärishun.

[Ichic wilacuy]

[Ichic wilacuy]

“Chacrä cuyaylapami cargan, cananga imapis wayunnachu” (COMENTARIO DE ERIN TAMBER, RESIDENTE DE LA COSTA SUR DE ESTADOS UNIDOS, SOBRE LOS EFECTOS DEL DERRAME PETROLÍFERO DE 2010 EN EL GOLFO DE MÉXICO).

[Ichic wilacuy]

¿Diosga culpayojchuraj?

Canan wichan imayca mana alicuna captenga, ¿nishwanchuraj Dios culpayoj cashganta alapa nacanapaj? Cay tapucuypa respuestanta musyayta munarga, ¿Imatataj Biblia yachachimanchi? Walca yachacuycuna 11 caj capitulunta ricäriy.

[Agradecicunchi]

U.S. Coast Guard photo

6. May chaychopis Diospita yachachicunga

“May-chaychopis llapan runacunatarämi willapanga” (MATEO 24:14, Tayta Diosninchi Isquirbichishan).

● Vanesaa jutiyoj warmiga, Pacífico lamarcho islacuna caycashgancho tiyan, chay sitiupa jutinga Tuamotú. Chaycho caycaj isla niraj sitiucunaga alapa jatunmi y 16 mil runacunami tiyapäcun. Alapa carucho caycaptinpis, Jehovapa testiguncunaga Vanesata vecinuncunatawan watucargan. ¿Imanirtaj chayta rurapäcurgan? Diospa Gobiernunpita ali wilacuycunata runacunatami yachachipäcunanpaj.

¿IMATAJ MAYASHCANCHI? Diospa Gobiernunpa ali wilacuycunaga may chay sitiucunaman chayaycan. 2010 watacho, 236 naciuncunachomi Jehovapa testiguncuna chaychicaj horacunata Diospita yachachipäcurgan. Chunca watacuna pasashgancho, runacunatami yachachipäcunanpaj 20 mil millones publicaciuncunata jorgapäcamurgan.

RUNACUNA NIPÄCUSHGAN. Unaypitanami Diospita yachachipäcuycan.

¿RASUNPACHURAJ RUNACUNA NIPÄCUSHGANGA? Rasun cajchoga, achca runacunami Diospita yachachipäcuptinpis ratulapämi cargan y walca runacunatami yachachirgan. Pero Jehovapa testiguncunaga may chay sitiucunacho, tucuy idiumacunachomi y michämashganchi sitiucunachopis Diospita yachachipäcun (Marcos 13:13).b Diezmuta mana mañacunchu, sinoga gratislami runacunata yachachipäcun y lapan publicaciunnincunapis apachicushgan guellaylawanmi ruracan.

¿IMA NINQUITAJ? ¿Diospa Gobiernunpita ali wilacuynincuna may chaychopis predicaycanchuraj? Dios awnicushganta cumpliptenga, ¿imanoraj cawashun?

[Ichic wilacuy]

[Ichic wilacuy]

[Ichic wilacuy]

“Jehovapa yanapacuyninwanmi ali wilacuycunata runacunata yachachicur siguiycäshun may chay sitiucunacho caycaptinpis” (ANUARIO DE LOS TESTIGOS DE JEHOVÁ 2010).

Ali caway chayaycämunna

“Manapis aycällatanami fiyucunaga illganga. May-jina ashirpis mananami tarinquipänachu. Umildicunami ichanga alli pachacho tiyanga. Tayta Diosmi jauca goyächenga” (SALMO 37:10, 11, Tayta Diosninchi Isquirbichishan).

LAPANCHIMI munanchi Dios awnicushganta cumplinanpaj. Y chayga rasunpami ichic tiempulacho cumplicanga.

Guepa caj yachachicuycunacho ricashcanchi Bibliapa maygan wilacuynincuna canan wichan cumplicaycanganta, y caycunata ricarga cuentata gocunchi ushanan junajcunachonami cawaycanchi (2 Timoteo 3:1-5). Tayta Diosga waquin sirvejnincunata utilizargan ushanan junajcunacho ima pasananpaj cajta escribipäcunanpaj y awnicushganman yaracunapaj (Romanos 15:4). Dios wilacushganta canan wichan cumplicaycashganta ricarga, musyachimanchi ichiclachonami lapan mana alicuna ushacänanpaj.

¿Imaraj canga ushanan junajcuna ushacaptin? Diospa Gobiernunmi cay Pachata gobernanga (Mateo 6:9, 10). Ricäriy Biblia wilacunganta:

● Muchuy canganachu. “Mandashqan nacioncho trïgu shumaq wayuykulätsun. Intëru jirkakunachöpis kichkiyparaq kaykulätsun” (Salmo 72:16).

● Gueshyacuna canganachu. “Tsaycho taq runaqa manami mayqanpis ‘qeshyaykämi’ ninqapaqtsu” (Isaías 33:24).

● Cay Pacha alchacanga. “Tsay witsanmi chunyaq jirkapis y tsaki pampakunapis kushikunqa. Qara pampakunachöpis qewa loqluypa loqlur winarmi tuktunqa” (Isaías 35:1).

Shamoj tiempuchoga manami cay awnicuycunalachu cumplicanga, sinoga achca bendiciuncunami cangapaj. Maslata yachacuyta munaptiquega, Jehovapa testiguncunata niriy tantiachishunayquipaj imanirmi seguro caycan Jehová awnicushganta cumplinanpaj.