¿Patsa imano kanantataj Dios munan?

1. ¿Imapajtaj Diosninchi Patsata kamargan?

Runakuna chaycho kawapäkunampajmi. Adanwan Evataga manami cielucho kawayänampajchu kamargan, porque cielucho kawayga angelkunalapajmi (Job 38:4, 7). Adanwan Evataga Jehová churargan Edén huertamanmi (Génesis 2:15-17). Jina paykunata y mirayninkunatami awnirgan mana ushakaj kawayta chaskiyänampaj kajta. Lei Salmo 37:29 y 115:16.

Edén huertaga Patsapa juk kuchunlarajmi kargan, y Adanwan Evanami wamrankunawan ichiklapa ichiklapa jatunyachiyänan kargan, entero Patsaman juntanganyaj (Génesis 1:28). Patsaga wasinchinömi imaykamayajpis kanga, manami pipis ushakächingachu. Lei Salmo 104:5.

Cay videuta ricäriy: ¿Imapajta Dios Pachata camashga?

2. ¿Imanirtaj Patsaga juk shumaj huertachu?

Adanwan Eva mana wiyakuyanganraykur chaypita gargushga kangampitami. Chaymi chay Huertaga kannachu y manami pipis alchayta puedishgachu. Y Bibliapis ninmi, Patsaga mana ali runakunapa makincho kaykanganta (Job 9:24). Lei Génesis 3:23, 24.

Chayga, ¿mananachuraj runakunata ali kawayta Jehová goyta puedinnachu? ¡Manami!, Jehovaga lapanta puedejmi y ninganga mana faltaypami cumplikan (Isaías 45:18). Shamoj tiempucho runakunaga kawayanga puntata Jehová awnikushgannölami. Lei Salmo 37:11, 34.

3. ¿Imanötaj kay Patsa Shumaj Huertaman tikranga?

Diospa Gobiernuncho Jesús mandakoj karmi kay Patsata mushojyächinga. Diosta chikejkunatami Armagedón guerracho angelninkunawan ushakächinga. Chaypitanami Satanasta 1.000 watakunapa wanwanyaraykaj uchkuman garpuringa. Pero Diosta sirvejkunaga salvakuyangami, kikin Jesusmi pushanga y cuidanga, nirkurnami Mushoj Patsacho mana wanuypa kawakuyanga. Lei Apocalipsis 20:1-3 y 21:3, 4.

4. ¿Imaytaj nakaykuna ushakanga?

¿Imayraj lapan mana alikunata Diosninchi ushakächinga? Jesusmi wilakurgan puntata imara pasanampaj kajta. Kanan wichan runakuna pasaypa mana alita rurayanganmi rikächikun kay ‘pachapa ushacaynin’ ichiklachöna chämunampaj kajta. Lei Mateo 24:3, 7-14, 21, 22.

1.000 watakunapa Jesús gobernamunganchömi ichiklapa ichiklapa lapan mana alikunata ushakächinga (Isaías 9:6, 7; 11:9). Rey kar y sacerdotikunapa pushajnin karmi runakunapa juchankunata ilakächinga. Chaymi ichanga manana kanganachu gueshya, awkisyay ni wanuypis. Lei Isaías 25:8 y 33:24.

5. ¿Pïkunataj Mushoj Patsacho tiyapäkunga?

Diosta wiyakojkunalami (1 Juan 2:17). Gatejninkunatami Jesusga mandargan ali shonguyoj runakunata yachachinampaj, chaynöpa paykunapis Diosman witiyänampaj. Kanampis, maychikaj runakunatami Jehová yachaykächin Mushoj Patsacho kawayänampaj (Sofonías 2:3). Jehovapa testigunkuna Congregakänan Wasiman aywaj familiakunaga yachakuyan ali tayta, ali warmi y ali wamra kaytami, y Bibliapa ali wilakuynintami kushishga chaskikuyan. Lei Miqueas 4:1-4.