19 CAJ YACHACUY
¿Rasunpa caj cristianucunachu Jehovapa testiguncunaga?
Jehovapa testiguncunaga rasunpa cristianucuna cashganchitami creinchi. ¿Imanirtaj chayta ninchi? Mä yachacushun imamantaj alapa yäracunchi, imanirtaj Diospa jutinta apanchi, y imanotaj amatar cuyanacunchi.
1. ¿Imamantaj Jehovapa testiguncunaga alapa yäracunchi?
Jesusmi nergan: “Gam nishayquega rasun cajmi” (Juan 17:17). Jesusnolami Jehovapa testiguncunaga ‘Diospa Palabranga rasun cajlami’ nir chaylaman yäracunchi. ¿Imataj pasargan guepa watacunacho, 1870 wichan? Bibliata estudiajcunami ichiclapa ichiclapa Diospa Palabranta tantiar galaycärergan. Waquin iglesiacuna imano yachachicushganpa trucan, imamanpis creipäcunanpäga Biblia ima nishgantarämi ricapäcurgan. Bibliacho ima yachacärishgantapis waquincunawan parlarmi galaycärergan.a
2. ¿Imanirtaj ‘Jehovapa testigun’ jutita apanchi?
Noganchega Diosta adurar rasun cajlatami paypita yachachicunchi, chaymi Jehovaga testiguncuna cashganchita nin (Hebreos 11:4–12:1). Unayna Diosga marcanta cayno nergan: “Gamcunaga testïgücunami carcaycanqui” (leiriy Isaías 43:10). Bibliapis nin Jesusga yäracuypaj Testigo cashganta (Apocalipsis 1:5). Chaymi 1931 wata wichanpita Jehovapa testiguncuna nej jutiwanna reguishga cargunchi. ¡Chaypitaga canan cushishga ricacunchi!
3. ¿Jesús cuyacoj cashgannolachu noganchipis canchi?
Jesusga gatejnincunata cuyarmi jucnin jucninta familiantano ricaj (leiriy Marcos 3:35). Chaynola canan wichan may chaycho caycarpis, mana raquicaypa juc castala caycanchi, y cushishga gayanacunchi ‘wawguilä, panilä’ nir (Filemón 1, 2). Cayno Biblia nishgantapis cäsuculanchimi: “Yäracoj mayiquicunawan cuyanacärinqui” (1 Pedro 2:17). Hermanulanchicuna ima desgraciapapis pasaptenga mayna chaycho caycanchi yanapacunapaj.
SHUMAJ YACHACURCUNAPAJ
Mä maslata yachacushun Jehovapa testiguncunapita y imanirtaj ninchi rasunpa cristianucuna cashganchita.
Rasunpa cristianucunaga Biblialamanmi yäracunchi, y chaypitaga pï maytapis yachachicunchi.
4. Imamanpis creinapäga Bibliamanrämi yäracunchi
Jehovaga unayna wilacurgan ushanan tiempucho Palabran masraj tantiacänanpaj. Leipäcuy Daniel 12:4 (TNM) y caypita parlapacäriy:
Diospa sirvejnincuna Bibliata estudiashganman tupu, ¿imataj caycargan masraj mirananpaj?
Ricäriy imanotaj Bibliata estudiajcuna Diospa Palabranpita yachacärej, jucnin caj cargan Charles Russell jutiyoj waugui. VIDEUTA ricapäcuy y caypita parlapacäriy:
¿Imacunata rurartaj Charles Russell y waquin estudianticuna Bibliapita yachacärej?
¿Mayashcanquichu?
¿Imanirtaj tiempuwanga ima creiycashganchita trucar galaycushcanchi? Imanomi intipis alto alto aywaycaptin masraj achicyarcamun, chaynolami Bibliata tantianapäpis Diosninchega achquin japuyta goycalämashcanchi (leiriy Proverbios 4:18). Bibliacho rasun cajcunaga manami trucacanchu, ichanga imano tantiapashganchimi öraga trucan.
5. Ima jutita apaycashganchipitaga cushicunchimi
¿Imanirtaj ‘Jehovapa testigun’ jutita apar galaycurganchi? VIDEUTA ricapäcuy y caycunapita parlapacäriy:
¿Imanirtaj ‘Jehovapa testigun’ jutita apashganchega ali caycan?
¿Imanirtaj Jehovaga runacunata acran testigun cananpaj? Testigucunaga Diospita rasun cajlatami parlanchi, pero waquincunaga Jehovapita lutanta parlapäcun; lulacur imacunata yachachicärishganta ishcayta ricärishun.
Waquin religiuncunaga ‘santucunanwanraj Diosta adurashwan’ nipäcun. ¿Chayga rasunpachuraj? Leipäcuy Levítico 26:1 y caypita parlapacäriy:
Cay texto wilacushganno, ¿ima nishwantaj?: ¿imataj Dios nin santucunapita?
Waquincunapis yachachicärin Jesús Dios cashganta, ¿chaypis rasunchuraj? Leipäcuy Juan 20:17 y caycunapita parlapacäriy:
Cay texto wilacushganno, ¿ima nishwantaj?: ¿Jesuspaj parlarga quiquin Diospächuraj parlaycanchi?
Jehovaga paypita y Churinpita rasun cajta yachachicunanpaj testiguncunata mandash, ¿ima ninquitaj chaypita?
6. Jucninchi jucninchi cuyanacunchi
Cristianucunapaj Biblia parlarga juc cuerpo japuy cashganchitano wilacun. Leipäcuy 1 Corintios 12:25, 26 y caycunapita parlapacäriy:
¿Imatataj rasunpa cristianucuna rurapäcun waquin hermanuncuna nacapäcuptin?
¿Gampis ricashcanquichu Jehovapa testiguncuna imano cuyanacärishganta?
Maylachopis Jehovapa testiguncuna nacarcaycaptenga juclami yanapanacärin. Chaypita juc VIDEUTA ricapäcuy. Nircur caypita parlapacäriy:
¿Cuyanacurchuraj Jehovapa testiguncuna chayno yanapanacärishga? ¿Imanirtaj chayta ninqui?
Rasunpa cristianucunaga cuyacoj captinchimi nacaycajcunata yanapacunchi.
WAQUINCUNA NIPÄCUN: “Pïcunaraj Jehovapa testiguncunaga, secta imachi paycunaga”.
¿Imaytaj adurajnincunataga ‘testigöcunami’ nir Jehová gayargan?
ICHIC YACHACUY
Jehovapa testiguncunaga rasunpa caj cristianucunami. Entero munduchomi juc castanola Diosta adurar cawacunchi, Biblia nishganman yäracunchi y Jehovapita rasun cajlata yachachicunchi.
Yarpänapaj
¿Imanirtaj ‘Jehovapa testigun’ jutita apar galaycushcanchi?
¿Imacunata rurartaj lapalanchi cuyanacunchi?
¿Jehovapa testiguncunalachuraj rasunpa caj cristianucuna?
MASLATA YACHACUNAYQUIPAJ
Imano galaycushganchipita yachacuy.
Imacuna luta yachachicuycuna cashgantaga wilacushcanchimi; jucta ricärishun.
Testigucunapita imalatapis tapucuycarga caycho yachacuy.
“Jehovapa testiguncunapita ima tapucärishgan” (Yachacunapaj caycan jw.org paginacho)
Stephen jutiyoj runaga pasaypa mana alicunata rurargan. ¿Imataj yanapargan ‘nogapis munä Jehovapa testigun cayta’ ninanpaj?
“Pasaypa mana alicunamanmi chayashcä” (Wilacamoj, 1 julio quilla, 2015)
a Wilacamoj revistanchega 1879 watapitami jinala canancama yargaycämun.