4 CAJ YACHACUY

¿Pitaj Jesucristo?

1. ¿Maychötaj Jesús kawar galaykurgan?

1. Cielucho Jesús; 2. José y Mariawan itilaraj kaykar Jesús; 3. Wamrakunata Jesús yachaykächin — ¿Imanötaj yachanaylapaj runa Jesús kargan? (MATEO 11:29; MARCOS 10:13-16)

Patsacho manaraj yurirga juk espiritumi Jesusga kargan cielucho (Juan 8:23). Paytami puntata Jehová kamargan y wakinkunata kamashganchönami payga yanapargan. Paypaj parlarmi Bibliaga nin Diospa “japallan wamran” kanganta, kikin Dios kamashga kaptin (Juan 1:14). Jina ‘Wilakamoj’ nishpapis reguinchimi, Taytampa jutincho imaypis parlaptin. Lei Proverbios 8:22, 23, 30 y Colosenses 1:15, 16.

2. ¿Imanirtaj Patsaman Jesús shamurgan?

Wamrantami Dios mandamurgan kay Patsaman, y chaypajga María jutiyoj warmipa pachanmanmi kawayninta churarkamurgan. Chaymi kayta ninchi: Jesusga manami juk runapa churinchu (Lucas 1:30-35). Kaykunaraykurmi payga kay Patsaman shamurgan: 1) rasumpa kajta Diospita yachachikunampaj, 2) ima mana alikunapa pasarpis Diospa munaynin rurayta yachachimänanchipaj, y 3) ‘salbamananchiraykur’ juchaynaj kawayninta gonampajmi. Lei Mateo 20:28.

3. ¿Imanirtaj salvamananchita necesitanchi?

Jesús salvamanganchiga juk runapa kawaynin mana ograkänampaj chaniyoj pagunömi (Éxodo 21:29, 30). Diosninchiga manami yarpaylapis yarparganchu runakuna wanuyänanta ni awkisyänanta. ¿Manaku Adantaga mayna Jehová nishga kargan mana wiyakuptinga wanunampaj kajta? Awmi ari. Juchata mana rurashga karga manami wanunmanchu kargan (Génesis 2:16, 17; 5:5). Biblia ningannöpis wanuyga Adanpa culpanraykurmi ‘galaykurgan’. Chaymi juchasapa kanchi y wanunchi. Chaypita salvamananchitaga aläpami munaykunchi. Lei Romanos 5:12 y 6:23.

Kanan kayman pensarishun, ¿pitaj salvamashwan juchapita y wanuypita? Wanurga kikinchipa juchalanchipitami pagakunchi, pero wakinkunapataga manami pagayta puedinchichu. Lei Salmo 49:7-9.

4. ¿Imanirtaj Jesús wanurgan?

Juk guerucho Jesús wanuykan, chaypitaga kawariramurganmi y kananga gobernaykan cieluchömi

Jesusga juchaynaj runami kargan, manami noganchikunanöchu. Chaurasga, manami juchanraykurchu wanurgan, sinoga noganchikunaraykurmi. Kuyay churinta mandamunganwanmi Diosga lapan shongunwan runakunata kuyanganta rikächikurgan. Jina Taytanta casukurmi Jesuspis rikächimargunchi alapa kuyapämanganchita. Lei Juan 3:16 y Romanos 5:18, 19.

Cay videuta ricäriy: ¿Imanirtaj Jesús wanurgan?

5. ¿Imatataj kanan wichan Jesús ruraykan?

Patsacho kaykarmi Jesusga gueshyaykajkunata jampirgan, wanushgakunata sharkachirgan y nakaykajkunata yanapargan, chaynölami shamoj tiempuchöpis Diosta sirvejkunata yanapanga (Mateo 15:30, 31; Juan 5:28). Jesustami Dios sharkarachimurgan espirituno cielucho kawanampaj (1 Pedro 3:18, NM). Chaynami Jesusga Taytampa derecha kaj laduncho shuyarargan, Patsacho gobernamunampaj autoridadta chaskinganyaj (Hebreos 10:12, 13). Kanan wichanga cieluchömi Jesusga gobernaykan, y chay ali wilakuytami gatejninkuna musyachikuykanchi. Lei Daniel 7:13, 14 y Mateo 24:14.

Autoridadta chaskinganwanmi kay Reyga ichiklachöna lapan mana alikunata ushakärachinga. Lapan wiyakojkuna y Jesusman fe-ninta churajkunami imaykamayajpis Patsacho kawapäkunga, ¡y Patsaga juk shumaj huertamanmi tikranga! Lei Salmo 37:9-11.

Maslata yachakuyta munarga ¿Qué nos enseña la Biblia? nishgan librupa 4 y 5 kaj capitulunkunata leiriy.