Edayashga waugui paninchicunata cuyapäshun

1, 2. 1) Proverbios 16:31 wilacushganno, ¿ima nishwantaj edayashgana caycaj waugui paninchicunapita? 2) ¿Ima tapucuycunapitataj canan yachacurishun?

DIAMANTE nishgancuna mana shumaj arupashga captenga ichic ruminolanomi ricacämunman y chayno ruminola caycajta pipis taricuptenga cuentata mana gocur ichanga jitarirpis jitarinmanmi.

² Soguyashgana caycaj hermanunchicunaga chipchipyaycämoj cuyaylapaj gorinomi carcaycan. Soguyash ajchapaj parlarmi Diospa Palabranga nin cuyaylapaj coronano cashganta (leiriy Proverbios 16:31; 20:29). Öraga ‘imatataj paycunapita yachacushaj’ pipis ninman pero jovincunaga imaycatami paycunapita yachacunman. Canan yachacunapaj quimsa tapucuycuna caycan: ¿imanirtaj Jehová soguyashgana caycajcunata ali nawilanwan rican?, ¿imacunachotaj paycunata Jehová aruchin?, ¿imatataj jucninchi jucninchi rurashwan paycunapita shumaj yachacunapaj?

¿IMANIRTAJ JEHOVÁ ALI NAWILANWAN RICAN EDAYASHGANA CAYCAJCUNATA?

3. Salmo 92:12-15 texto wilacushganno, ¿imanirtaj Jehová alapa cuyayculan edayashga hermanunchicunata?

³ Soguyashgana hermanunchicunataga alapami cuyaycun Taytalanchi Jehová. Musyanmi imacunacho calpachacushganta y imano shonguyoj runacuna cashgantapis. Jina Diosninchega cushicunmi cay edayashga hermanunchicuna lapan jovincunata imalachopis yanaparcuptin (Job 12:12; Prov. 1:1-4). Mayraj cushicunpis mana yamacaypa sirvir caycashganta ricar (Mal. 3:16). Imaycacunapa pasarpis mana raquicaypami Jehovata sirvipäcush, canan yaracushgancunaga mana juchoj gaganomi caycan. Diospa jutinpitaga parlarcaycanla. Aumi, Jehovaga alapami cuyan paycunata (leiriy Salmo 92:12-15).

4. ¿Imacunaman yarpashgantaj edayashga hermanunchicunata yanapanman?

⁴ Gampis soguyashgana carga yarpachacuy lapan rurashgayquicunata Jehová mana gongashganta (Heb. 6:10). Mana gongangachu lapan calpayquiwan paypita yachachicushgayquicunata; mana gongangachu ima pruebacunatapis vencishgayquita; Palabran nishgannola cawacushgayquita y Payta sirvinayquipaj ima cargucunatapis chasquishgayquita. Gamcunaga mana yamacaypami Diospa marcan nishushgayquinola rurapäcushcanqui. Shacyächicoj car mayraj yanapacaramushcanquipis lapan tiempunwan Diosta sirvejcunata. Cuyapäshushpayquimi ‘munashannölla cawajcunataga manami gongächu’ nishunqui Taytalanchi Jehová (Sal. 37:28). Caytapis nishunquimi: “Pasaypa soguna caycaptiquipis chaynöllami yanapaycäshayquipaj” (Is. 46:4). Chauras imaypis ninquimanchu ‘imapänataj; calpaläpis cannachu’ nir. Yanapacamunayquipäga imayca caycan.

IMACUNATA RURARCAYCAN JEHOVAPA MARCANCHO

5. ¿Imamantaj yarparcunman edayashga hermanunchicuna?

⁵ Edayashga hermanucunapäga imaycacunacho yanapacamunanpaj caycan. Achca watacunapa Diosta sirvirga imaycacunatapis yachacärishgachi. Jehovaga manami ninchu edayashganraycur manana yanapacamunanpaj. Chaypita gatejnin parrafucunacho yachacurishun.

6, 7. ¿Pïcunapataj Biblia parlamun y imanotaj paycunata Jehová bendecirgan?

⁶ Bibliaga parlanmi edayashgana caycarpis unaycho Diosta sirvejcunapita. Jucnin cajmi cargan Moisés, 80 watayojna caycarpis Israel marcapa pushajninman y profetanman ticrargan. Jucnin cajna cargan Daniel, 90 watayoj caycarpis Jehovapa profetannola yanapacuycargan. Y nircurpis caycan apóstol Juan, 90 watapita masna charaycarpis Apocalipsis libruta guelgamurgan.

⁷ Waquin Diosta sirvejcunaga manami alapa reguishgachu cargan, pero Diosninchipa ricayninpäga manami gongacashgachu caycargan. Jucmi cargan Simeón jutiyoj runa, “paymi alilata rurashpan Tayta Diosman yärakur kawarqan”. Jehovaga musyarganmi shongulancho ima cashganta, chaychi Jesustapis itilaraj caycaptin ricargan y paypita y mamäninpitapis juc profeciata wilacamurgan (Luc. 2:22, 25-35). Chaynola Anapis 84 watapana aywaycar pagasta junajta templucho Diosta adurar cacoj. Paypis Simeonnolami Jesusta ricargan. Jehovaga alapami ishcancunata bendecirgan (Luc. 2:36-38).

8, 9. ¿Ima nishwantaj viudayashga cristianacunapita?

⁸ Canan wichanpis achca soguyashgana hermanunchicunaga yanapacuycanmi maychicaj mozo jipashcunata. Lois Didur paninchipita parlarcushun. 21 watayojlaraj caycaptinmi Canadá naciuncho precursora especialno yanapacur galaycamurgan. Casacurirna John jutiyoj runanwan congregaciuncunata watucar galaycärergan. Canadá Betelchopis 20 watacunano sirvipäcurgan. Tiempuwanna Ucrania naciunpa aywapäcunanpaj nipäcurgan. ¿Nirganchuraj paycuna ‘edayashgana caycanchi, pitaj caru naciunpa aywacunga’ nir?, manami; aywacärerganmi, chaychomi Jhon wauguinchipis Comité de Sucursal nishgancho yanapacamurgan. Ganchis watacuna pasarcuptenga wauguilanchega wanucurganshi, pero paninchega manash cuticamurganchu. Ucrania Betelchomi canancama yanapacuycarla caycan y chaycho arojcunaga alapashi panilanchita cuyan.

⁹ Lois paninchinotapis achca cristianacunatami Jehová alapa cuyan. Viudayashga caycarpis tiempulanchoga alapami runancunata yanapargan, chaytapis Jehová musyanmi (1 Tim. 5:3). Alapa calpachacärishganga ali caycan mozo jipashcunapaj.

10. ¿Imatataj yachacunchi Tony wauguilanchipita?

¹⁰ Jinamanpis manami gongacashgachu caycan wasinlacho wichgapacush caycaj edayashga hermanucuna. Tony wauguinchipita parlarcushun. 1942, agosto quilla, 20 watayoj caycaptinmi Pensilvania marcacho bautizacurgan. Chay wichanlachomi soldado mana cayta munar quimsa watapano carcilman apapäcurgan. Hildawan casacurirna ishcay wamrancunata ashmapäcurgan. Tiempuwanga achca watacunapami quimsa congregaciuncunata pushar yanapacurgan; asambleacuna ruracänanpäpis yanapacushgash. Reuniuncunachopis yanapacoj y carcilchopis Bibliapita yachachicoj. 98 watatana aywaycarpis ‘yamacashcäna’ manami ninchu, calpachacuycanmi Jehovata sirvinanpaj y congregaciunninchopis yanapacamunanpaj.

11. Waquin edayashga hermanunchicunaga wasinlachomi carcaycan, ¿imanotaj paycunata ricächishwan alapa cuyashganchita?

¹¹ ¿Imanotaj wasilancho caycaj edayashga hermanunchicunata cuyapashganchita ricächishwan? Alichi canman congregaciuncho ancianucuna paycunata yanapaptin predicapäcunanpaj y reuniuncunatapis wiyapäcunanpaj. Jina ‘watucamushayqui o gayamushayqui wauguilä’ nirpis cuyashganchita ricächishwanmi. Masrächi watucaycushwan congregaciunpita carucho tiyajcunata. Ichanga waquincunapäga sasanomi canman imalatapis wilacamunanpaj. Chauras alichi canman paycunata tapupaptinchi unaycho Diosta sirvir imacunapa pasashganta. Aumi, cushicuypämi canga wilacamuptenga.

12. ¿Pïcunawan parlanapätaj calpachacushwan congregaciunninchicho?

¹² Cushichimäshunmi congregaciunninchicho maygan edayashga hermanulawanpis parlarcuptinchega. Estados Unidospita Harriette paninchega achca watacunapash congregaciunnincho mana yamacaypa Jehovata sirvergan. Chaynash paninchega warmi wamranman aywacorgan. Mushoj congregaciunninchoga achcajcunash cushicärergan payta reguir. Payga wilacurganshi 1920 wata wichan imano Jehovata reguishganta y imano paypita yachachicushganta. Predicaciunman yargurga quirunta maylacunanpaj imalatapis apajshi, ‘pajta carcilman apapäcamanman’ nir. Aumi, 1933 watachoga ishcay cutipash juc semanalacho carcilman apapäcorgan. Presuraycaptenga mana testigo runanlash quimsa wamrancunata ricargan. Ali ¿au?, piraj gongaycunman Harriette panilanchi imaycacunata rurashganta.

13. ¿Imatataj yachacunchi Jehovapa marcancho caycaj edayashga hermanunchicunapita?

¹³ Soguyashgana waugui paninchicunaga manami gongacashgachu caycan Jehovapa marcancho. Paycunaga ricapäcushgami imano Jehová marcanta winachishganta y paycunatapis imano bendecishganta. Imalachopis pantaripäcushga carga yachacärishgami alicunalata rurapäcunanpaj; yachaj runaman ticrapäcushga. Aumi, imayca caycan paycunapita yachacunapaj (Prov. 18:4). Paycunawan reguinacunapaj calpachacushun, yaracuyninchita sinchiyarcachirmi cushichimäshun.

SOGUYASHGANA HERMANUNCHICUNAPITA SHUMAJ YACHACURCULÄSHUN

14. Deuteronomio 32:7 textucho, ¿ima consejutaj caycan jovincunapaj?

¹⁴ Alichi canman quiquinchi galaycuptinchi mayor hermanucunawan parlapacunapaj (leiriy Deuteronomio 32:7). Ichanga paycunaga shumaj ricannachu, unayno japannachu y parlaylatapis uticanman, pero shongulanchoga jovinmi carcaycan y Jehovapa naupanchopis alimi carcaycan (Ecl. 7:1). Yarpachacushun imanir paycunata Jehová cuyashganta, noganchipis cuyananchimi. Eliseunomi cashwan, payga Diospa sirvejnin Eliastami nergan “gamtaga manami cacharishayquipächu” nir (2 Rey. 2:2, 4, 6).

15. ¿Imacunatataj tapupashwan edayashga hermanunchicunata?

¹⁵ Edayashga hermanunchicunaga cuyashgano ricacunga mana laquichiylapa tapucuycunata rurapaptinchi (Prov. 1:5; 20:5). Cayno tapupashwan: “jovinlaraj captiqui, ¿imataj yanapäshurgayqui Diosta sirvir galaycunayquipaj?”, “¿imacunapa pasartaj Jehovapa maquinta ricargayqui?”, “¿imataj yanapashurgayqui Jehovapita imaypis mana raquicänayquipaj?” (1 Tim. 6:6-8). Lapan wilapämashganchicunata wiyarga alimi canga.

16. Juc joven maygan edayashga hermanulawanpis parlarcuptenga, ¿imanirtaj nishwan ishcancuna shacyächinacushganta?

¹⁶ Juc joven, edayash hermanuwan parlacuriptenga ishcanmi shacyächinacun (Rom. 1:12). Jovin cajga cuentatachi gocunga sirvejnincunata Jehová imaypis mana jaguishganta, y edayashga caj hermanuna más cushishgaraj ricacunga Jehová yanapashgancunaman yarpar.

17. ¿Imanirtaj nishwan hermanunchicuna chacwanyaptinpis auquinyaptinpis Diospa ricayninpaj cuyaylapa cashganta?

¹⁷ Joven cashganchega ushacajlami caycanman pero auquinyarpis chacwanyarpis Jehovapa naupanchoga cuyaylapaj runami caycanchi (1 Tes. 1:2, 3). Chaytaga ninchi achca watapa Diosta sirvir edayashga hermanunchicuna ali shongu runaman ticrashganpitami. Y Paycunawan reguinacurga imaycatami yachacushun, Jehová ricashgannolami jucnin jucnintapis ricaycäshun.

18. ¿Imatataj yachacushun gatejnin yachacuycho?

¹⁸ Congregaciunninchicunaga juc gagano ricacunga jovincunapis edayashgacunapis juc shongula arupäcuptin. Chaymi gatejnin caj yachacuycho ricärishun imanomi edayashga hermanucuna jovincunata valuranman.