Liejcuna tapucärishgan

Belén marcacho Jesús yurishganpita, ¿imanirtaj Josewan María Nazaretman cutinanpaj trucanga chaylacho quedacurgan?

Biblia mana wilacuptinpis, cawaynincho ima pasashgancunata cuentata gocushwan imanir chayno decidishganta.

Galileacho caycaj Nazaret marcacho María Josewan goyaycaptin, juc ángel yuripar gueshyaj ricacunanpaj nergan (Luc. 1:26-31; 2:4). Tiempuwanna, Egiptupita yargur Nazaret marcaman cutipäcurgan. Chaymi nishwan Jesús Nazaretpita cashganta (Mat. 2:19-23). Chaymi Nazaretpita parlaptinchi: Joseman, Mariaman y Jesusmanpis yarpächimanchi.

Jina musyanchipis María Judá marcata reguishganta. ¿Imanirtaj chayta ninchi? Judá marcacho Mariapa familian tiyargan. Chaychomi caycargan Elisabet, payga cargan Zacarías sacerdotipa warmin y bautizacoj Juanpa maman (Luc. 1:5, 9, 13, 36). María Elisabet-ta watucashgancho quimsa quillano quedacurgan, nircur Nazaret marcaman cuticurgan (Luc. 1:39, 40, 56).

Tiempo pasaptinna, Judeacho gobernaj caj mandargan lapan runacuna sensacärinanpaj. Chayta cäsucur, José Nazaret marcapita, Davidpa marcan Belenman viajargan; chaychomi profecía wilacushganno Mesías yurinan cargan (Luc. 2:3, 4; 1 Sam. 17:15; 20:6; Miq. 5:2). María Jesusta chaylaraj gueshyapacushganpita, José manami ninmanchu cargan carupa viajananpaj. Chaura Belén marcacho quedacurgan, chayga Jerusalenpita manami caruchochu caycargan. Chaynomi más facilmi cargan Josewan María Jerusalencho caycar templuman wamranta apaycur Ley mandashganno ofrendata Diosta goycunanpaj (Lev. 12:2, 6-8; Luc. 2:22-24).

Jinamanpis Diospa angelnin Mariata nergan Jesús “unay aylun Davidno rey kananpaqmi”. Capazchi Josewan María almiracurgan Jesús Davidpa marcancho yurishganpita (Luc. 1:32, 33; 2:11, 17). Yarparganchi Belén marcacho quedacuptin imacunata rurananpaj wilacuycunata Jehová goycunanpaj.

Paycunaga achca quillacunarächi Belén marcacho quedacurgan. Ayca tiempo chaycho quedacushganta mana musyaptinchipis, musyanchimi goylarcunata ricajcuna watucaj aywaptin, Jesús chaylaraj yurishgachu cargan, sinoga wamranami cargan, y familianpis wasiyojna cargan (Mat. 2:11). Chauraga Nazaret marcaman aywananpaj trucanga juc tiemputaraj Belén marcacho tiyananpaj quedacurgan.

Herodesga Belén marcacho tiyaj “wamrakunata wanutsipäkurgan tsayraq yurishgapita ishkay watayuqyaq” (Mat. 2:16). Juc ángel ima pasananpaj cajpita wilapaptin, Josewan María Egiptuman gueshpir aywacärirgan, chaycho quedacurgan Herodes wanunancama. Tiempo pasaptinraj Nazaretman cuticärergan. Chaytaga rurargan Herodespa wamran Arquelao mandacur galaycuptin. Jina yarpapäcurgan ángel nishganta cäsucur Jesús Nazaretcho ali caycänanpaj, chaymi Belenman cutipäcurganchu (Mat. 2:19-22; 13:55; Luc. 2:39, 52).

Cielupaj acrashga cajcunaga caycan Jesús wanushganpitaraj. Ichanga Josega más unayna wanushga cargan. Chaychi payga cay Pachacho cawarimunga pï maypis reguipäcunanpaj y tapupäcungapis imanir Belencho quedapäcurgan Jesús yurishganpita.